اۋىلداعى تۇرمىس-تىرشىلىكتى جاقسارتۋ ارقىلى وبلىستىڭ دەڭگەيىن كوتەرەمىز. اكىمدىكتىڭ كەزەكتى سەلەكتورلىق جيىنىندا كوتەرىلگەن وزەكتى ماسەلەلەردىڭ ءبىرى دە وسى بولدى.
جيىندا ءسوز العان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى م.وتارشيەۆ وبلىستا وسى جىلى 53,7 مىڭ جاڭا جۇمىس ورىندارى اشىلىپ, ونىڭ ىشىندە تۇراقتى جۇمىس ورىندارى 38413 ورىن ەكەنىن اتاپ ءوتتى.
ونىڭ ايتۋىنشا, ماماندار تاپشىلىعىن رەتتەۋ ماقساتىندا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسىنىڭ ءبىرىنشى باعىتى شەڭبەرىندە وڭىردە 4 584 ادام تەحنيكالىق جانە كاسىپتىك ءبىلىم الىپ جاتسا, قىسقا مەرزىمدى كاسىپتىك وقۋعا 9682 ادام 89 ماماندىق بويىنشا جولداندى.
بايانداماشىنى تىڭداعان اكىم باسقارما باسشىسىنا 15 ماماندىق بويىنشا قاجەتتىلىگىنە ساي, اۋىل تۇرعىندارىن وقىتىپ, كاسىپكە بەيىمدەۋدى ايتتى. الدىمەن, اۋىلدىق وكرۋگ دەڭگەيىندە اتقارىلاتىن جۇمىستار, ودان سوڭ اۋداندىق دارەجەدە جۇزەگە اسىرىلۋى ءتيىس دەدى.
«اتالعان 15 ماماندىق بويىنشا, ياعني, توكار, تەمىر ۇستاسى, اعاش ۇستاسى, ەلەكترشى, سانتەحنيك, شاشتاراز سىندى ماماندىقتارعا بەيىم ازاماتتاردى اۋىل اكىمدەرى تاۋىپ بەرۋى كەرەك. بۇل جوبا ناقتى جۇزەگە اسقاندا ازاماتتار جۇمىسپەن قامتىلىپ, اۋىلداعى ءومىر ءسۇرۋ جاعدايى قالا وركەنيەتىنە بەيىمدەلەر ەدى. وسىلايشا, اۋىلداعى تۇرمىس-تىرشىلىكتى جاقسارتۋ ارقىلى وبلىستىڭ دەڭگەيىن كوتەرەتىن بولامىز»,-دەدى ج.تۇيمەباەۆ.
اۋىل تۇرعىندارىنىڭ كاسىبي ماماندانۋىنان بولەك, تۇرعىنداردىڭ سالاۋاتتى ءومىر سالتىن قالىپتاستىرۋ جايىندا نازاردان تىس قالدىرماعان ايماق باسشىسى ءاربىر اۋدان ورتالىعى مەن اۋىلدىق وكرۋگتەردە انگار ءتيپتى سپورت الاڭشالارىن سالۋ قاجەتتىگىن ايتتى. سونداي-اق, ول ءمودۋلدى سپورت كەشەندەرىنىڭ قۇرىلىس جۇمىستارى ەلباسىنىڭ «بولاشاققا باعدار:رۋحاني جاڭعىرۋ» باعدارلامالىق ماقالاسىندا ايتىلعان «تۋعان جەرگە تاعزىم» اياسىندا ەل ازاماتتارىن شاقىرۋ ارقىلى جۇرگىزۋ كەرەكتىگىن ەسكە سالدى.
جالپى وڭتۇستىك قازاقستان وبلىسىندا بۇقارالىق سپورتتى دامىتۋ ماقساتىندا ايماقتاعى ەلدى مەكەندەر مەن كوپ قاباتتى ۇيلەردىڭ اۋلالارىندا جىل باسىنان بەرى 57 سپورت الاڭشالارى پايدالانۋعا بەرىلسە, ونىڭ 20-ى دەمەۋشىلەر ەسەبىنەن سالىنعان.