القا وتىرىسىنا ەلىمىزدىڭ ىشكى ىستەر ءمينيسترى قالمۇحامبەت قاسىموۆ پەن رەسەي فەدەراتسياسىنىڭ ىشكى ىستەر ءمينيسترى ۆلاديمير كولوكولتسەۆ, سونداي-اق, ەكى ەل مينيسترلەرىنىڭ ورىنباسارلارى, ورتالىق اپپاراتتارىنىڭ باسشىلارى مەن تمد-داعى ۇيىمداسقان قىلمىسقا جانە قىلمىستىڭ وزگە دە قاۋىپتى تۇرلەرىنە قارسى كۇرەستى ۇيلەستىرۋ جونىندەگى بيۋروسىنىڭ (بكبوپ سنگ) ديرەكتورى, وسى بيۋروعا قازاقستان رەسپۋبليكاسىنان تاعايىندالعان وكىل جانە جەكەلەگەن وڭىرلەردىڭ ءىىد باسشىلارى قاتىستى.
القالى كەڭەسكە قاتىسۋشىلار وتكەن جىلى وسكەمەن قالاسىندا ۇيىمداستىرىلعان بىرلەسكەن القانىڭ ەكىنشى وتىرىسىندا قابىلدانعان شەشىمدەردىڭ ساتىمەن جۇزەگە اسىرىلىپ جاتقانىن, سونىڭ ىشىندە شەكارالىق ىنتىماقتاستىق ايتارلىقتاي ارتا تۇسكەنىن اتاپ ءوتتى. كەزدەسۋ بارىسىندا قازاقستان مەن رەسەي ىشكى ىستەر ورگاندارىنىڭ جەتەكشىلەرى زاڭسىز ەسىرتكى اينالىمىنا قارسى كۇرەس سالاسىنداعى ەكىجاقتى ىنتىماقتاستىقتى نىعايتا ءتۇسۋدىڭ باعىتتارىن جان-جاقتى قاراستىردى. ناتيجەسىندە, وسى ماسەلە بويىنشا قازاقستان مەن رەسەيدىڭ شەكارالاس وڭىرلەرىندە, دالىرەك ايتقاندا, كاسپي تەڭىزى اۋماعىندا جەدەل الدىن الۋ وپەراتسيالارىن وتكىزۋ تۋرالى شەشىم قابىلداندى.
وعان قوسا, تاراپتار زاڭسىز كوشى-قونعا قارسى ءىس-قيمىل سالاسىنداعى ىنتىماقتاستىقتى دامىتۋ, ۇلتتىق زاڭنامالارداعى وزگەرىستەر تۋرالى مالىمەتتەردى جەدەل الماسۋ جانە وسى باعىتتاعى ءتيىمدى جۇمىس تاجىريبەسىمەن ءبولىسۋدى جانداندىرۋ ماسەلەلەرى بويىنشا پىكىر الماستى. باسقوسۋ قورىتىندىسىندا دەلەگاتسيا باسشىلارى زاڭسىز ەسىرتكى اينالىمىنا قارسى كۇرەستە ۆەدومستۆوارالىق ىنتىماقتاستىقتى جەتىلدىرۋ, سونداي-اق, زاڭسىز كوشى-قونعا قارسى ءىس-قيمىل سالاسىنداعى ەكىجاقتى ۋاعدالاستىقتى جۇزەگە اسىرۋعا قاتىستى قۇجاتتارعا قول قويدى. بىرلەسكەن القانىڭ الداعى جىلعا ارنالعان جۇمىس جوسپارى بەكىتىلىپ, كەلەسى وتىرىستى قازاقستاندا وتكىزۋ جونىندە شەشىم قابىلداندى.
نۇرلىبەك دوسىباي,
«ەگەمەن قازاقستان»