بۇگىن پارلامەنت سەناتىنىڭ سپيكەرى قاسىم-جومارت توقاەۆتىڭ توراعالىق ەتۋىمەن پالاتانىڭ بيۋرو وتىرىسى ءوتتى. وندا وسى سەسسياداعى زاڭ شىعارۋ جۇمىستارى جونىندەگى مىندەتتەرى العا قويىلىپ, ماجىلىستەن تۇسكەن زاڭ جوبالارى ءبولىنىپ بەرىلدى, دەپ حابارلايدى سەناتتىڭ ءباسپاسوز قىزمەتى.
مەملەكەت باسشىسىنىڭ پارلامەنتتىك سەسسيانىڭ اشىلۋىندا العا قويعان مىندەتتەرىنە سايكەس دەپۋتاتتار الداعى ۋاقىتتا ۇشجىلدىق رەسپۋبليكالىق بيۋدجەتتى قارايتىن بولادى. بۇدان بولەك, سالىق كودەكسى مەن كەدەن زاڭدارىن جەتىلدىرۋ, ۇلتتىق بانكىنىڭ ەكىنشى دەڭگەيلى بانكتەرگە قاتىستى باقىلاۋ وكىلەتتىكتەرىن كۇشەيتۋ, ساقتاندىرۋ جۇيەسىن دامىتۋ, ءدارى-دارمەك اينالىمىن رەتتەۋ, مەملەكەت مۇددەلەرى مەن اقپارات قاۋىپسىزدىگىن قورعاۋ جانە قۇقىق قورعاۋ ورگاندارىن رەفورمالاۋ ماسەلەلەرىن تالقىلايتىن بولادى.
ء«بىزدىڭ بارلىق جوسپارلى جۇمىستارىمىز پرەزيدەنت ايقىنداعان زاڭداردى الدىن الا مۇقيات پىسىقتاۋعا باعىتتالۋى كەرەك», - دەدى وتىرىستا سەنات سپيكەرى ق.توقاەۆ.
بيۋرو قابىلداعان شەشىم بويىنشا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى «قازاقستان رەسپۋبليكاسى مەن سەربيا رەسپۋبليكاسى اراسىنداعى قىلمىستىق ىستەر بويىنشا قۇقىقتىق كومەك تۋرالى شارتتى راتيفيكاتسيالاۋ تۋرالى», «قازاقستان رەسپۋبليكاسى مەن سەربيا رەسپۋبليكاسى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى», «قازاقستان رەسپۋبليكاسى مەن سەربيا رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوبالارى بويىنشا باس كوميتەت بولىپ بەلگىلەندى.
بۇدان بولەك بيۋرو مۇشەلەرى «ورتا ءبىلىم بەرۋ جۇيەسىنىڭ جاي-كۇيى, پروبلەمالارى جانە زاڭنامالىق رەتتەۋ پەرسپەكتيۆالارى» تاقىرىبىنا ارنالعان پارلامەنتتىك تىڭداۋ وتكىزۋگە ازىرلىكتى تالقىلادى. سەناتتىڭ الەۋمەتتىك-مادەني دامۋ جانە عىلىم كوميتەتى ۇيىمداستىراتىن شارانى 22 قىركۇيەكتە وتكىزۋ جوسپارلاندى. بيۋرودا سەناتورلاردى حالىقارالىق پارلامەنتتىك ۇيىمدارعا جانە شەت مەملەكەتتەر پارلامەنتتەرىمەن ىنتىماقتاستىق توپتارىنا جىبەرۋ, سونداي-اق سەناتتىڭ 2017 جىلعا ارنالعان نەگىزگى شارالار جوسپارىنا وزگەرىستەر ەنگىزۋ تۋرالى ماسەلەلەر قارالدى.