تۋرەتسكي حورى – قۇرىلعانىنا شيرەك عاسىردان استام ۋاقىت وتكەن, عاسىر قۇبىلىسىنا اينالعان رەسەيلىك ۇجىم. وسى جىلداردىڭ ىشىندە ولار الەمنىڭ جۇزدەگەن ەلىندە ونەر كورسەتتى. ۇجىم جىل سايىن 200-250 رەت ساحناعا شىعادى ەكەن. سونشا رەت ۇشاققا مىنەدى دەسەك تە ارتىق ەمەس. حوردىڭ ەڭ باستى ەرەكشەلىگى – ولاردىڭ ونەرىندە شەكارانىڭ جوقتىعى. كلاسسيكالىق اندەردى دە, روكتى دا, پوپ-مۋزىكا مەن وپەرانى دا, دجاز بەن حالىقتىق حيتكە اينالعان اندەردى دە ورىندايدى. جاندى داۋىسپەن ءان سالاتىن ونەر يەلەرى بارلىق كەزدە حالىقتىڭ قوشەمەتىنە يە. ون شاقتى تىلدە ءان شىرقايتىن تۋرەتسكي حورىنىڭ دۇنيە جۇزىنە تانىمال بولۋىنا اسەر ەتكەن جاعداي – ولاردىڭ كونتسەرتتى بۇقارالىق شوۋعا اينالدىرا الۋىندا بولسا كەرەك. تەك تاڭداۋلى ساحنالاردا عانا ەمەس, اشىقاسپان استىندا دا ءان شىرقايتىن ونەرپازداردىڭ كونتسەرتىنە حالىق كوپ جينالىپ, ونەر يەلەرىمەن قوسىلىپ ءان شىرقايتىن دا جاعدايلار كەزدەسەدى. سول ءۇشىن ونەر زەرتتەۋشىلەرى تۋرەتسكي حورى مەن ونىڭ جەتەكشىسىن رەسەيدە بۇقارالىق مۋزىكا مادەنيەتىن قالىپتاستىرۋشىلار رەتىندە باعالايدى.
2015 جىلى تۋرەتسكي حورىنىڭ قۇرىلعانىنا 25 جىل تولۋىنا وراي ماسكەۋدە ۇلكەن كونتسەرت ءوتتى. «№1 حالىقتىق كاراوكە» دەگەن اتقا يە بولعان الگى كونتسەرتكە 150 مىڭنان استام ادام جينالعان. انشىلەر ءار بۋىننىڭ اندەرىن سۇرىپتاپ الىپ, حالىقپەن قوسىلىپ ءان شىرقاعان سول كونتسەرت كەيىن رەسەيدىڭ 9 قالاسىندا جالعاسىن تاپتى.
ال ەندى تۋرەتسكي حورىندا كىمدەر ونەر كورسەتەدى دەگەنگە كەلسەك, الەم حالقىن تامساندىرىپ جۇرگەن ۇجىمنىڭ ونەرپازدارى نەگىزىنەن ەرلەر قاۋىمى. تۋرەتسكي حورىنىڭ سوليستەرى – ەۆگەني كۋلميس ەسىمدى باس-پروفۋندو, ياعني, بىلايشا ايتقاندا, شىركەۋ اندەرىن شىرقاۋعا لايىقتى وتە تومەنگى داۋىس يەسى, كونستانتين كابو, پاۆەل بەركۋت, ەۆگەني تۋلينوۆ سىندى تەنورلار, باريتون داۋىستى الەكس الەكساندروۆ, كۇمىس ءۇندى ولەگ بلياحورچۋك پەن بوريس گورياچەۆ, كونترتەنور ۆياچەسلاۆ فرەش, سوپرانو داۋىستى ميحايل كۋزنەتسوۆ بۇگىندە ۇجىم ارقىلى تانىمال مۋزىكانتتارعا اينالعان.
