«ۋاز» كولىگىن ءمىنۋ جاپونيادا «ناعىز ەركەك» بولۋدىڭ بەلگىسى كورىنەدى. سەبەبى, ونداي كولىكتى جۇرگىزۋ اجەپتاۋىر كۇشكە تۇسەدى. ولارداعىداي ءبارى اۆتوماتتاندىرىلماعان. ءبىزدىڭ ەلدە دە سوڭعى ۋاقىتتا ەسكى كولىكتى قايتا جاساپ, ساندەپ, وڭتايلاندىرىپ, زاماناۋيلاندىرىپ دەگەندەي, تاقىمعا باسقاندار جايلى ءجيى ەستۋگە بولادى. مۇندايلاردىڭ كوپشىلىگى نە جاعدايى جاقسى ادامدار, نە ءوزى كولىك جاساۋمەن اينالىساتىن شەبەرلەر.
ال ءبىزدىڭ كەيىپكەرىمىزدىڭ ولارعا اسا قاتىسى جوق. دەسە دە, بارىن بازارلاپ, ايتەۋىر ءمىنىپ ءجۇر عوي دەپ باسىنان سيپايتىنداي دا كۇيدە ەمەس. و باستا ونشا كوڭىل اۋدارماپپىز, كەيىن ءبىر دوسىنان «شوحانى» جاساۋ ءۇشىن «تويوتا-يپسۋم» دەگەن ماشينانى ساتىپ جىبەرگەنى جايلى ەستىگەندە قىزىعا باستادىق. ...كولىكپەن كەلە جاتىرمىز. جىپ-جيناقى, جەڭىل, ءجۇرىسى شيراق. ءسويتىپ كەلە جاتقاندا قاسىمىزداعى بىرەۋ: – انانى قارا, سەنىڭ «شوحاڭ» كەتىپ بارا جاتىر, – دەدى. تىزگىندە كەلە جاتقان جىگىت كادىمگىدەي وكپەلى داۋىسپەن ج ۇلىپ العانداي سويلەدى. – مەنىكى ەمەس! مەنىكىندەي بولۋ قايدا-ا-ا وعان! – اجەپتاۋىر تاۋسىلىپ وتىر.
قازاق ايتاتىن «ىشتەن شىققان شۇبار جىلان» دەگەن تىركەس ەسكە تۇسكەن. كەيىن وزىنەن سۇراپ, جاعدايعا قانىققان سوڭ عانا بۇلاي بولماس رەتى جوق ەكەنىن تۇيدىك. ءتىپتى, اكە-شەشەسى دە قارسى بولىپتى. سات تا, سات دەپ ءجيى ايتاتىن كورىنەدى. ولاردىكى تