قازاقستان رەسپۋبليكاسىنىڭ تۇڭعىش پرەزيدەنتى-ەلباسى كىتاپحاناسى مۋزەيىنىڭ عيماراتىندا «قاسيەتتى قۇران كىتاپتارى» اتتى كورمە اشىلدى. ونىڭ اياسىندا كورەرمەندەرگە كىتاپحانا قورىنىڭ بىرەگەي جيناعىنداعى قۇراننىڭ اراب تىلىندەگى, سونداي-اق قازاق, ورىس, اعىلشىن ءتىلدى نۇسقالارىنىڭ 55 داناسى ۇسىنىلادى.
اتالمىش كورمەنىڭ باستى ەرەكشەلىگى – كىتاپحانا قورىنداعى سيرەك كەزدەسەتىن كىتاپتاردىڭ, XVIII-XIX عع. جازىلعان تۇپنۇسقا قولجازبالاردىڭ كورسەتىلۋىندە.
ولاردىڭ كوبىسى ەلباسىمىز ن.ءا.نازارباەۆقا وزگە مەملەكەت وكىلدەرىنەن ديپلوماتيالىق سىي رەتىندە تارتۋ ەتىلگەن. ءار كىتاپ مۇقاباسىنىڭ سىرتقى كەلبەتى كوركەمدىك, زەرگەرلىك جانە كالليگرافيالىق شەبەرلىكپەن ەرەكشەلەنەدى.
اشىق عارىشتا, «مير» حالىقارالىق عارىش بەكەتىندە بولعان قۇران باسىلىمى توپتاماداعى ەرەكشە جادىگەرلەردىڭ ءبىرى. ونى مەملەكەت باسشىسىنا عارىشكەر تالعات مۇساباەۆ سىيعا تارتقان.
«ەگەمەن-اقپارات»