234 قىزىلوردالىق وتباسى كوپپاتەرلى تۇرعىن ۇيدەن باسپانالارىنىڭ كىلتتەرىن الدى, ولاردى قىزىلوردا وبلىسىنىڭ اكىمى قىرىمبەك كوشەرباەۆ جاڭا قونىستارىمەن قۇتتىقتادى.
ايماق باسشىسى جاڭا پاتەرگە قول جەتكىزگەن تۇرعىنداردى قۇتتىقتاي وتىرىپ, شاڭىراقتارىنا قۇت-بەرەكە تىلەدى.
"قالا كۇنى قارساڭىندا جاڭا مولتەك اۋداننان كەزەكتى كوپقاباتتى تۇرعىن ۇيلەردى پايدالانۋعا بەرىپ وتىرمىز. جاڭا شاعىن اۋدانعا ءالى ات بەرىلگەن جوق, دەگەنمەن بۇل جەردە 25 تۇرعىن ءۇي بوي كوتەردى, جاقىن ارادا مەكتەپ پەن بالاباقشانىڭ قۇرىلىسى باستالادى. قالا ءۇشىن بيىلعى جىلدىڭ باستى جاڭالىعى - سىرداريا وزەنىنىڭ سول جاق جاعالاۋىنداعى جاڭا قالا قۇرىلىسىنىڭ باستالۋى. بۇگىندە سول جاعالاۋدا 18 كوپقاباتتى تۇرعىن ۇيلەردىڭ,320 ورىندىق بالاباقشانىڭ, جاستار ورتالىعىنىڭ, "بولاشاق" ۋنيۆەرسيتەتى كامپۋسىنىڭ, قازاق ورتالىق اتقارۋ كوميتەتىنىڭ بۇرىنعى عيماراتىنىڭ سىزباسى نەگىزىندە ايماقتىڭ رۋحاني جاڭعىرۋ ورتالىعىنىڭ قۇرىلىستارى قارقىندى جۇرۋدە. 1925 جىلى قىزىلوردا استانا بولىپ تۇرعان شاقتا وسى عيماراتتا تاريحي شەشىم قابىلدانىپ, ۇلتىمىز "قازاق" دەپ اتالعان. قۇرىلىستىڭ قارقىنى جاعىنان ءبىز استانادان كەيىنگى ورىندامىز, الماتىمەن دەڭگەيلەس, ال رەسپۋبليكا بويىنشا الدىڭعى بەستىككە كىرەمىز. وتكەن جىلى الماتى قالاسىندا مەملەكەتتىك باعدارلامامەن 63 كوپقاباتتى ءۇي سالىنسا, قىزىلوردادا 80 ءۇي سالىندى. وسىنىڭ بارلىعى قۇرىش قولدى قۇرىلىسشىلاردىڭ ەڭبەگى, حالقىمىزدىڭ اۋىزبىرشىلىگى مەن ىنتىماعى, ەلباسىنىڭ سارابدال ساياساتىنىڭ ارقاسىندا مۇمكىن بولىپ وتىر,"-دەپ اتاپ ءوتتى جاڭا قونىس يەلەرىن قۇتتىقتاعان وبلىس اكىمى قىرىمبەك كوشەرباەۆ.
باسپانالى بولعان تۇرعىنداردى ەڭبەك ارداگەرى, قىزىلوردا قالاسىنىڭ قۇرمەتتى ازاماتى جەتكەرگەن ورازباەۆ تا قۇتتىقتاپ, باتاسىن بەردى.
ال, ءوز كەزەگىندە قالالىق №3 ەمحانانىڭ دارىگەرى, پاتەر كىلتىن العان دانا ەسەتوۆا تۇرعىندار اتىنان العىسىن جەتكىزدى.
«بۇل كۇندەرى قىزىلوردادا قۇرىلىس قارقىنى وتە جوعارى, سونىڭ ىشىندە تۇرعىن ءۇي قۇرىلىسى. ءبىزدىڭ ەلدە «نۇرلى جول» سىندى مەملەكەتتىك باعدارلامانىڭ بارىنا وتباسىمىز قۋانىشتى. وسى تۇستا, حالىق مۇددەسى ءۇشىن ايانباي تەر توگىپ, وسىنداي باعدارلاما جاساپ قابىلداعان مەملەكەت باسشىسىنا جانە ونى تابىستى ىسكە اسىرعان وبلىس اكىمىنە ايتار العىسىمىز شەكسىز»,-دەدى دانا ەسەتوۆا.
ايتا كەتۋ كەرەك, وبلىس ورتالىعىندا سوڭعى 4 جىلدا 11جاڭا مولتەك اۋدان بوي كوتەرىپ, 7 مىڭنان استام تۇرعىن باسپانالى بولدى. ايماقتاعى قۇرىلىس كولەمى -3,5 ەسەگە, وبلىس ورتالىعىندا قۇرىلىس - 8 ەسەگە ۇلعايدى. جىل باسىنان بەرى 61 كوپقاباتتى تۇرعىن ۇيلەردىڭ قۇرىلىس جۇمىستارى جۇرۋدە, بۇگىنگى كۇنى ولاردىڭ 23-ءى پايدالانۋعا بەرىلدى. قالعان 38-ءى جىل سوڭىنا دەيىن ەل يگىلىگىنە بەرىلەدى دەپ جوسپارلانعان.