ء«وزىم تۋىپ-وسكەن قالادا ماعان وسىنداي قۇرمەت, ءىلتيپات كورسەتىلىپ جاتقانىنا ريزامىن. سۋرەتشىلەرگە ۇلكەن العىسىمدى جەتكىزگىم كەلەدى. بۇل ماعان عانا كورسەتىلگەن قۇرمەت ەمەس, «تورپەدو» كومانداسىنا كورسەتىلگەن قۇرمەت دەپ تۇسىنەمىن. ەندى قالالىقتار تاۋەلسىزدىك كوشەسىمەن وتكەن سايىن ءبىزدىڭ كوماندانى جاقىنىراق تاني تۇسەدى دەپ ويلايمىن», - دەگەن حوككەيشى قابىرعاداعى سۋرەتتىڭ وزىنە 99 پايىز ۇقسايتىنىن ايتىپ, ءبىر جىميدى.
توعىز قاباتتى ءۇيدىڭ قابىرعاسىنداعى سۋرەتتى سالعان – الماتىداعى ت.جۇرگەنوۆ اتىنداعى ونەر اكادەمياسىنىڭ تۇلەكتەرى. ولار گرافيتتي ادىسىمەن بەدەرلەنگەن بۇل تۋىندىنى سالۋعا ءۇش اپتا ۋاقىتتارىن جۇمساعان جانە سۋرەتتىڭ بوياۋى 5-6 جىلعا دەيىن وشپەيتىنىن, سۋىققا دا, ىستىققا دا ءتوزىمدى ەكەنىن ايتادى. «بىزگە سۋرەت سالۋ جونىندەگى ۇسىنىس ينستاگرامم جەلىسى ارقىلى ءتۇستى. سوسىن قالالىق اكىمدىككە ءوزىمىزدىڭ ەسكيزىمىزدى ۇسىندىق. ءتورت ادام جۇمىس ىستەدىك. مىناداي توعىز قاباتتى ۇيدە سۋرەت سالۋ دا وڭايعا تۇسكەن جوق. سۋرەتكە قاراساڭىزدار, جوعارىدا تالعات جايلاۋوۆ تۇرسا, ونىڭ تومەنگى جاعىندا التايدىڭ اسقاق شىڭى مۇزتاۋ كورىنەدى. بۇل ارقىلى بىرىنشىدەن, ايگىلى حوككەيشىنىڭ قازاق حوككەيىندەگى بيىك ورنىن, ەكىنشىدەن, مۇز ايدىنىنىڭ بەينەسىن دە بەدەرلەگىمىز كەلدى», - دەيدى جوباعا قاتىسقان سۋرەتشىلەردىڭ ءبىرى, اتالعان وقۋ ورنىنىڭ ماگيسترانتى ايبەك نۇربەكوۆ.
وسكەمەننەن تۇلەپ ۇشقان تالعات جايلاۋوۆتىڭ سۋرەتىن تۋعان قالاسىنا سالۋ يدەياسىنىڭ اۆتورى قالا اكىمى قۋات تۇماباەۆ مۇنداي تۋىندىلاردى اقتوبە مەن تالدىقورعان شاھارلارىنان كورگەننەن كەيىن وزىنە وسىنداي وي كەلگەنىن ايتادى. «اۋەلدە ءتۇرلى ۇسىنىستار بولدى. تابيعاتتىڭ سۋرەتىن نەمەسە شىعىستان شىققان ايگىلى اقىن-جازۋشىلاردىڭ بەينەسىن سالدىرساق پا دەپ تە ويلادىق. الايدا وسى جوبانىڭ دەمەۋشىلەرى تالعات جايلاۋوۆتىڭ سۋرەتىن سالدىرايىق دەگەن ۇسىنىس ايتتى. ءبىز قولدادىق. ويتكەنى, وسكەمەن – ەلىمىزدەگى حوككەيدىڭ وتانى. سوندىقتان مۇنداي شاھاردا قالامىزدىڭ, وبلىسىمىزدىڭ عانا ەمەس, ەل ماقتانىشى جايلاۋوۆ سەكىلدى ۇزدىك حوككەيشىنىڭ سۋرەتىنىڭ قاسقايىپ تۇرعانى ورىندى دەپ ۇيعاردىق. ءبىر قىزىعى, وسى سۋرەت سالىنعاننان كەيىن شاھارداعى جانى جومارت ازاماتتاردان «تاعى دا باسقا تۇلعالاردىڭ سۋرەتتەرىن سالدىرايىق» دەگەن ۇسىنىستار ءتۇسىپ جاتىر. اماندىق بولسا, بىرەر ايدان سوڭ وسكەمەندەگى ۇيلەردىڭ قابىرعاسىنىڭ بىرىنەن وسىنداي تاماشا سۋرەتتى كورىپ قالۋلارىڭىز مۇمكىن», - دەيدى قالا اكىمى.
وسى جوباعا قارجىلاي قولداۋ بىلدىرگەن, تەحنيكالارىن ۇسىنعان «يۋكو» جشس-ءىنىڭ قۇرىلتايشىسى قاينار دۇيسەنوۆتىڭ ايتۋىنشا, ايگىلى حوككەيشىنىڭ سۋرەتى بەكەردەن بەكەر تاڭدالماعان. «جەرلەسىمىز تالعات جايلاۋوۆ مىڭداعان, ميلليونداعان جانكۇيەرى بار قازىرگى زامانداعى ەڭ ۇزدىك حوككەيشىلەردىڭ ءبىرى. «تورپەدونىڭ» چەمپيون اتانۋىنا سىڭىرگەن ەڭبەگى دە زور. سوندىقتان قالالىق اكىمدىككە وسىنداي ۇسىنىس جاسادىق. ءوزىم حوككەيشى بولماسام دا, بۇل سپورت ءتۇرىن ەرەكشە جاقسى كورەمىن. «تورپەدونىڭ» ويىندارىن ۇزبەي كورۋگە تىرىسامىن. تالعاتتى كاسىبي سپورتشى ءارى قاراپايىمدىلىعى ءۇشىن ەرەكشە قۇرمەت تۇتامىن», - دەيدى ول.
ازامات قاسىم,
«ەگەمەن قازاقستان»
وسكەمەن