الماتى قالاسىنداعى «كوكتەم-3» شاعىن اۋدانىندا كورنەكتى اقىن كەڭشىلىك مىرزابەكوۆ تۇرعان ۇيگە ەسكەرتكىش تاقتا قويىلدى.
ءتۇرلى سەبەپتەرمەن ورىندالماي كەلە جاتقان يگىلىكتى ءىستىڭ جۇزەگە اسۋىن قالا اكىمى باۋىرجان بايبەك قاداعالاپتى. تاقتانىڭ اشىلۋ قۇرمەتىنە وراي ۇيىمداستىرىلعان جيىندى قالالىق ءتىل باسقارماسىنىڭ باسشىسى ماماي احەت باسقاردى. جيىندا اقىننىڭ جارى زينۋرا, ۇلى, بەلگىلى ادەبيەت سىنشىسى امانگەلدى كەڭشىلىك ۇلى, دوستارى نۇرلان ورازالين, تەمىرحان مەدەتبەك, يران-عايىپ, سەرىك تۇرعىنبەك ۇلى, قالامداس اعا-ىنىلەرى قۋانىشباي قۇرمانعالي, امانحان ءالىم ۇلى, عالىم جايلىباي جانە تاعى باسقا دا اقىن-جازۋشىلار ءسوز سويلەدى. اقىننىڭ مىنەزى, بولمىسى, ولەڭى تۋرالى ايتىلدى. اقىن-دوسى سەرىك تۇرعىنبەك ۇلى كەڭشىلىككە ارناعان ولەڭىندە: «28 جىلدان كەيىن ۇيىڭە قايتىپ ورالدىڭ ۇيا سالىپ» دەدى.
ءولىمنىڭ ءبارى بىردەي مە؟ جو-جو-جوق, وعان قارسىمىن. مەن ولسەم ەرتەڭ گۇلدەيدى, تامىرىم مەنەن تالشىعىم. ۇيا سالعان اقىن – ءتىرى. ءسوزى – ءتىرى. ەندەشە, جىرسۇيەر قاۋىم باردا اقىننىڭ جىرى, ءسوزى ەل جادىنان وشپەك ەمەس, ەلىمەن بىرگە جاساي بەرمەكشى.
باعاشار تۇرسىنباي ۇلى, «ەگەمەن قازاقستان» الماتى