جولداۋدا ادامي كاپيتال ساپاسىن جاقسارتۋعا, ونىڭ ىشىندە ءبىلىم بەرۋ جۇيەسىنە ايرىقشا كوڭىل بولىنگەن. وندا وقىتۋ باعدارلامالارىن جاڭعىرتۋ, ياعني ءبىلىم الۋشىنىڭ سىني ويلاۋ قابىلەتىن دامىتۋ جانە ءوز بەتىمەن ىزدەنۋ داعدىلارىن قالىپتاستىرا وتىرىپ, ءبىلىمدى بارلىق سالادا قولدانۋ, ۇلتجاندىلىقتى دامىتۋ جونىندە مىندەتتەر ناقتى بەلگىلەنگەن. ەلدىڭ الەۋمەتتىك-ەكونوميكالىق, مادەني ءوسۋىنىڭ نەگىزگى كورسەتكىشتەرىنىڭ ءبىرى بولىپ تابىلاتىن ءبىلىم – جاھاندىق باسەكەگە قابىلەتتىلىكتى قامتاماسىز ەتەرى انىق. ەندەشە, ادامي كاپيتالدىڭ وزەگى بولعان ءبىلىم قاشان دا دامۋدىڭ كەپىلى بولماق.
ولاي بولسا, ۇلتتىڭ ۇلى ماقساتى مەن مۇراتىن ورىنداۋعا ۇلكەن ۇلەس قوساتىن جوعارى ءبىلىمدى مامان دايارلاۋ مەن تاربيەلەۋ وقىتۋشىلار قاۋىمىنا ۇلكەن ماقساتتار مەن مىندەتتەر جۇكتەيدى.
جولداۋدا قويىلعان ستراتەگيالىق مىندەتتەردى جۇزەگە اسىرۋ باعىتىنداعى ءىس-شارالار قازاق باس ساۋلەت-قۇرىلىس اكادەمياسىندا جان-جاقتى جۇزەگە اسىرىلىپ كەلە جاتىر. اكادەميا زامان سۇرانىسىنا ساي ساۋلەتشىلەر مەن ديزاينەرلەر, ينجەنەرلەر مەن جوبالاۋشى, قۇرىلىسشى ماماندارىن دايارلايدى. وقىتۋ ۇدەرىسىندە BIM – ينجەنەر-قۇرىلىس سالاسىندا پايدالانىلاتىن, ساندىق تۇردە عيماراتتاردىڭ ءبىر نەمەسە بىرنەشە ناقتى ۆيرتۋالدى مودەلدەرىن قۇراستىرۋعا مۇمكىندىك بەرەتىن جوبالاۋدىڭ ەڭ زاماناۋي جانە جەتىلدىرىلگەن تەحنولوگياسىنا ەرەكشە كوڭىل بولىنەدى. سونىمەن قاتار, Autodesk Revit, Autodesk Infrastructure Design Suite Premium, AutoCAD Civil 3D, AutoCAD Map3D, 3D MAX باعدارلامالارى دا كەڭىنەن قولدانىلادى. عيماراتتاردى اقپاراتتىق مودەلدەۋ تۇجىرىمداماسى ەسەپتەۋىش تەحنيكانىڭ ارحيتەكتۋرالىق جوبالاۋداعى ءرولىن تۇبىرىمەن وزگەرتەدى. بۇگىنگى تاڭدا BIM تەحنولوگياسى كومەگىمەن ءداستۇرلى سىزبالاردىڭ ورنىنا نىسانداردىڭ 3D ولشەمدى اقپاراتتىق مودەلى ناعىز قۇرىلىس الاڭىنىڭ شىنايى كورىنىسى بولماق.
اكادەميادا ستۋدەنتتەر مەن ماگيسترانتتاردىڭ ءبىلىمىن شىڭداۋ ماقساتىندا جىل سايىن ءداستۇرلى «ەنەرگيا شىعىندارىن ازايتۋ تەحنولوگيالارى مەن ميكرواحۋالدى جاقسارتۋدىڭ زاماناۋي تۇجىرىمدامالارى» جانە «URSA-مەن ەنەرگيا ۇنەمدەۋدىڭ زاماناۋي اسپەكتىلەرى» اتتى تاقىرىپتاردا كونكۋرس, «جاراتىلىستانۋ عىلىمدارىنىڭ وزەكتى ماسەلەلەرى مەن اقپاراتتىق تەحنولوگيالاردىڭ زاماناۋي تۇجىرىمداماسى» اتتى حالىقارالىق عىلىمي-ادىستەمەلىك كونفەرەنتسيالار, عىلىمي-تاجىريبەلىك, مادەني ءىس-شارالار وتكىزىلىپ تۇرادى.
جوعارعى وقۋ ورنىندا جۇمىس بەرۋشى ورىندارمەن بولاشاق مامانداردى دايىنداۋداعى بىردەن-ءبىر ستراتەگيالىق ارىپتەس رەتىندە تىعىز جۇمىس جاساۋ قولعا الىنعان. ماسەلەن, قۇرىلىس جانە ساۋلەت كومپانيا وكىلدەرىمەن كەزدەسۋلەر, دوڭگەلەك ۇستەلدەر ءجيى ۇيىمداستىرىلىپ تۇرادى. مۇنداي باس قوسۋلاردا ستۋدەنتتەر مەن ماگيسترانتتار پىكىرلەر الماسۋ ارقىلى العان بىلىمدەرىن پراكتيكادا قولدانۋعا, كاسىبي بىلىكتىلىگىن جەتىلدىرۋگە مۇمكىندىكتەر الادى. سونىمەن قاتار, جوعارعى كۋرس ستۋدەنتتەرى وندىرىستىك تاجىريبەدەن ءىرى قۇرىلىس كومپانيالارىندا, جوبالاۋ ينستيتۋتتارىندا جانە عىلىمي-زەرتتەۋ ينستيتۋتتارىندا وتەدى.
ۋربانيزاتسيا ۇدەرىسىنە قاتىستى ەلباسىنىڭ الداعى 15 جىلدا 1,5 ميلليون وتباسىن تۇرعىن ۇيمەن قامتاماسىز ەتۋگە باعىتتالعان تاپسىرماسى بويىنشا «نۇرلى جەر» تۇرعىن ءۇي باعدارلاماسىن جۇزەگە اسىرۋ قازاق باس ساۋلەت-قۇرىلىس اكادەمياسىندا ءوز ۇيلەسىمىن تاۋىپ, تىكەلەي ۇندەسىپ جاتىر. بۇل وقۋ ورنى ساۋلەت, ديزاين, قۇرىلىس, اعاش وڭدەۋ جانە تاعى باسقا قۇرىلىس سالاسىنداعى ماماندار دايارلاۋ ارقىلى وتانىمىزدىڭ دامۋىنا زور ۇلەس قوسۋدا. ەندەشە, باسەكەگە قابىلەتتى, جوعارى ءبىلىمدى, كاسىبي بىلىكتى مامان قاشان دا زامان سۇرانىسىنا يە.
ارايلىم ءسابيتوۆا, ايمان رىسباەۆا,
قازاق باس ساۋلەت-قۇرىلىس اكادەمياسىنىڭ وقىتۋشىلارى
الماتى