بۇگىن يسلام رەسپۋبليكاسى اقپارات اگەنتتىگى (يرنا) مەن «قازاقپارات» حالىقارالىق اگەنتتىگى ءوزارا تۇسىنىستىك تۋرالى مەموراندۋمعا قول قويدى.
قول قويۋ ءراسىمى بارىسىندا يسلام رەسپۋبليكاسى اقپارات اگەنتتىگى باسقارۋشى ديرەكتورى مۇحامماد حودادي اتالمىش كەلىسىم ەكى ەل اراسىنداعى اقپارات الماسۋ سالاسىنداعى كاسىبي ىنتىماقتاستىقتى نىعايتۋدى, دوستىق قارىم قاتىناستار مەن بۇقارالىق اقپارات قۇرالدارى سالاسىنداعى جەمىستى جۇمىس ەتۋدى قاراستىرادى دەپ اتاپ ءوتتى.
ءوز كەزەگىندە ءسوز العان «قازاقپارات» حالىقارالىق اقپارات اگەنتتىگىنىڭ باس ديرەكتورى اسقار وماروۆ بۇعان دەيىن 22 حالىقارالىق اگەنتتىكتەرمەن مەموراندۋمدارعا قول قويىلعانىن تىلگە تيەك ەتتى.
«وسى جىلى ءبىزدىڭ اقپاراتتىق اگەنتتىك قىتاي, گەرمانيا, تۇركىمەنستان سياقتى ەلدەرمەن 5 مەموراندۋمعا قول قويدى», دەدى.
راۋان قايدار, «ەگەمەن قازاقستان»