«اباي ءسوزى – قازاقتىڭ بويتۇمارى, اباي مۇراسى – قازاقتىڭ قاسيەتتى قازىناسى» دەپ ەلباسىمىز نۇرسۇلتان نازارباەۆ ايتقانداي, دانا بابامىزدىڭ اسقاق مۇسىنىنە گۇل شوقتارىن قويۋمەن باستالعان مادەني باعدارلاما ادەبي-سازدى كەشكە ۇلاستى.
استانا قالاسى اكىمىنىڭ ورىنباسارى ەرمەك امانشاەۆ ءمالىم ەتكەندەي, رۋحاني جاڭعىرۋ باستاماسى كوتەرىلگەن كۇننەن باستاپ, بۇگىنگە دەيىن قالا كولەمىندە ۇلكەندى-كىشىلى 200-دەن استام شارا وتكەن. «بۇگىنگى باسقوسۋ سونىڭ جالعاسى. ياعني, دانا بابامىزدىڭ وشپەس تاعىلىمىنان ءنار الۋ ماقساتىندا «اباي اپتالىعى» ۇيىمداستىرىلىپ وتىر. وعان اكىمدىككە قاراستى بارلىق سالالىق مەكەمەلەرمەن قاتار, ءبىلىم وشاقتارى, مادەني ورىندار قامتىلادى», دەدى قالا اكىمىنىڭ ورىنباسارى.
ادەبي-سازدى كەشتى جىرمەن اشقان ايتىسكەر اقىن امانجول التاەۆتىڭ ء«بىلىمنىڭ قاينار بۇلاعى – اباي, عىلىمنىڭ جارىق شىراعى – اباي, قازاقتىڭ ءنارلى قۇراعى – اباي, ۇلتىمنىڭ ۇلپىلدەگەن جۇرەگى – اباي» دەپ جىرلاعان مانەرلى شۋماقتارى كورەرمەندى ءبىر سەرپىلتىپ تاستادى. ودان كەيىن ابايدىڭ كۇيى «تورجورعانى» ورىنداعان «سەرپەر» دومبىراشىلار انسامبلىنەن سوڭ ساحناعا كوتەرىلگەن حالىق اقىنى قونىسباي ءابىل اقىن اتامىزدىڭ رۋحىنا ارناپ:
كوڭىلىڭ كەتسە كىرلەنىپ, ەمىنىڭ ءبارى ابايدا, رەنجىتىپ الىپ جۇرمەلىك, ابايلا, قازاق, ابايلا! – دەپ جۇرەك جىرىن توگىلتسە, جاس اقىندار مەرەي قارت, جۇلدىزاي ىسقاق, ارمان شەريزات شەرلى تولعاۋلارىن اقتاردى.
ءداستۇرلى ءانشى ەرلان رىسقالي ورىنداعان ابايدىڭ «سەگىز اياعى» مەن ەلمۇرا جاڭابەرگەنوۆا شىرقاعان «جارق ەتپەس قارا كوڭىلىم نە قىلسا دا...» اندەرى, سونىمەن بىرگە, ەلىمىزگە ەڭبەك سىڭىرگەن ءارتىس كەنجەعالي مىرجىقباي ورىنداعان «قاراڭعى تۇندە تاۋ قالعىپ», «ولسە ولەر تابيعات, ادام ولمەس» اندەرى ەلوردانىڭ مامىراجاي اسپانىن تەربەدى.
اشىقاسپان استىندا وتكەن ادەبي كەشكە جينالعان جۇرتتى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ءارتىسى قاسىمحان بۇعىباي ورىنداعان مونولوگ ءماندى, ماڭىزدى, ۇيىقتاپ كەتكەن جۇرەكتى وياتار اسەم سازدىلىعىمەن ەستە قالسا, ورتالىقتاندىرىلعان كىتاپحانالار جۇيەسى ۇيىمداستىرعان «ابايدىڭ مۇراسى – قازاقتىڭ اسىل قازىناسى» اتتى كىتاپ كورمەسى اباي شىعارمالارىن ناسيحاتتاۋدىڭ ۇلگىسى بولدى دەسەك جاراسادى. ۇلى بابامىزدىڭ تۋعان كۇنىنە ورايلاستىرىپ وتكىزگەن بۇل شارانى قالا تۇرعىندارى مەن قوناقتارى جانە زيالى قاۋىم وكىلدەرى كەلىپ تاماشالادى.
بەكەن قايرات ۇلى, «ەگەمەن قازاقستان»
سۋرەتتى تۇسىرگەن ەرلان ومار, «ەگەمەن قازاقستان»