ماينداعى فرانكفۋرتتا «Buchmesse –2011» دەگەن اتپەن وتكەن 63-ءشى حالىقارالىق كىتاپ ءجارمەڭكەسىنە 106 ەلدەن 7400 ادام قاتىسىپ, ايتۋلى شارانى 280 مىڭ ادام كەلىپ قىزىقتادى.
دۇنيە جۇزىندەگى رۋحاني بايلىققا دەگەن سۇيىسپەنشىلىكتىڭ ەڭ تانىمال وشاعى بولىپ ەسەپتەلەتىن فرانكفۋرت كىتاپ جارمەڭكەسىنىڭ اشىلۋ سالتاناتىندا گەرمانيا سىرتقى ىستەر مينيسترى گۋيدو ۆەستەرۆەللە ءسوز سويلەدى. ول اسا باعالى ءمادەني قۇندىلىقتارعا قۇرمەت كورسەتىلگەن ءجارمەڭكەگە ەۋروپا ەسىگى ءاماندا اشىق. مادەنيەتتەرى سان قىرلى بولىپ كەلەتىن ءوڭىر مۇنداي رۋحاني بايلانىستار ارقىلى ءوزىن كەمەلدەندىرە تۇسەرى حاق دەپ كەلۋشىلەرگە نەمىس وقىرماندارى اتىنان ايرىقشا ىقىلاس ءبىلدىردى. كورمە اشىلاردان از عانا كۇن بۇرىن ءداستۇر بويىنشا نەمىس ادەبيەتىنىڭ بيىلعى جەڭىمپازى جاريا ەتىلگەن. وسىناۋ ماراپاتقا شىعىس-گەرمان وتباسى تۋرالى رومان جازعان, رەسەيدە تۋعان, بىراق بۇگىندە گەرمانيادا تۇراتىن رەجيسسەر ءارى اۋدارماشى رۋگە ويگەن يە بولدى.
كىتاپ جارمەڭكەسىنىڭ اتىن الەمگە ايگىلەيتىن تاعى ءبىر ەرەكشە قىرى – وعان الەم ادەبيەتىنىڭ بەلگىلى وكىلدەرى كەلىپ قاتىسۋىندا دەسەك, ادەبيەت بويىنشا بىلتىر نوبەل سىيلىعىنا يە بولعان پەرۋلىك ماريو ۆارگاس لوسا, امەريكالىق جازۋشى, تاريحشى-فيلوسوف ۋمبەرتو ەكو سياقتى تانىمال تۇلعالار بيىلعى ءجارمەڭكەنىڭ بوياۋىن قانىقتىرا ءتۇستى. كىتاپ كورمەسىنىڭ ديرەكتورى يۋرگەن بوستىڭ بۇل جارمەڭكەنى باسقا جەردەگى ۇلگىلەرمەن سالىستىرعاندا وقىرماندارىنىڭ كوپتىگى جاعىنان ماقتانىش ەتەتىندەي ءجونى بار. بيىل يسلانديا ەلى ءجارمەڭكەنىڭ قۇرمەتتى قوناعىنا اينالدى. سوعان بايلانىستى نەمىس باسپاگەرلەرى 200 يسلاندىق اۆتوردىڭ ەڭبەگىن باسىپ شىعاردى. ءبىر جاعىن قاراڭعىلىقپەن, ال ەكىنشى بولىگى جارىقپەن ورنەكتەلگەن پاۆيلون ارقىلى بۇل ەلدىڭ گەوگرافيالىق ەرەكشەلىگى اسەرلى كورىنىس تاپقان.
فرانكفۋرت كىتاپ جارمەڭكەسىندە قازاقستاندىق باسپاگەرلەر دە ءوز ونىمدەرىن جۇرتشىلىققا كەڭىنەن پاش ەتىپ, اباي, مۇحتار اۋەزوۆ, تاحاۋي احتانوۆ, ءابدىجامىل نۇرپەيىسوۆ, ءابىش كەكىلباەۆ, گەرولد بەلگەر, ولجاس ءسۇلەيمەنوۆ سياقتى قازاق ادەبيەتىنىڭ كەشەگى الىپتارى مەن بۇگىنگى وكىلدەرىنىڭ شىعارمالارىن تاراتۋدا دا ايتارلىقتاي ۇلەس قوسىپ كەلەدى. مۇنىڭ اياسىندا جاڭا كىتاپتاردىڭ تۇساۋكەسەرىن وتكىزۋ داستۇرگە اينالا باستاعان. الەمدى جاقىنداستىرعان ادەبيەت كوشى ءوزىنىڭ وسىنداي سان ءتۇرلى ناقىشىمەن جان باۋرادى. الەكساندر توماس.
سۋرەتتەردە: فرانكفۋرت كىتاپ جارمەڭكەسىنەن.
سۋرەتتەردى تۇسىرگەن اۆتور.