ەۋرازيالىق ەكونوميكالىق وداققا مۇشە مەملەكەتتەر اراسىنداعى كەلىسىمدى راتيفيكاتسيالاۋ تۋرالى زاڭ جوباسى قارالدى.
پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «ەۋرازيالىق ەكونوميكالىق وداققا مۇشە مەملەكەتتەر اراسىنداعى قىزمەتتىك جانە ازاماتتىق قارۋدى وتكىزۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى.
كەلىسىم قىزمەتتىك جانە ازاماتتىق قارۋدى وتكىزۋ مەن ونىڭ ىشكى ترانزيتىنە بايلانىستى قاتىناستاردى, سونداي-اق ەۋرازيالىق ەكونوميكالىق وداققا مۇشە مەملەكەتتەردىڭ قۇزىرەتتى ورگاندارى اراسىندا وسىنداي وتكىزۋ مەن ىشكى ءترانزيتتى مەملەكەتتىك باقىلاۋعا بايلانىستى ماسەلەلەر بويىنشا ءوزارا ءىس-قيمىل جاساۋدى رەتتەۋگە باعىتتالعان.
كەلىسىمدە قىزمەتتىك جانە ازاماتتىق قارۋدى وتكىزۋ مەن ونىڭ ىشكى ءترانزيتى كەزىندە جۇزەگە اسىرىلاتىن جاعدايلاردىڭ تىزبەسى رەتتەلگەن, ەۋرازيالىق ەكونوميكالىق كوميسسيا بەكىتەتىن نىسان بويىنشا بىرىڭعاي قۇجات نەگىزىندە مىندەتتى رۇقسات بەرۋ ءتارتىبى بەلگىلەنگەن.
كەلىسىمدى راتيفيكاتسيالاۋ وسى قارۋ ءتۇرىن ەاەو-عا قاتىسۋشى ەلدەردىڭ اۋماعىندا وتكىزۋدى وڭايلاتۋعا, ناقتى ايتقاندا قارۋدى اكەلۋ جانە اكەتۋ ءۇشىن رۇقسات بەرۋ قۇجاتتارىن بەرۋ مەرزىمىن قىسقارتۋعا مۇمكىندىك بەرەدى.
زاڭ جوباسى پالاتانىڭ قاراۋىنا جىبەرىلدى.