قازاقستان جاستارى كونگرەسىنىڭ ۇندەۋى:
2017 جىل قازاقستان جاستارى ءۇشىن وتە ماڭىزدى جىل بولىپ تابىلادى. ويتكەنى بۇل جىل جاستاردى يگى ىستەرگە شابىتتاندىرعان وقيعالارعا مول بولدى, ولار – ەلباسىمىزدىڭ «رۋحاني جاڭعىرۋ» يدەياسى بويىنشا جولداۋى مەن ۇندەۋى, الەمدىك ۋنيۆەرسيادا-2017, قازاقستان تاريحىندا ءبىر جىل شيرەگىنە سوزىلعان العاشقى ءىس-شارا – «استانا ەكسپو-2017» حالىقارالىق مامانداندىرىلعان كورمەسى. اتالعان شارالاردىڭ بارلىعى قازاقستان جاستارىنىڭ وزدەرىنە دەگەن سەنىمىن بۇرىنعىدان دا ارتتىردى. ويتكەنى بۇل الەم دەڭگەيىندەگى جوبالاردى ىسكە اسىرۋعا كومەگىن تيگىزۋگە ەلىمىزدىڭ ءار تۇكپىرىنەن بارشا جالىندى جاستارى باس قوستى. قازاقستان جاستارى ولارعا جۇكتەلگەن جاۋاپكەرشىلىكتى ابىرويمەن بىرلەسە اتقارا الاتىنىن كورسەتتى. ەندىگى كەزەكتە, ءبىز جارقىن بولاشاعىمىزدى قامتاماسىز ەتەتىن ارەكەتتەر اياسىندا باس قوسۋعا دايىنبىز. سولاردىڭ ءبىرى – وسى ۇندەۋىمىز.
ءبىز, قازاقستان جاستارى, ۇلتتىق قۇندىلىقتار مەن تاريحىمىزدى دارىپتەيتىن, حالقىمىزدىڭ عاسىرلار بويى جالعاسىپ كەلە جاتقان ادامگەرشىلىك قاسيەتتەرىنە سۇيەنەتىن رۋحى بيىك ماڭگىلىك ەلدى قۇرۋ جولىندامىز. بۇل جولداعى باستى مىندەتىمىز – ۇلتتىق ناقىشىمىزدى ساقتاي وتىرا زاماناۋي تالاپتارعا ساي ءبىلىمدى جانە پروگرەسسيۆتى دامىعان ەل بولۋ.
ۇلتتىق قۇندىلىقتار ارقاشان انا تىلدەن باستاۋ الادى. سوندىقتان ءتىل ماسەلەسى جىلدار بويى وزەكتىلىك پوزيتسياسىن ساقتاپ كەلەدى.
ەلىمىزدىڭ جارقىن بولاشاعىن قۇرۋ جولىن جالعاستىراتىن ءبىز, قازاقستان جاستارى, لاتىن الىپبيىنە كوشۋ يدەياسىن قولدايتىنىمىز تۋرالى مالىمدەيمىز. سەبەبى, لاتىن ءالىپبيى قازاق دىبىستارىن ناقتىراق ايقىندايدى.
قازىرگى تاڭدا الەم ەلدەرىنىڭ باسىم بولىگى تەك قانا لاتىن گرافيكاسىن قولدانادى. ءتۇبىمىز ءبىر تۇركى ەلدەرىنىڭ دە كوبىسى دەرلىك لاتىن الىپبيىمەن وقىپ, ءبىلىم الادى. تۇركى تىلدەرىنىڭ ەرەكشەلىگىنە ساي دىبىستىق ۇقساستىقتار دا وسىنىڭ دالەلى.
لاتىن گرافيكاسىنا كوشۋدىڭ جاستارعا ىڭعايلى تاعى ءبىر سەبەبى – لاتىن ارىپتەرىنىڭ پراگماتيكالىق ىڭعايلى بولۋى. الەمدەگى يننوۆاتسيالىق جاڭاشىلدىقتاردىڭ بارلىعى ەڭ الدىمەن لاتىن گرافيكاسىندا شىعادى. ءبىراز ۋاقىت وتكەن سوڭ عانا, كيريلل الىپبيىنە كوشىرىلەدى.
لاتىن الىپبيىنە اۋىسۋ قادامى بىزگە ۇزاق مەرزىمدى كەلەشەكتە ەكونوميكالىق پايدا اكەلىپ قانا قويماي, لاتىندانعان ءونىمدى كيريلليتساعا اۋدارۋعا جۇمسايتىن ۋاقىتىمىزدى ۇنەمدەۋگە مۇمكىندىك بەرەدى دەپ ويلايمىز.
رەسپۋبليكامىزدىڭ جاستارى مەن جاستار ۇيىمدارىنىڭ كونگرەسى اتىنان, قازاقستان جاستارى الەمگە مىقتى ءارى جاۋاپكەرشىلىگى جوعارى ءبىرتۇتاس ۇلتتى كورسەتۋگە دايىن ەكەنىن مالىمدەي وتىرا, قازاق ءتىلىنىڭ لاتىن الىپبيىنە اۋىسۋىن ءبىراۋىزدان قولدايدى!
ايدىن ءسابيتوۆ, «قازاقستان جاستارىنىڭ كونگرەسى» زاڭدى تۇلعالار قاۋىمداستىعى بىرلەستىگىنىڭ اتقارۋشى ديرەكتورى; دانيار سۇندەتباەۆ, «نۇر وتان» پارتياسى «جاس وتان» جاستار قاناتىنىڭ توراعاسى; تالعات قاليەۆ, «جاستار» عىلىمي-زەرتتەۋ ورتالىعى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى; ازامات بوجاقوۆ, «قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» قوعامدىق بىرلەستىگىنىڭ اتقارۋشى ديرەكتورى; گاريفۋللا مىرزاعاليەۆ, «قازاقستان كۆن وداعى» رەسپۋبليكالىق جاستار قوعامدىق بىرلەستىگىنىڭ جوبا مەنەدجەرى; دينارا سادۆاكاسوۆا, «بىرىڭعاي «جاس ۇلان» بالالار مەن جاسوسپىرىمدەر ۇيىمى» رەسپۋبليكالىق قوعامدىق بىرلەستىگى ءتورايىمى; توحتار بولىسوۆ, «جاسىل ەل» جاستار ەڭبەك جاساقتارىنىڭ رەسپۋبليكالىق شتابىنىڭ جەتەكشىسى; تاتيانا ميرونيۋك, «ۇلتتىق ەرىكتىلەر جەلىسى» زتب اتقارۋشى ديرەكتورى; يلدار كاتەنوۆ, قازاقستاننىڭ سكاۋت قوزعالىسىنىڭ پرەزيدەنتى; ولجاس ابۋوۆ, «قازاقستان-2050» جالپىۇلتتىق قوزعالىسىنىڭ اتقارۋشى ديرەكتورى