بۇل جولى «استانانىڭ» قاقپاسىن نەناد ەريچ قورعادى. «سەلتيك» دەسە قولىنان دوپ سۋسي بەرەتىن الەكساندر موكيندى باپكەرلەردىڭ دەم الدىرا تۇرعانى ءبىر ەسەپتەن دۇرىس تا بولدى.
العاشقى مينۋتتاردان-اق ويىننىڭ الما-كەزەك شابۋىلعا تولى بولاتىنى بايقالىپ قالدى. «سەلتيكتىڭ» الاڭنىڭ ءار تۇسىنان ات قويعان ءىس-قيمىلىنا «استانا» قايمىقپاي جاۋاپ بەرىپ وتىردى. ال, سونداي ءبىر ساتتە پاتريك ءتۆۋماسيدىڭ الىستان تەپكەن دوبى «سەلتيكتىڭ» قورعاۋشىلارىن سەلك ەتكىزگەندەي دە بولدى. راس, قوناقتار دا قاراپ قالمادى: سۋماڭ قاققان سۇرمەرگەندەرى ەكى-ءۇش رەت ءبىزدىڭ قاقپاعا ءتونىپ كەلىپ, سەس كورسەتىپ كەتىپ جاتتى. وكىنىشكە قاراي, كەزدەسۋدىڭ 13-مينۋتىندا ءبىزدىڭ ورتا تۇستاعى ويىننىڭ بەرەكەسىن كەلتىرىپ جۇرگەن حاۆبەگىمىز لاسلو كلياينحايسلەر جاراقات الىپ قالدى. ونىڭ ورنىنا سردجان گراحوۆاتس الاڭعا شىقتى.
ماتچتىڭ 27-مينۋتىندا كەزەكتى شابۋىلدىڭ بىرىندە دميتري شومكو ايىپ الاڭىنىڭ سىرتىنان شىرەنە تەپكەن. سول كەزدە قوناقتاردىڭ قورعاۋشىسى كريستوفەر ايەر دوپتى قايتارامىن دەپ, ءوز قاقپاشىسىن قاپى قالدىردى. قاتتى تەبىلگەن دوپ باعىتىن كۇرت وزگەرتىپ, قاقپانىڭ وڭ جاق بۇرىشىن سولق ەتكىزگەن بولاتىن.
ارادا جەتى مينۋتتاي ۋاقىت وتكەندە «سەلتيكتىڭ» شابۋىلشىسى سكوتت سينكلەر جەرلەستەرىمىزدىڭ ايىپ الاڭىنا سول قاناتتان بۇزىپ-جارىپ كىردى دە, تۋرا «توعىزدىقتى» ءدال كوزدەدى. ءسويتىپ, كوماندالار ۇزىلىسكە تەڭ ەسەپ جاعدايىندا كەتتى. ۇزىلىستەن كەيىن الاڭعا مارين توماسوۆتى الماستىرعان ابزال بەيسەبەكوۆ شىقتى. بۇل وزگەرىستىڭ ويىن بارىسىندا از پايداسىن تيگىزبەگەنىن ايتا كەتۋ كەرەك.
ماتچتىڭ 48-مينۋتىندا ايىپ الاڭىنا اۋەلەتە بەرىلگەن دوپ كەيىن سەرپىلگەن كەزدە «استانانىڭ» جارتىلاي قورعاۋشىسى سەرىكجان مۋجيكوۆ مەرگەندىك تانىتىپ, گول سانىن ەكىگە جەتكىزدى. ىلە-شالا, شومكودان پاس العان پاتريك تۆۋماسي ەسەپتى 3:1 قىلىپ وزگەرتتى. وسى گولدان كەيىن «سەلتيك» شىنىمەن دە ساسايىن دەدى. «استانا ارەناعا» جيىلعان مىڭ سان كورەرمەننىڭ قيقۋى دا جىعىلعانعا سوققى بولىپ تيگەندەي. ساسقانى سول ەمەس پە, قوناقتاردىڭ باپكەرى برەندون رودجەرس بىرىنەن سوڭ ءبىرى ءۇش ويىنشىنى الماستىردى. ەندى, قوناقتار تايلى-تۇياعى قالماي شابۋىلعا ۇمتىلعان. مىنە, وسىنداي ءساتتىڭ ۇرىمتال تۇسىن شەبەر پايدالانعان ەلوردا فۋتبولشىلارى قوناقتاردى قارسى شابۋىلمەن قاپى قالدىردى. تۆۋسماسي كەزدەسۋدىڭ 69-مينۋتىندا قاقپاشى گوردوننان ايلاسىن اسىرىپ, ءتورتىنشى گولدى سالعان ەدى. ءتورتىنشى دوپ تورعا تۇسكەندە سونۋگە اينالعان ءۇمىت وتى قايتادان لاپ ەتىپ, جانكۇيەر جازعان «استانا ارەنادان» اسپانعا ۇشىپ كەتە جازداعان. بىراق, قۋانىش ۇزاققا بارمادى. الدىمەن وليۆەر نچام ويىننىڭ 82-مينۋتىندا, ودان كەيىن گريففيتس سوڭعى مينۋتتا ەكى گول سوعىپ, اپتىعىمىزدى سۋ سەپكەندەي باستى.
دەگەنمەن, «استانانىڭ» مىڭداعان جانكۇيەرلەرى الدىندا نامىسىن اياققا تاپتاتپاعان ورلىگى ۇنادى. «ەرلەر ىرعاسىپ سىناسادى» دەگەن, وزىنەن كۇشى باسىم قارسىلاسپەن اقىرىنا دەيىن الىسىپ, كەۋدەسىن باستىرماعان ستانيمير ستويلوۆ شاكىرتتەرى قالاي بولعان كۇندە دە وزدەرىنىڭ ءھام ك ۇلى قازاق فۋتبولىنىڭ بەدەلىن قورعاپ قالعان ەدى.
سونىمەن, «استانا» چەمپيوندار ليگاسىنداعى جورىعىن اياقتادى. ال الداعى ۋاقىتتا ونەر كورسەتەتىن ەۋروپا ليگاسى سىنىنا 48 كلۋب قاتىسادى. «استانانىڭ» ەۋروپا ليگاسىنىڭ توپتىق كەزەڭىندە قارسىلاستارى جۇما كۇنى بەلگىلى بولادى.
«استانا» (استانا, قازاقستان) – «سەلتيك» (گلازگو, شوتلانديا) 4:3 (1:1). ءبىرىنشى ويىن: 0:5. گولدار: ايەر – اۆتوگول 27 (1:0), سينكلەر 34 (1:1), مۋجيكوۆ 48 (2:1), تۆۋماسي 49 (3:1), تۆۋماسي 69 (4:1), نچام 82 (4:2), گريففيتس 90 (4:3) ەسكەرتۋلەر: پوستنيكوۆ 70, شومكو 82, گراحوۆاتس 90+3 «استانا»: ەريچ, شيتوۆ, انيچيچ, كلياينحايسلەر (گراحوۆاتس 13), مۋجيكوۆ, توماسوۆ (بەيسەبەكوۆ 46, تاعىبەرگەن 81), ماەۆسكي, تۆۋماسي, كابانانگا, پوستنيكوۆ, شومكو «سەلتيك»: گوردون, بيتتون, براۋن, گريففيتس, سينكلەر (ارمسترونگ 65), نچام, لۋستيگ, ايەر, ماكگرەگور (روگيچ 46), فوررەست (رەلستون 57), تيرني
قايرات ءابىلدا, «ەگەمەن قازاقستان»