– ەرتەڭ رەۆانش الۋىمىز كەرەك. ءبىرىنشى ماتچتان كەيىن ءتيىستى قورىتىندى شىعاردىق دەپ ويلايمىن. ءوز الاڭىمىزدا وينايمىز, سوندىقتان جوعارى دەڭگەيدە ونەر كورسەتۋىمىز كەرەك. كەي ويىنشىلاردىڭ جاراقاتى مەن ديسكۆاليفيكاتسياسىنا بايلانىستى ازداعان قيىندىقتارىمىز جوق ەمەس. العاشقى ويىندى قاپەرىمىزدە ۇستاپ, ماكسيمالدى دەڭگەيدە ويناۋ ءۇشىن بارىمىزدى سالامىز.
– گلازگوداعى اۋىر جەڭىلىس كومانداعا قالاي اسەر ەتتى؟
– نەگىزى ءبىز ناشار ويىن كورسەتكەن جوقپىز. بىراق ءبىر قىزىعى «سەلتيكتىڭ» ءاربىر تەپكەن دوبى قاقپامىزعا كىرە بەردى. بۇل جەڭىلىس بىزگە اۋىر سوققانىن جاسىرا المايمىن. بىراق ءتيىستى ناتيجە شىعارىپ, ارى قاراي جىلجۋىمىز كەرەك. قانداي قاتەلىككە بوي الدىرعانىمىزدى جاقسى بىلەمىز. الداعى ۋاقىتتا وسى كەمشىلىكتەرىمىزدىڭ ورنىن تولتىرساق ەۋروپادا جاقسى ونەر كورسەتەمىز دەپ ويلايمىن.
– مارين انيچيچ ءوزىن قالاي سەزىنىپ ءجۇر؟ يۋري لوگۆينەنكونىڭ جوقتىعىنا بايلانىستى ورتالىق قورعانىستى رەتتەۋدى قالاي ويلاستىرىپ وتىرسىز؟
– ءبىرىنشى ويىندا مارين مۇلدەم دايىن ەمەس ەدى. قازىر ءوز قالپىنا كەلىپ جاتىر. ماتچ الدىنداعى جاعدايى قانداي بولارىن كورەمىز. ول ورتالىق قورعانىستا ەۆگەني پوستنيكوۆپەن ءجيى ويناعان. ءۇش قورعاۋشىمەن دە ويناۋعا بولادى. ءتۇرلى جولدارىن قاراستىرىپ وتىرمىز. بارىنەن ماڭىزدىسى جيناقى ويناۋىمىز كەرەك.
– گلازگوداعى ويىننان كەيىن الەكساندر موكين جاۋاپتى ويىندا الاڭعا شىعۋى مۇمكىن بە؟
– مەن ىلعي دا قاراماعىمدا ەكى مىقتى قاقپاشىنىڭ بارىن ايتىپ كەلەمىن. موكين ايتارلىقتاي قاتەلىكتەر جىبەردى دەپ ايتا المايمىن. ال نەناد ەريچ چەمپيوندار ليگاسىندا ءالى وينامادى. سوندىقتان بۇل جولى قاقپانى نەنادقا سەنىپ تاپسىرامىن.
– «استانانىڭ» «سەلتيكتەن» ءالى دە بولسىن ءوتۋ مۇمكىن ەكەندىگىنە سەنەسىز بە؟
– مەنىڭشە, «سەلتيك» چەمپيوندار ليگاسىنىڭ توپتىق كەزەڭىنە 99 پايىز شىعىپ تۇر. شىندىققا تۋرا قاراي ءبىلۋ كەرەك.
ايتا كەتەيىك, قوس كوماندا اراسىنداعى جاۋاپتى كەزدەسۋ بۇگىن «استانا-ارەنا» ستاديونىندا ساعات 21:30-دا باستالادى.
ايان ءابدۋالي, «ەگەمەن قازاقستان»