اۋىل اكىمدەرىن سايلاۋ 2017 جىلعى 11 شىلدەدە وزگەرىستەر مەن تولىقتىرۋلار ەنگىزىلگەن «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭىنا سايكەس وتكىزىلەدى. العاشقى اۋقىمدى اۋىل اكىمدەرىن سايلاۋ 2013 جىلى تامىزدا وتكەن ەدى. اكىمدەردىڭ وكىلەتتىك مەرزىمى – 4 جىل.
ورتالىق سايلاۋ كوميسسياسىنىڭ اقپاراتى بويىنشا, ەلىمىزدىڭ اۋداندىق ماڭىزى بار قالالارى, اۋىلدىق وكرۋگتەرى, اۋىلدىق وكرۋگتىڭ قۇرامىنا كىرمەيتىن كەنتتەرى مەن اۋىلدارى اكىمدەرىنىڭ بارلىق سانى – 2440. 2013 جىلى سايلانعان اكىمدەردىڭ وكىلەتتىك مەرزىمدەرىنىڭ اياقتالۋىنا, كەيبىر اۋىلدىق وكرۋگتەردىڭ جويىلۋىنا, سايلانعان اكىمدەردىڭ وكىلەتتىكتەرىنىڭ ۋاقىتىنان بۇرىن توقتاتىلۋىنا بايلانىستى 4-24 تامىز ارالىعىندا 1413 اۋىل اكىمى سايلاناتىن بولادى.
اۋىل اكىمدەرىن سايلاۋدى ۇيىمداستىراتىن ورگان وبلىستىق, اۋداندىق (قالالىق) سايلاۋ كوميسسيالارى بولىپ تابىلادى. اۋماقتىق سايلاۋ كوميسسيالارىنىڭ دەرەكتەرى بويىنشا, قازىرگى ۋاقىتتا 4056 كانديدات ۇسىنىلعان, ولاردىڭ ىشىندە تىركەلگەندەر سانى – 3895 كانديدات.
زاڭناماعا سايكەس, اۋداندىق ماڭىزى بار قالا, اۋىل, كەنت, اۋىلدىق وكرۋگ اكىمىن اۋداننىڭ (وبلىستىق ماڭىزى بار قالانىڭ) ءماسليحاتى اۋدان (وبلىستىق ماڭىزى بار قالا) اكىمى ۇسىنعان كانديداتتاردىڭ ىشىنەن جەرگىلىكتى قوعامداستىق وكىلدەرىمەن كەلىسكەن سوڭ سايلايدى. جەرگىلىكتى قوعامداستىقپەن كونسۋلتاتسيالار اۋدان اكىمدەرىنىڭ اۋىل, كەنت جانە قالا جۇرتشىلىعىنىڭ وكىلدەرىمەن كەزدەسۋلەرى تۇرىندە وتەدى. اۋىلدىق وكرۋگتەر اكىمدەرىن سايلاۋ ءتيىستى اكىمشىلىك-اۋماقتىق بىرلىكتەردە جاناما سايلاۋ قۇقىعى نەگiزiندە جاسىرىن داۋىس بەرۋ جاعدايىندا وتكiزiلەدi. سايلاۋ ءتيىستى اۋدان (وبلىستىق ماڭىزى بار قالا) ءماسليحاتىنىڭ دەپۋتاتتارى – تاڭداۋشىلاردىڭ وتىرىسىندا وتكىزىلەدى. وتىرىسقا تاڭداۋشىلاردىڭ كەمىندە ۇشتەن ەكىسى قاتىسسا, زاڭدى بولىپ تابىلادى.
تاڭداۋشىلار وتىرىسىندا اۋداندىق (قالالىق) ءماسليحاتتىڭ حاتشىسى توراعالىق ەتەدى. تاڭداۋشىلاردىڭ تىزىمدەرىن اۋداندىق (قالالىق) سايلاۋ كوميسسيالارى ءتيىستى ءماسليحات حاتشىسىنىڭ ۇسىنۋى بويىنشا جاسايدى جانە بۇل ءتىزىم داۋىس بەرۋگە ارنالعان پۋنكتتە ىلىنەدى. ءار تاڭداۋشىعا جاسىرىن داۋىس بەرۋ ءۇشىن سايلاۋ بيۋللەتەنى بەرىلەدى. داۋىس بەرۋ ءراسىمى اياقتالعان سوڭ اۋداندىق نەمەسە قالالىق اۋماقتىق سايلاۋ كوميسسياسى داۋىستاردى ساناۋعا كىرىسەدى. داۋىستاردى ساناۋ كەزىندە سالىستىرمالى ماجوريتارلىق جۇيە قولدانىلادى. ياعني, باسقا كانديداتتارمەن سالىستىرعاندا سايلاۋعا قاتىسقان تاڭداۋشىلاردىڭ كوپشىلىك داۋىسىن جيناعان كانديدات سايلانعان بولىپ ەسەپتەلەدى. ال اۋداندىق (قالالىق) سايلاۋ كوميسسياسى داۋىس بەرۋ ناتيجەلەرى بويىنشا سايلاۋ ناتيجەلەرى تۋرالى حاتتاما جاسايدى.
ەسكە سالا كەتەيىك, بۇعان دەيىن قازاقستان رەسپۋبليكاسىندا اۋداندىق ماڭىزى بار قالالار, اۋىلدىق وكرۋگتەر, اۋىلدىق وكرۋگتىڭ قۇرامىنا كىرمەيتىن كەنتتەر مەن اۋىلدار اكىمدەرىن سايلاۋ جاناما سايلاۋ قۇقىعى نەگىزىندە 2013 جىلعى 5-9 تامىز ارالىعىندا وتكەن بولاتىن.
ءاليسۇلتان قۇلانباي, «ەگەمەن قازاقستان»