«قازاقستان» ورتالىق كونتسەرت زالىندا وتكەن تۋرەتسكي حورىنىڭ گالا-كونتسەرتىنە حالىق كوپ جينالدى. كونتسەرت باستالماس بۇرىن ماسكەۋ ۇكىمەتىنىڭ ءمينيسترى – ماسكەۋ قالاسى سىرتقى ەكونوميكالىق جانە حالىقارالىق قاتىناستار دەپارتامەنتىنىڭ باسشىسى سەرگەي چەرەمين مەن استانا قالاسى اكىمىنىڭ ورىنباسارى ەرمەك امانشاەۆ ساحناعا كوتەرىلىپ, كونتسەرتتىڭ ءمان-ماڭىزىن اتاپ ءوتتى. سەرگەي چەرەمين استانا مەن ماسكەۋ قالالارىن تەك ساياسي-ەكونوميكالىق بايلانىستار عانا ەمەس, مادەني-گۋمانيتارلىق بايلانىستار دا جاقىنداستىراتىنىن ايتىپ, بىلتىر كۇزدە ماسكەۋدە وتكەن استانا كۇندەرىندە قازاق ونەرىن تاماشالاۋعا ۇلكەن قالانىڭ مادەني وشاقتارىنا كورەرمەندەردىڭ مولىنان جيىلعانىن ەسكە سالدى. سونداي-اق, استاناداعى ماسكەۋ كۇندەرىنىڭ دە ءساتتى وتۋىنە تىلەكتەستىك ءبىلدىردى. ال استانا قالاسى اكىمىنىڭ ورىنباسارى ماسكەۋ كۇندەرىنىڭ باعدارلاماسىمەن تانىستىرىپ, ەلوردالىقتار الدىندا ونەر كورسەتۋ ءۇشىن 200-دەن اسا ونەرپاز كەلگەنىن حابارلادى.
حور ۇجىمىنىڭ كونتسەرت بارىسىندا ورىس, يتاليان, نەمىس تىلدەرىندە ءان شىرقاعانىنا كۋا بولدىق. جوعارىدا اتاپ وتكەنىمىزدەي, ەڭ جوعارعى تەنور مەن ەڭ تومەنگى باس داۋىسقا دەيىن ارالىقتاعى انشىلەردىڭ ۇيلەسىمدى حورى ەلوردالىق كورەرمەندەردىڭ ىقىلاسىنا بولەندى. اسىرەسە, ولاردىڭ قازاق تىلىندە «جاستىعىمنىڭ كۋاسى, شۇرقىراعان اۋىلىم. جۋسانى مەن جۋاسى بۇرقىراعان اۋىلىم» دەپ حيتكە اينالعان اتاقتى «اۋىلىم» ءانىن شىرقاۋى ريزاشىلىق تۋعىزدى.
استاناداعى ماسكەۋ كۇندەرى اياسىندا ەلوردالىقتار تاعى دا بىرنەشە اسەرلى كەشتەر مەن ءىس-شارالاردىڭ كۋاسى بولماق. اتاپ ايتقاندا, بۇگىن «استانا» كونتسەرت زالىندا ماسكەۋ مەملەكەتتىك اكادەميالىق «گجەل» بي تەاترىنىڭ گالا-كونتسەرتى وتسە, ەرتەڭ رەسەي حالىق ءارتيسى, تالانتتى اكتەر دميتري حاراتياننىڭ شىعارماشىلىق كەشى ۇيىمداستىرىلماق. سونداي-اق, رەسەيدىڭ تاريحى مەن مادەنيەتىنەن سىر شەرتەتىن كىتاپ كورمەلەرى, «موسكۆا» جۋرنالىنىڭ باس رەداكتورى ۆلاديسلاۆ ارتەموۆتىڭ شىعارماشىلىق كەشى دە ماسكەۋ كۇندەرى اياسىندا وتەدى.
ايگۇل سەيىل, «ەگەمەن قازاقستان»
سۋرەتتەردى تۇسىرگەن ەرلان ومار, «ەگەمەن قازاقستان»