«جاقىپتىڭ جاتىر كۇشى وڭ جاعىندا» دەگەندەي-اق, وسكەمەندىك ارىپتەسىمىز وڭداسىن ەلۋبايدىڭ قالام قارىمى ەرەكشە قۋاتتانىپ كورىنەر, ۇنەمى وڭ جامباسىنا ىلىنەر تاقىرىبى سپورت ەكەنىن وسى كۇنى جۇرت تۇگەل بىلەدى. وڭقاڭ سپورتقا ستۋدەنت كەزىنەن قۇشتار ەدى. سول قۇشتارلىق قاناتىندا پاريجدەگى 1998 جىلعى الەمدىك فۋتبول دوداسىن, سيدنەي, افينا جانە بەيجىن وليمپيادالارىن, تۋريندەگى قىسقى وليمپيادانى, كورەيادا وتكەن فۋتبول چەمپيوناتىن ءوز كوزىمەن ءوتكەرىپ, سونداعى بەكزات, ەرماحان, ولگا, باقتيار, باقىت, يليانىڭ وليمپ شىڭىنا كوتەرىلگەن جۇلدىزدى شاقتارىنىڭ شاتتىعىن بىرگە ءبولىسكەن وسى ءبىزدىڭ وڭقاڭ بولاتىن. سول عالامات سپورت الاماندارىنىڭ ايتۋلى شەجىرەسىندەي «ايشىلىق الىسقا التى ساپار» كىتابى 2009 جىلى جارىق كورسە, اۆتوردىڭ قوعام مەن ەل ءتىرشىلىگىنىڭ الۋان سالاسىن قامتىپ, 1077 فوتوسۋرەتىن توپتاستىرعان «ءومىردى سۋرەتپەن ورنەكتەپ» اتتى فوتوالبوم كىتابى 2010 جىلى وقىرمان كوزايىمىنا اينالعان-دى.
مىنە, سودان ءبىر جىل وتەر-وتپەستە تىنىمسىزدىعى جانكەشتىلىككە جالعاسقان وڭداسىن ەلۋبايدىڭ كەزەكتى فوتوالبومى قولىمىزعا ءتيدى. ارىپتەسىمىز ءوزىنىڭ بۇل جيناعىن «الاشتى اسقاقتاتقان ازيادا» دەپ اتاپ, ونى تۋعان ەل تاۋەلسىزدىگىنىڭ 20 جىلدىعىنا ارناعان ەكەن. جانە قوسالقى اتىن «زولوتايا ازيادا كازاحستانا» دەپ قويىپ, جۇرەمەلەتە ورىس تىلىنە اۋدارتىپ, كىتاپتى قازاق-ورىس وقىرمانىنا بىردەي ۇسىنعانى دۇرىس بولعان. كىتاپتىڭ ءار پاراعىن قىزىعا اشاسىڭ, تانىمىڭدى كەڭەيتەسىڭ. ءجۇزدەگەن سۋرەتتەر قايتالانباس ءساتتەردى مولىنان قامتىپ بەينەلەگەن. استانا مەن الماتىدا بوي كوتەرىپ, ازيادا ابىرويمەن ءوتىپ بولعاننان كەيىن دە جان جادىراتىپ ەل يگىلىگىنە اينالعان عالامات سپورت كەشەندەرى, شاڭعى بازالارى, شىمبۇلاق, مەدەۋ, تاباعان مەن سولداتسايداعى جان الىسىپ, جان بەرىسكەن سپورت باسەكەلەرى, الاش جۇرتىن اسقاقتاتقان الەمدىك الاماننىڭ بارشانى تاڭىرقاتىپ تاڭداي قاقتىرعان اشىلۋ ءھام جابىلۋ سالتاناتتارى دا فوتووبەكتيۆتىڭ قىراعى نازارىنان تىس قالماعان.
بۇل كىتاپتىڭ ىشىندە تانىم دا, تاريح تا, مەرەي دە, مارتەبە دە, تاعىلىم مەن عيبرات تا, سالتانات پەن ساعىنىش تا – ءبارى بار. ازيادانىڭ اشىلۋىندا ەلباسىنىڭ سويلەپ تۇرعان ءساتى سالتانات ەمەس پە! التىن, كۇمىس مەدالداردان القا تاققان جەڭىمپازدارمىزدىڭ ءاربىر ماراپاتتالعان ساتتەرى مەرەي ەمەس پە. 75 جاستاعى استانالىق جانسەبىل جانكۇيەر ساعي اقساقالدىڭ جارىستى جاس جىگىتتەي تاماشالاۋى تاعىلىم ەمەس دەپ كىم ايتار؟ ال وسكەمەندە ازيادا الاۋىن جاققان ازاعاڭ – ءازىلحان نۇرشايىقوۆتىڭ بەينەسى دۇنيە جالعانداعى سوڭعى سۋرەتى بولار-اۋ, ءسىرا. كىتاپتا وسىنداي كوڭىل تولقىتار, جۇرەك ەلجىرەتەر سۋرەت-ساتتەر جەتەرلىك. ساعىنىش دەگەنىمىز وسى. ارىپتەسىمىز وڭداسىن ەلۋباي سول ساعىنىش ساتتەرىن تاپ باسا بىلۋىمەن دە قىزىقتىرادى ءبىزدى, وزىنە دەگەن قۇرمەت سەزىمىن تۋدىرادى.
قورعانبەك امانجول, استانا.