ەكسپو-2017 حالىقارالىق مامانداندىرىلعان كورمەسى اياسىندا گوندۋراس رەسپۋبليكاسىنىڭ ۇلتتىق كۇنى ءوتتى. بۇل مەملەكەت تىنىق جانە اتلانت مۇحيتتارى ارالىعىنداعى جولدى جاقسارتا وتىرىپ, اۋە جانە جۇك تاسىمالىمەن, بىلىكتى ماماندارىمەن ورتالىق امەريكادا لوگيستيكا الاڭىنا اينالۋدا.
مەرەكەنىڭ رەسمي بولىگىندە گوندۋراس سىرتقى ىستەر جانە حالىقارالىق ىنتىماقتاستىق ءمينيسترى دولورەس اگۋەرو لارا ماريا ءسوز سويلەپ, ەلىندە جانعىش ەنەرگيانى قولدانۋدى ازايتۋ ماسەلەلەرىن شەشۋدە ۇلكەن جۇمىس اتقارىلىپ جاتقانىن əڭگىمەلەدى. ياعني, گوندۋراس تۇتانبالى وتىندى جاڭعىرمالى ەنەرگيا كوزدەرىنە الماستىرۋدا. ونىڭ ايتۋىنشا, «بولاشاقتىڭ ەنەرگياسى» اتتى كورمە تاقىرىبى جاھاندىق جىلىنۋ جانە كليماتتىق وزگەرىس ورىن العان زاماندا ەلەۋلى ماسەلەلەردىڭ قاتارىنا كىرەدى.
«1992 جىلى ريوداعى جەر سامميتىنەن باستاپ كليماتتىق وزگەرىس بويىنشا حالىقارالىق شارالار قولدانىلۋدا. 2015 جىلى پاريجدە وتكەن كليمات وزگەرىسى جونىندەگى كونفەرەنتسيادا ادامزاتتىڭ اتموسفەراعا پارنيكتىك گازداردىڭ شىعارىلىمىن تۇراقتاندىرۋ قاجەتتىلىگى اتاپ ءوتىلدى. مەملەكەتىمىزدە پارنيكتىك گاز شىعارىلىمىنىڭ ۇلەسى از, الايدا 1996-2015 جىلدار ارالىعىندا كليماتتىق وزگەرىستەردىڭ جاھاندىق قاۋىپتەرى كورسەتكىشى بويىنشا ەلىمىز الەم بويىنشا وسال مەملەكەتتەردىڭ قاتارىندا بولدى. بۇگىن بارشامىز – ۇلتتار مەن مەملەكەتتەر ءبىر-بىرىمىزگە تاۋەلدىلىگىمىزدى تۇسىنە وتىرىپ, ءوزىمىزدى جانە بولاشاق ۇرپاقتى جارقىن الەممەن قامتاماسىز ەتۋ ءۇشىن ءوزارا ءتيىمدى ارەكەتتەسۋىمىز قاجەت», دەدى دولورەس اگۋەرو لارا ماريا. قازاقستان تاراپىنان ءسوز العان دەنساۋلىق ساقتاۋ ءمينيسترىنىڭ ورىنباسارى الەكسەي تسوي ەكسپو-2017 كورمەسى ەكىجاقتى قاتىناستىڭ نىعايۋىنا مۇمكىندىك بەرەتىندىگىن اتاپ ءوتتى.
«قازاقستان ساياسي, ەكونوميكالىق, عىلىمي-تەحنيكالىق جانە مادەني سالالاردا, سونداي-اق دەنساۋلىق ساقتاۋ, اتاپ ايتقاندا, مەديتسينالىق ساقتاندىرۋ جانە تۋريزم سالالارىندا ىنتىماقتاستىقتى نىعايتۋعا مۇددەلى. قازاقستان جانە گوندۋراس اراسىنداعى ديپلوماتيالىق قارىم-قاتىناس 1995 جىلى 28 قاراشادان باستاپ ورنادى. گوندۋراستىڭ ەكسپو-2017 كورمەسىنە قاتىسۋى ەلدەرىمىز اراسىنداعى ەكىجاقتى ءوزارا ءتيىمدى ىنتىماقتاستىقتى نىعايتۋعا مۇمكىندىك بەرەتىنىنە كامىل سەنەمىن», دەدى ۆيتسە-مينيستر.
گوندۋراس – كۇن ەنەرگەتيكاسىنىڭ ۇلەسى بويىنشا الەمدەگى جەتەكشى ەل. «ەNEE» ەنەرگەتيكالىق كومپانياسىنىڭ ستاتيستيكالىق مالىمەتتەرى بويىنشا 2016 جىلى بۇل ەلدە ەلەكتر ەنەرگياسىنىڭ 10,2 پايىزى فوتوەلەكترلى كۇن ەلەكتر ستانسالارىندا وندىرىلگەن. بۇل – دۇنيە ءجۇزى بويىنشا رەكوردتىق كورسەتكىش.
اسحات رايقۇل,
"ەگەمەن قازاقستان"
سۋرەتتى تۇسىرگەن ەرلان ومار,
"ەگەمەن قازاقستان"