قازىرگى كەزدە بالالاردىڭ كوبى شەتەلدەردىڭ ءمۋلتفيلمىن ورىس تىلىندە, نە قازاقشا اۋدارما ارقىلى تاماشالايتىنى جاسىرىن ەمەس. بۇل ەلىمىزدە بالالارعا ارنالعان رۋحاني ازىقتىڭ ازدىعىنان حابار بەرەتىن جاعداي. ايتپەسە, قازىرگى كۇنى جەكە ستۋديالاردا دا قازاق تىلىندەگى جاپ-جاقسى مۋلتفيلمدەر ءتۇسىرىلىپ جاتقانىن ءبارىمىز بىلەمىز. بىراق, بالالارعا ارنالعان جالعىز «بالاپان» ارناسىنىڭ وزىنە ول ونىمدەر جەتكىلىكسىز. سول ءۇشىن قازاق تىلىندە مۋلتفيلم ءتۇسىرىلدى دەگەن حاباردىڭ ءوزى قۇلاققا جىلى ەستىلەدى. ال مىنا بايقاۋ الدا ءتۇسىرىلۋى ءتيىس جاقسى دۇنيەلەردەن ۇمىتتەندىرەدى ەكەن. بىرىنشىدەن, بۇل جەتكىنشەكتەردىڭ اراسىندا ۇيىمداستىرىلۋدا. بالانىڭ قيالى ۇلكەندەردىكىنەن كەمىندە بەس ەسە ارتىق بولۋى مۇمكىن. ياعني, بولاشاقتا ومىرگە تاماشا مۋلتفيلمدەر كەلىپ جاتسا نۇر ۇستىنە نۇر. ەكىنشىدەن, قازاق انيماتسياسىنىڭ ەلۋ جىلدىعىنا وراي ۇيىمداستىرىلىپ جاتقان بايقاۋ الدىمەن ۇلتتىق ونىمدەرى ناسيحاتتاۋدى ماقسات ەتەدى. قازاقشالاپ ايتقاندا قازاقى بوياۋدىڭ قالىڭ بولماعى ءجون.
بايقاۋ تۋرالى ايتا كەتەر بولساق, جاس سۋرەتشىلەر «مەن جاقسى كورەتىن قازاق ءمۋلتفيلمى» جانە «مەنىڭ قيالىمداعى كەيىپكەر» اتتى اتالىمدار بويىنشا ونەر جارىستىرماق. العاشقى اتالىم بويىنشا بالالار قازاق مۋلتفيلمدەرى جەلىسىندە سالىنعان سۋرەتتەر مەن كوميكستەر جىبەرەتىن بولسا, ەكىنشى اتالىمدا ولاردىڭ قيالىنا ەركىندىك بەرىلەدى. ەرتەگى, اڭىز نە ميفتىك كەيىپكەرلەردى ءوز قالاۋىنشا سالىپ, بايقاۋعا جىبەرۋگە بولادى. بىراق, شەتەلدىك مۋلتفيلمدەردىڭ كەيىپكەرلەرى قابىلدانباق ەمەس. بايقاۋعا ەلىمىزدىڭ بارلىق وقۋشىلارى قاتىسا الادى. ەڭبەكتەر 15 قازانعا دەيىن قابىلدانىپ, 24 قازان كۇنى رەسپۋبليكالىق «ۇلان» گازەتىندە قورىتىندىسى جاريالانباق. ۇزدىك جۇمىستاردىڭ بارلىعى «جاس وركەن» سەرىكتەستىگىنە كىرەتىن گازەت-جۋرنالداردا جاريالانادى.
ايگۇل سەيىل, «ەگەمەن قازاقستان»