قازاقستان اۋماعىندا قۇرىلعان حالىقارالىق تومەن بايىتىلعان ۋران بانكىن رەسمي اشۋ سالتاناتىندا ەلباسى نۇرسۇلتان نازارباەۆ يادرولىق قارۋعا يە ەلدەردىڭ ءسامميتىن وتكىزۋدى ۇسىندى, دەپ حابارلايدى قازاقپارات.
«جاھاندىق الەمنىڭ بولاشاعى كوپ جاعدايدا تانىلعان, سونىمەن قاتار تانىلماعان يادرولىق مەملەكەتتەرگە بايلانىستى بولادى. ءىس جۇزىندەگى بارلىق يادرولىق مەملەكەتتەردىڭ مارتەبەسىن زاڭداستىرۋدى جانە وسىناۋ جاھاندىق پروبلەمانىڭ ماسەلەلەرىن بىرلەسىپ تالقىلاۋ جانە شەشۋ ءۇشىن يادرولىق قارۋعا يە ەلدەردىڭ ءسامميتىن وتكىزۋدى ۇسىنامىن», - دەدى ەلباسى.
قازاقستان پرەزيدەنتى يادرولىق سىناقتارعا جاپپاي تىيىم سالۋ شارتىنىڭ كۇشىنە ەنۋىنە قاتىستى دا ءالى كۇنگە وتكىر ماسەلەلەردىڭ بار ەكەندىگىن باسا ايتتى.
«بىرنەشە قادام عانا قالدى. بىراق, بەلگىلى بولىپ وتىرعانداي يادرولىق تەحنولوگيالارعا يە بىرقاتار ەل وعان ءالى قول قويعان جوق نەمەسە راتيفيكاتسيالامادى», دەدى مەملەكەت باسشىسى.
وسىعان بايلانىستى نۇرسۇلتان نازارباەۆ يادرولىق سىناقتارعا جاپپاي تىيىم سالۋ شارتىنىڭ كۇشىنە ەنۋى ءۇشىن قۇجاتقا قول قويماعان نەمەسە راتيفيكاتسيالاماعان ەلدەردىڭ كوشباسشىلارىنا بۇل ءىستى جەدەلدەتۋگە شاقىردى. مۇنان بولەك, ەلباسى يادرولىق قارۋدان ازات ايماق قۇرۋ, ونىڭ تارالۋىمەن كۇرەستەگى ەڭ ءتيىمدى قۇرال ەكەندىگىن باسا ايتتى.
«بۇگىنگى كۇنى يادروسىز ايماق لاتىن امەريكاسىندا, افريكادا, تىنىق مۇحيتىنىڭ وڭتۇستىك بولىگىندە, وڭتۇستىك-شىعىس ازيادا قۇرىلدى. 2009 جىلدىڭ ناۋرىزىندا ورتالىق ازيادا يادرولىق قارۋدان ازامات ايماق قۇرۋ تۋرالى شارت كۇشىنە ەندى. يادروسىز ايماق قۇرامىنا كىرەتىن بارلىق مەملەكەتتەرگە كۇش بىرىكتىرۋدى ۇسىنامىن. بىرلەسكەن ءىس-قيمىل جوسپارىن ازىرلەۋگە مۇمكىندىك بەرەتىن فورمات قاجەت. ءبىز مۇنداي كەزدەسۋدى ۇيىمداستىرۋعا دايىنبىز», - دەدى قازاقستان پرەزيدەنتى.