قالا كۇنى مەرەكەسىندە وسكەمەن شاھارىنىڭ اكىمى قۋات تۇماباەۆ ۇزاق جىل باسپانا كەزەگىندە تۇرعان بىرنەشە وتباسىعا پاتەر كىلتتەرىن تاپسىردى.
ەكىنشى توپتاعى مۇگەدەك كوكا قايساروۆا باسپانا كەزەگىن باقانداي 27 جىل كۇتىپتى. وسى ۋاقىتقا دەيىن تۇرماعان جەرى قالماعان ول سوڭعى كەزدەرى اپكەسىنىڭ ءۇيىن مەكەن ەتىپتى. باسپانا ازابىن ابدەن تارتقان انا ءۇيىنىڭ الدىنا قالا اكىمىنىڭ كولىگى توقتاعاندا ءوز كوزىنە ءوزى سەنبەي: «بۇلاي بولادى دەپ كىم ويلاعان؟! باسپانادان مۇلدە كۇدەرىمدى ۇزە باستاپ ەدىم. ايتارعا ءسوزىم بولماي تۇر. قۋانىشىمدا شەك جوق», دەپ كوز جاسىنا ەرىك بەردى.
ال قارلىعاش دۇكەتباەۆا باسپانا كەزەگىنە 1992 جىلى تۇرىپتى. ول كەزدەگى كىشكەنتاي قىزىنىڭ ءوزى قازىر ەكى بالا تاربيەلەپ وتىر ەكەن. جيىرما بەس جىل بويى ء«وز ءۇيى – ولەڭ توسەگىن» تاعاتسىزدانا كۇتكەن قاريا ەلباسى مەن وبلىس باسشىسىنا, ارنايى كەلگەن قالا اكىمىنە العىسىن ايتتى.
ابلاكەت ىقشام اۋدانىندا تۇراتىن ءتورت بالانىڭ اناسى ءالميرا سۇتتىباەۆانىڭ جەر ءۇيى وسىدان بىرنەشە جىل بۇرىن اپاتتى دەپ تانىلىپتى. كوپ بالالى انا جاقىندا شاھار باسشىسىنىڭ قابىلداۋىندا بولىپ, جاعدايىنىڭ ناشارلىعىن, دەنساۋلىعىنىڭ سىر بەرىپ, بارلىق تىستەرىنىڭ ءتۇسىپ قالعاندىعىن ايتىپ, جاردەم سۇراپتى. قالا اكىمىنىڭ كومەگىمەن وسكەمەندەگى ءتىس ەمحانالارىنىڭ ءبىرى ول كىسىنىڭ ءوتىنىشىن قاناعاتتاندىرىپ, تىستەرىن ەمدەپ بەرىپتى. ازىرگە ءالميرا سۇتتىباەۆانىڭ باسپانا كەزەگى كەلمەگەن ەكەن. اس بولمەسى اعاش تىرەۋمەن تۇرعان ونىڭ ۇيىنە ارنايى بارعان قۋات تۇماباەۆ جاڭا باسپانا العانعا دەيىن ۋاقىتشا ەكى بولمەلى پاتەر بەرىلەتىنىن ايتىپ, كوپ بالالى وتباسىن ءبىر قۋانتىپ تاستادى.
ازامات قاسىم, «ەگەمەن قازاقستان»
وسكەمەن