«بۇل ايرىقشا قالا مەن ونىڭ ادامدارىن كورۋ مەن ءۇشىن راسىندا دا زور قۇرمەت. مەن, مارشالل ارالدارىنان كەلگەن كىشىگىرىم دەلەگاتسيامەن بىرگە وسىندا, سىزدەردىڭ ارالارىڭىزدا بولعانىمدى جانە كەرەمەت مەملەكەتتى, مادەنيەت پەن قايىرىمدى قوناقجايلىلىقتى كورگەنىمدى ماقتان تۇتامىن», – دەگەن انگەلين حاينە مارشالل ارالدارى مەن قازاقستان حالىقتارى اراسىندا ۇقساستىق بار ەكەنىن جەتكىزدى.
سونداي-اق, انگەلين حاينە ەكسپو-2017 كورمەسىنىڭ تاقىرىبى مارشالل ارالدارى ءۇشىن ۇلكەن ماڭىزعا يە ەكەنىن اتاپ ءوتتى. ول سونداي-اق مارشالل ارالدارىنىڭ بالامالى ەنەرگيا تۇرلەرىن ءوندىرۋ بويىنشا جۇرگىزىپ جاتقان جۇمىستارىمەن ءبولىسىپ, 2020 جىلعا قاراي ەلدەگى جاڭارتىلاتىن ەنەرگيا كوزدەرىن 20%-عا جەتكىزۋ جوسپارلانىپ وتىرعانىن ماعلۇمدادى.
«2009 جىلى ءبىزدىڭ العاشقى ەنەرگەتيكا سالاسىنداعى ۇلتتىق ءىس-قيمىل جوسپارىمىز قولعا الىندى. سودان بەرى ايتارلىقتاي ىلگەرىلەۋشىلىك بار. تازا, سەنىمدى, ەكولوگيالىق تۇراقتى ەنەرگەتيكاعا قولجەتىمدىلىكتى قامتاماسىز ەتۋ ءۇشىن ۇكىمەت ءۇي شارۋاشىلىعىنا ارنالعان 3 مىڭنان استام كۇن جۇيەلەرىن تاراتىپ ورناتتى. سونداي-اق, ۇكىمەت 2020 جىلعا قاراي ەلدەگى جاڭارتىلاتىن ەنەرگيا كوزدەرىن 20%-عا جەتكىزۋدى كوزدەيدى», – دەدى مارشالل ارالدارىنىڭ حالىقارالىق ەنەرگەتيكالىق جوسپارلار ديرەكتورى انگەلين حاينە.
مارشالل ارالدارى رەسپۋبليكاسىنىڭ ۇلتتىق كۇنىن مەرەكەلەۋگە ارنالعان سالتاناتتى شاراعا قازاقستان رەسپۋبليكاسى قورعانىس جانە اەروعارىش ونەركاسىبى ءمينيسترىنىڭ ورىنباسارى ارمان رامازانوۆ قاتىستى.
ول ەكسپو-2017 كورمەسى ەلدىڭ ءۇشىنشى ونەركاسىپتىك رەۆوليۋتسياعا وتۋىنە ىقپال ەتەتىنىن العا تارتتى.
مارشالل ارالدارىنىڭ ەكسپوزيتسياسى «تىنىق مۇحيتى پلازاسىندا» ۇسىنىلعان. بۇل – ميكرونەزيا قۇرامىنداعى كليماتتىق وزگەرىستەرگە تاۋەلدى تىنىق مۇحيتىندا ورنالاسقان مەملەكەت. ءارى, كليمات جونىندەگى كەلىسىمگە قول قويعان العاشقى ارالدا ورنالاسقان ەلدەردىڭ ءبىرى.