تاياۋدا قاراعاندىنىڭ «شالقىما» كونتسەرت زالىندا جىر مەن تەرمە ورىنداۋشىلارى اراسىندا قازىبەك ءبيدىڭ 350 جىلدىعىنا ارنالعان «وردالى ءسوزدىڭ يەسى – قازىبەك» اتتى سايىس ءوتتى. قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن وتكەن ءدۇبىرلى دودا ەكى كەزەڭمەن ءۇش كۇنگە جالعاستى. ءبىرىنشى كەزەڭدە قاتىسۋشىلار ءتۇرلى تەرمە مەكتەپتەرى وكىلدەرىنىڭ شىعارمالارىن ورىندادى. ەكىنشى كەزەڭدە ونەرپازدار قازاقتىڭ ەپوستىق داستاندارىن جىرلادى. سايىسقا قازاقستاننىڭ ءار وڭىرىنەن بارلىعى
16 تەرمەشى مەن جىرشى قاتىستى.
سايىس قورىتىندىسى بويىنشا بەس قاتىسۋشى العىس حاتپەن ماراپاتتالسا, قاراعاندىلىق مۇحتار ءادىلوۆ پەن نۇرمۇحامەد بايسۇگىروۆ «تەرمە» اتالىمىنداعى «ۇكىلى ءۇمىت» ارنايى جۇلدەسىن يەلەندى. «جىر» اتالىمىندا الماتىلىق دانيار راقىمباي ديپلومانت اتانسا, تەرمە بويىنشا ديپلومانت – ماناش ادىلباەۆ.
«جىر» اتالىمىندا ءىىى ورىندى قىزىلوردادان كەلگەن شولپان بەيىمبەتوۆا الدى, ءىى ورىن اقتوبەلىك پەرۋزا قالۋوۆاعا بۇيىردى, ال ءى ورىندى باتىس قازاقستان وبلىسىنان كەلگەن فارحات ورازوۆ يەلەندى. «تەرمە» اتالىمىندا ءىىى ورىندى استانادان كەلگەن اينۇر قونىسباەۆا يەلەندى.وسى اتالىم بويىنشا ءىى ورىندى الماتىلىق جۇلدىز ىسقاقوۆا السا, ءى ورىن استانالىق باقداۋلەت تولىبەك ۇلىنىڭ ەنشىسىنە بۇيىردى.
ال قىزىلوردالىق مايرا سارسەنباەۆا ۇزدىك ونەرىمەن ەرەكشەلەنىپ, قازىبەك بي اتىنداعى باس جۇلدەگە يە بولدى.
– بۇل سايىس ۇلتتىق ونەردى قايتا جاڭعىرتىپ, دامىتۋعا ارنالعان. حالقىمىزدىڭ مادەنيەتىن ساقتاۋعا جانە ونى ۇرپاقتان ۇرپاققا جەتكىزۋ ارقىلى ءداس- ءتۇرلى ونەرىمىزدىڭ ءتول تۋىندىلارىن ناسيحاتتايمىز. باياعى بۇقار, ۇمبەتەي, قازتۋعان, دوسپامبەت, اقتانبەردى, شالكيىز جىراۋلاردىڭ ءور رۋحتى جىرلارىنداعى ادامگەرشىلىك, وتانسۇيگىشتىك, ەرلىك, ۇيات ءبىزدىڭ قانىمىزدا ءالى بار. سوندىقتان قاتىسۋشىلار قازىبەك ءبيدىڭ جىرلارىنان باستاپ وعان دەيىنگى اقىنداردىڭ شىعارمالارىن ورىنداعان ۋاقىتتا ءبىزدىڭ عاسىرلاردان عاسىرلارعا جالعاسىپ كەلە جاتقان ماڭگىلىك ەلگە دەگەن مۇرات ويانادى, دەيدى قازىلار القاسىنىڭ توراعاسى, ايتىسكەر اقىن امانجول التاەۆ.
ميراس اسان, «ەگەمەن قازاقستان»
قاراعاندى
سۋرەتتە: ع.قۇرمانعاليەۆ اتىنداعى بقو فيلارمونياسىنىڭ ءداستۇرلى ءانشىسى فارحات ورازوۆ.