تىپ-تىنىش, جايباراقات, سابىرلى, بايىپتى, سۇپ-سۋىق دەگەن ۇعىمدار ەرىكتىڭ شىعارماشىلىعىنا مۇلدەم جات. جيىرمانىڭ جەتىسىنە شىققان البىرت جاستىڭ وتتى سەزىمدەرى مەن ومىرگە قۇشتارلىعىنان, ىشكى الەمى مەن سىرتقى تىرشىلىكتى ۇيلەستىرۋ بارىسىنداعى تالپىنىسىنان وسىنداي جاندى دۇنيەلەر تۋاتىن سياقتى. سۋرەتشىمەن ەلوردادا وتكەن دۇنيەجۇزى قازاقتارىنىڭ V قۇرىلتايىندا تانىسقان ەدىك. وزبەكستاندىق جاس سۋرەتشى ەرىك قۇلمانوۆ بۇگىندە تاشكەنت وبلىسىنا قارايتىن بوستاندىق اۋدانىندا تۇرادى. قازاعى كوپ سول اۋداننىڭ تۋماسى. ورتا مەكتەپتە بەينەلەۋ ونەرى, سىزۋ پاندەرىنەن ساباق بەرەدى. تاشكەنتتە, سونداي-اق, اۋداندا دا شەبەرحاناسى بار. بوس ۋاقىتىن كوبىندە سول جەرلەردە وتكىزەدى ەكەن. وزبەكستان كوركەمسۋرەت اكادەمياسىنىڭ مۇشەسى, وزبەكستان ۇلتتىق كوركەمسۋرەت جانە ديزاين ينستيتۋتىنىڭ تۇلەگى, بىرنەشە بايگەلەردە سۋىرىلىپ شىعىپ, وزىنە بۇيىرعان سىيلىقتاردى الىپ جۇرگەن ەرىكتىڭ ەلىمىزگە بۇل ءبىرىنشى رەت كەلۋى ەمەس. وزبەكستانداعى قازاق مادەني ورتالىعىنىڭ قولداۋىمەن قازاقستانعا بىرنەشە رەت كەلگەن.
«دۇنيەجۇزى قازاقتارى قاۋىمداستىعى ۇيىمداستىراتىن ونەر فەستيۆالدارىنا قاتىسىپ ءجۇرمىن. بىرىندە ەكىنشى, بىرىندە ءۇشىنشى ورىن الدىم. وزبەكستاندا ۇيىمداستىرىلاتىن بايگەلەردەن دە سىرت قالعان ەمەسپىن. كورمەلەرگە قاتىسامىن. بالا كۇنىمنەن تاڭداعانىم وسى جول بولعان سوڭ, بەينەلەۋ ونەرىنىڭ شىڭىنا شىققىم كەلەدى», دەيدى جاس سۋرەتشى.
ول ورتا مەكتەپتە وقىپ جۇرگەندە-اق سۋرەت سالۋمەن اينالىسا باستاعان. بۇگىندە بۇل سالادا جۇمىس ىستەمەسە دە اكەسى نەسىپ قۇلمانوۆ تا ماماندىعى بويىنشا سۋرەتشى. اكەنىڭ دارىنى قان ارقىلى بالاعا بەرىلۋىندە دە, ول جالعاستىرماعان جولدى ءارى قاراي ۇلدىڭ جالعاپ اكەتۋىندە دە ءبىر تىلسىم بار شىعار؟ بۇل كۇندە ىنتاسى مەن تالابى بار بالالارعا سۋرەت سالۋدىڭ قىر-سىرىن ۇيرەتىپ جۇرگەن ول سۋرەت ونەرىنىڭ بىرنەشە جانرىندا ەڭبەكتەنۋدە. ۆان گوگ, كلود مونە, گوگەن سىندى دۇنيە جۇزىنە تانىمال سۋرەتشى بولۋدى ارماندايدى. پوستيمپرەسسيونيزم باعىتىندا ىزدەنىپ جۇرگەن ەرىك قۇلمانوۆ جەكە كورمەسىن وتكىزۋگە دايىندىق ۇستىندە ەكەنىن ايتتى. وسى كۇنگە دەيىن سالعان كارتيناسى 1000-نان اسىپ كەتكەنىمەن, كورمەلەردە, شەبەرحانالاردا قولدان-قولعا ءوتىپ, كوبى ساتىلىپ كەتكەن. ەرىكتىڭ ايتۋىنشا, تاشكەنتتە كارتينالارعا قىزىعۋشىلىق تا, سۇرانىس تا بارشىلىق. بۇل وعان شابىت بەرەدى. الىستان قول بۇلعاعان اياۋلى ارماندارىنا تالپىندىرادى. تەك ەندى جەكە كورمەسىنىڭ ۋاقىتى ۇزاپ كەتپەسە بولدى.
ايگۇل سەيىل, «ەگەمەن قازاقستان»