جاۋاپتى ويىن الدىنداعى ءىرى جەڭىس

«استانا» فۋتبول كلۋبىنىڭ الاڭعا شىقپاعانىنا ءتورت اپتا بولىپتى. سول ۋاقىت ارالىعىندا الا دوپتى ابدەن ساعىنعان بولسا كەرەك, «اتىراۋمەن» وتكەن ماتچتا ەلوردا كلۋبى جەتى بىردەي گول سوقتى. بۇل جەڭىستىڭ «قايراتپەن» اراداعى ۇپاي ايىرماشىلىعىن ساقتاپ قالعانى ءوز الدىنا, الداعى ۋاقىتتا «ۆيلياررەالمەن» بولاتىن ەۋروپا ليگاسىنىڭ توپتىق كەزەڭىندەگى جاۋاپتى ويىن قارساڭىنداعى كوڭىل كۇيگە دە يگى اسەرىن تيگىزەرى ايدان انىق. ەسكە سالساق, «ۆيلياررەال» – «استانا» ويىنى 14 قىركۇيەكتە يسپا­نيادا وتەدى.

ءوز الاڭىندا «قايساردى» قابىل­­داعان «قايراتتىڭ» قۇرامىنا جاراقاتىنان ايىققان اندرەي ارشاۆين قايتا ورالعان بولاتىن. رەسەيلىك سۇرمەرگەن 61-مينۋتتا ويىنشى الماستىرىپ شىققانىنا قاراماستان, گول سوعىپ كوزگە ءتۇستى. بۇل ويىندا «قايساردىڭ» الاڭ يەلەرىنە لايىقتى قارسىلىق كورسەتكەنىن ايتا كەتۋ كەرەك. بىراق شەشۋشى ساتتەرگە كەل­گەندە قىزىلوردالىق فۋت­بول­شىلارعا ساتتىلىك پەن شەبەر­لىك سەرىك بولماي جاتتى. ەسەسىنە, المات­ى­لىقتار وزدەرىنە بەرىلگەن مۇمكىندىكتەردى ۇتىمدى پايدالانىپ, تولىعىمەن ىسكە جاراتا ءبىلدى.

قولا جۇلدەدەن ءۇمىتتى «وردا­باسىنىڭ» ۇپايى تۇگەل. شىمكەنت­تىكتەر بۇل تۋردا «تارازدان» 1:0 ەسەبىمەن باسىم ءتۇسىپ, وزدەرىنىڭ باستى قارسىلاسى – «توبىلدان» ون ۇپايعا ۇزاپ كەتتى.

تۋرنير كەستەسىنىڭ تومەنگى جا­عىن­­داعى كوماندالار دا الامان ما­رەگە جاقىنداعان سايىن جانىن سا­لىپ ويناۋدا. بۇعان دەيىن كوش سوڭىن­د­ا كەلە جاتقان «اقتوبە» ءوز الا­ڭى­ندا «شاحتەردى» 2:0 ەسەبىمەن تىزە بۇكتىرىپ, ەكى ساتى جوعارىلادى. ال ورالدا «اقجايىقتان» ەكى گول ايىرماشىلىعىمەن وپىق جەگەن «وقجەتپەس» ابىروي اپەرمەس ەڭ سوڭعى ورىنعا ءتۇستى.

پرەمەر-ليگانىڭ 26-تۋرىندا مىناداي ناتيجەلەر تىركەلدى:

«استانا» – «اتىراۋ» – 7:0 (3:0), مۋجيكوۆ, 28 (1:0). مۋجيكوۆ, 38 (2:0). مۇرتازاەۆ, 44 (3:0). توماسوۆ, 60 (4:0). گراحوۆاتس, 69 (5:0). تۆۋماسي, 87 (6:0). توماسوۆ, 89 (7:0). «اقجايىق» – «وقجەتپەس» – 2:0 (2:0), دۋدچەنكو, 42 (1:0). گلاۆينا, 45+1 (2:0). «ەرتىس» – «توبىل» – 1:2 (0:1), ششەتكين, 41 (0:1). كۆەكۆەسكيري, 72 – ءوز قاقپاسىنا (1:1). كاسساي, 82 (1:2). «قايرات» – «قايسار» – 3:1 (2:1), يساەل, 14 (1:0). يسلامحان, 19 (2:0). كۋرور, 40 (2:1). ارشاۆين, 90+2 (3:1). «اقتوبە» – «شاحتەر» – 2:0 (0:0), ۆاليۋللين, 53 (1:0). وبرادوۆيچ, 81 (2:0). «ورداباسى» – «تاراز» – 1:0 (1:0), كوۆالچۋك, 41 (1:0).

چەمپيوناتتاعى 27-تۋر ويىن­دارى 16-17 قىركۇيەك كۇندەرى وتەدى:

16 قىركۇيەك: «ەر­تىس» – «اق­جا­يىق», «تو­بىل» – «ورداباسى», «تا­­راز» – «قايرات», «اتى­راۋ» – «اق­تو­بە», 17 قىر­كۇيەك: «قاي­سار» – «استانا», «شاحتەر» – «وقجەتپەس».

سۇرمەرگەندەر:

1. جەرار گوۋ («قايرات», 1) – 17;

2. جۋنيور كابانانگا («استانا», 1) – 15;

3. پاتريك تۆۋماسي («استانا») – 10.

قايرات ءابىلدا, «ەگەمەن قازاقستان»