ەكسپو-2017 كورمەسىنىڭ ۇزدىك ەرىكتىلەرى ماراپاتتالدى

ايتۋلى كەشتە جۇزدەن استام بەلسەندى ۆولونتەرلار ءارتۇرلى ساناتتار بويىنشا ماراپاتتالدى. ولارعا «استانا ەكسپو-2017» ۇق» اق باسقارما توراعاسى احمەتجان ەسىموۆ جانە ءبىلىم جانە عىلىم ءمينيسترى ەرلان ساعاديەۆ سەرتيفيكاتتار مەن ەستەلىك سىيلىقتار تابىس ەتتى. ءوز سوزىندە احمەتجان ەسىموۆ ەكسپو-2017 ەرىكتىلەرىنىڭ ءوز مىندەتتەرىن جوعارى دەڭگەيدە ورىنداعانىن اتاپ ءوتتى.

«ۆولونتەرلىك قىزمەت كورمەنى تابىستى وتكىزۋدىڭ ماڭىزدى فاكتورىنا اينالدى. ەكسپو-2017 اياسىندا 8,5 مىڭ ادام ىرىكتەلىپ الىندى. ونىڭ 5,5 مىڭى كورمە اۋماعىندا جۇمىس ىستەۋ مۇمكىندىگىنە يە بولدى. ولاردىڭ 2500-دەن استامى - استانا قالاسىنان, 900 - الماتىدان جانە 1600 ۆولونتەر - وزگە ايماقتاردان جينالدى. سونداي-اق, رەسەي, قىتاي, اقش, بەلگيا, يتاليا, پولشا, موڭعوليا, قىرعىزستان جانە وزگە مەملەكەتتەردەن كەلگەن 150 شەتەلدىك ۆولونتەر كورمەگە ءوز ۇلەستەرىن قوستى. ەرىكتىلەردىڭ ورتاشا جاسى - 19, ال ەڭ ۇلكەن ۆولونتەردىڭ جاسى 70-تە. ءدال وسىنداي 30  «التىن ەرىكتىلەر» جۇمىس ىستەدى. كورمەدەگى جۇمىستارى بارىسىندا كوڭىلدەرى جاراسقان 3 جۇپ شاڭىراق كوتەردى», - دەدى احمەتجان ەسىموۆ.

ماراپاتتاۋ ءراسىمى ءالي وقاپوۆ, الماس كىشكەنباەۆ سىندى ەسترادا جۇلدىزدارى مەن ۆولونتەرلاردىڭ كونتسەرتتىك باعدارلاماسىنا ۇلاستى. جاز بويى قازاقستاننىڭ 16 وبلىسىنان جانە الەمنىڭ 35 ەلىنەن كەلگەن ۆولونتەرلار كۇنىنە 8 ساعاتتان ءۇش اۋىسىممەن كورمە قوناقتارىنا قىزمەت ەتتى.