كەزدەسۋ اياسىندا دەلەگاتسيا مۇشەلەرى ءوڭىردىڭ مامانداندىرىلعان سوتتارىنىڭ قىزمەتىمەن تانىستىرىلىپ, ولاردىڭ نازارىنا ەلدەگى سوت جۇيەسىنىڭ اقپاراتتىق كوممۋنيكاتسيالىق تەحنولوگيالارىنىڭ جۇمىس ۇلگىلەرى ۇسىنىلدى. وڭتۇستىك قازاقستان وبلىستىق سوتىنىڭ عيماراتىندا وتكەن شارادا جوعارعى سوت توراعاسى ق.ءمامي ارىپتەسى ك.كاميلوۆتى تاياۋدا عانا وزبەكستان رەسپۋبليكاسى جوعارعى سوتىنىڭ توراعاسى لاۋازىمىنا تاعايىندالۋىمەن قۇتتىقتاپ, العاشقى كەزدەسۋدىڭ شىمكەنت قالاسىندا ۇيىمداستىرىلۋىنىڭ ماڭىزى جوعارى ەكەندىگىن اتاپ ءوتتى.
كەزدەسۋ بارىسىندا ەلباسى باستاماشىلىق ەتكەن ۇلت جوسپارىنىڭ شەڭبەرىندەگى سوت رەفورماسىنىڭ نەگىزگى جەتىستىكتەرى ەگجەي-تەگجەيلى باياندالدى. سونداي-اق, ەنگىزىلگەن جاڭاشىلدىقتاردىڭ قولدانىستاعى ناتيجەلەرىنە ءجىتى كوڭىل بولىنەتىندىگى, سونىمەن قاتار, سوت ساتىلارىن وڭتايلاندىرۋدىڭ ارقاسىندا داۋلاردى قاراۋدىڭ ەڭ ۇزاق مەرزىمى ەكى ەسەگە قىسقارتىلعانى دا تىلگە تيەك ەتىلدى. سول سەبەپتەن دە, بۇگىنگى تاڭدا ازاماتتىق ىستەردىڭ كوپشىلىگى تاراپتاردى سوتقا شاقىرۋسىز جەڭىلدەتىلگەن ءوندىرىس تارتىبىمەن قاراستىرىلادى جانە ەلدەگى قىلمىستىق ىستەردىڭ تورتتەن ءبىر بولىگى 10 تاۋلىك مەرزىمگە دەيىن جەڭىلدەتىلگەن پروتسەدۋرا بويىنشا وڭ شەشىمىن تاۋىپ جاتادى.
ورايى كەلگەندە ق.ءمامي بىتىمگەرلىك پروتسەدۋرالار مەن مەدياتسيانى ەنگىزۋدىڭ قازاقستاندىق تاجىريبەسىنە, حالىقارالىق كەڭەستىڭ قىزمەتىنە توقتالىپ ءوتتى. وسى كۇندەرى قازاقستاندا ەلەكتروندىق سوت تورەلىگىن جۇزەگە اسىرۋعا ەرەكشە كوڭىل بولىنگەن.
شارا اياسىندا سوتتاردى رەفورمالاۋ مەن ەلەكتروندىق تەحنولوگيالاردى ەنگىزۋ بويىنشا قازاقستاندا اتقارىلعان جۇمىستارعا زور قىزىعۋشىلىقتارىن بىلدىرگەن وزبەكستان جوعارعى سوتىنىڭ توراعاسى ك.كاميلوۆ, ارىپتەسى ق.ءماميدى اعىمداعى جىلى تاشكەنت قالاسىندا وتەتىن شىۇ مۇشە ەلدەرىنىڭ جوعارعى سوت توراعالارىنىڭ كەزەكتى كەڭەسىندە ەكى ەلدىڭ جوعارعى سوتتارى اراسىنداعى ىنتىماقتاستىق تۋرالى مەموراندۋمعا قول قويۋعا شاقىردى. ايتا كەتەيىك, بۇل قۇجات قازاقستان مەن وزبەكستان سوت ورگاندارى اراسىنداعى قارىم-قاتىناستىڭ باستى باعىتتارى مەن نىساندارىن بەلگىلەيدى.
كەزدەسۋ اياقتالعاننان كەيىن شەتەلدىك دەلەگاتسيا ق.ءماميدىڭ توراعالىعىمەن وتكەن وڭىرلەردىڭ قوسىلۋىمەن «ەلەكتروندىق سوت تورەلىگىنىڭ وزەكتى ماسەلەلەرى» تاقىرىبىمەن ۇيىمداستىرىلعان بەينە-كونفەرەنتسياعا قاتىستى. ونىڭ شەڭبەرىندە جامبىل وبلىسىنداعى «ەلەكتروندىق قىلمىستىق ءىس» قاناتقاقتى جوباسىن وتكىزۋ ماسەلەسى مەن باتىس قازاقستان وبلىسىنداعى وندىرىستەگى ىستەردى ەلەكتروندىق تۇردە قاراستىرۋ تاجىريبەسى, سونداي-اق, باسقا دا بىرقاتار جوبالار تالقىلاندى.
نۇرلىبەك دوسىباي, «ەگەمەن قازاقستان»