پاۆلودار قالاسىندا بارلىق جالپى ورتا ءبىلىم بەرۋ مەكتەپتەرىنىڭ 1-11 سىنىپتارى بەس كۇندىك وقۋ رەجيمىنە كوشەدى, دەپ حابارلايدى قالالىق ءبىلىم بەرۋ ءبولىمى.
قر بعم التىنسارين اتىنداعى اكادەميانىڭ «2017-2018 وقۋ جىلىندا قازاقستان رەسپۋبليكاسىنىڭ جالپى ورتا ءبىلىم بەرەتىن ۇيىمدارىندا وقۋ پروتسەسىن ۇيىمداستىرۋدىڭ ەرەكشەلىكتەرى تۋرالى» ادىستەمەلىك نۇسقاۋ حاتى نەگىزىندە 2017-2018 وقۋ جىلىندا بارلىق 1-11 سىنىپتارعا بەس كۇندىك وقۋ اپتاسىنا اۋىسۋعا رۇقسات بەرىلەدى. بەس كۇندىك وقۋ اپتاسى تۋرالى شەشىمدى ءار مەكتەپتىڭ اكىمشىلىگى قابىلدايدى جانە ونى قامقورشىلىق كەڭەسىمەن نەمەسە اتا-انالار كوميتەتىمەن كەلىسەدى.
كۇندەلىكتى وقۋ جۇكتەمەلىگىن ءار مەكتەپ, مەكتەپتىڭ مۇمكىندىكتەرى مەن جاعدايلارىن نەگىزگە الا وتىرىپ, ساباق كەستەسىن قامقورلىق كەڭەسىمەن نەمەسە اتا-انالار كوميتەتىمەن كەلىسىپ وزدىگىنەن انىقتايدى. بۇل رەتتە, بەس كۇندىك رەجيمدە وقۋ مەكتەپتىڭ وقۋ جۇمىس جوسپارىنىڭ ينۆاريانتتىق (مىندەتتى) بولىگى بويىنشا جۇزەگە اسىرىلادى.
ۆارياتيۆتىك دامىتۋ سەنبى كۇنى جۇزەگە اسىرىلادى (ۇيىرمەلەر, فاكۋلتاتيۆتەر, تاڭداۋ بويىنشا پاندەر). ء«بىلىم بەرۋ وبەكتىلەرىنە قويىلاتىن سانيتاريالىق-ەپيدەميولوگيالىق تالاپتار» سانيتاريالىق قاعيدالارىنا وزگەرىستەر ەنگىزىلدى. جاڭا سانيتارلىق قاعيدالار بارلىق جالپى ورتا ءبىلىم بەرۋ مەكتەپتەرىنە 1-11 سىنىپتاردا بەس كۇندىك وقۋ جۇيەسىن ەنگىزۋگە مۇمكىندىك بەرەدى. 2017-2018 وقۋ جىلىندا ساباقتىڭ ۇزاقتىعى 40 مينۋتتى قۇرايدى. ساباقتى بەس مينۋتقا قىسقارتۋ جۇكتەمەلىكتى ايتارلىقتاي ۇلعايتپاي, قوسىمشا ساباقتى قوسۋعا مۇمكىندىك بەرەدى.
2017 جىلعى 24 ساۋىردە قر ءبىلىم جانە عىلىم ءمينيسترى № 182 بۇيرىعىمەن «قازاقستان رەسپۋبليكاسىنىڭ ورتا ءبىلىم بەرۋ مەكەمەلەرىندە ءۇي تاپسىرماسىن ۇيىمداستىرۋ جانە ورىنداۋ جونىندەگى ادىستەمەلىك نۇسقاۋلىقتارى» بەكىتىلدى. ءۇي تاپسىرماسىن ورىنداۋ: 2-سىنىپتا – 50 مينۋتتان, 3-4 سىنىپتاردا – 70 مينۋتتان, 5-6 سىنىپتاردا – 90 مينۋتتان, 7-9 سىنىپتاردا – 110 مينۋتتان, 10-11 سىنىپتاردا – 130 مينۋتتان اسپاۋى ءتيىس. وسى ۇسىنىمداماعا سايكەس ءۇي تاپسىرماسىن دايىنداۋ ۋاقىتىن قىسقارتۋ ءۇشىن 5-11-سىنىپتاردا قوسارلانعان ساباقتار وتكىزۋگە بولادى. قوسارلانعان ساباقتاردى قانداي وقۋ ءپانى ارقىلى جۇرگىزۋدى ءار مەكتەپتىڭ اكىمشىلىگى وزدەرى انىقتايدى.
كوركەم ادەبيەتتى وقۋدى, جوبالى جۇمىستاردى ورىنداۋدى, ماتەماتيكانى تەرەڭدەتىن وقۋ ءۇشىن ەسەپتەردى شەشۋدى, ءبىرىنشى سىنىپ وقۋشىلارىنا ەكىنشى جارتى جىلدىقتان باستاپ وقۋدى قوسپاعاندا مەرەكە جانە دەمالىس كۇندەرىنە ءۇي تاپسىرماسى بەرىلمەيدى. ءار ءپاندى وقۋعا بولىنگەن وقۋ باعدارلامالارى جانە ساعاتتار سانى وزگەرمەيدى, بىراق 40-مينۋتتىق ساباق ارقاسىندا 30 مينۋت بوساتىلادى. ياعني, قوسىمشا ساباق قويىلعان كەزدە, وقۋشىنىڭ مەكتەپتە بولۋ ۋاقىتى بار بولعانى 10 مينۋتقا ارتادى. ۇلگىلىك وقۋ جوسپارىنا كەلىسىلدى ەڭ جوعارى وقۋ جۇكتەمەلىگىنىڭ نورماسى جالپى ورتا ءبىلىم بەرۋ مەكتەپتەرىنىڭ 1-11 سىنىپتارىندا 24-39 ساعاتتى قۇرايدى. مىسالى, ەكىنشى اۋىسىم وقۋشىلارىنىڭ ساباقتارى ساعات 14.10-دا باستالادى. 3-4 سىنىپ وقۋشىلارىنىڭ ەڭ جوعارى جۇكتەمەلىگى 29 ساعاتتى قۇرايدى (4 كۇن 6 ساباقتان, ءبىر كۇن بەس ساباق).
ەڭ جوعارى جۇكتەمە كۇنى ەكىنشى اۋىسىمنىڭ 3-4 سىنىپ وقۋشىلارىندا ساباقتار ساعات 18.55-تە اياقتالادى. وقۋشىلاردىڭ ەڭ جوعارى وقۋ جۇكتەمەلىگى قر بعم وقۋ جوسپارى نەگىزىندە جاساپ شىعارىلعان, مەكتەپتىڭ جۇمىس جوسپارىمەن انىقتالادى. بەس كۇندىك وقۋ اپتاسى رەجيمىندە ساعاتتار سانى 1-2 سىنىپتاردا 4-5 ساباقتان, 3-4 سىنىپتاردا 5-6 ساباقتان, 5-7 سىنىپتاردا 6-7 ساباقتان, 8-11 سىنىپتاردا 7-8 ساباقتان بولادى.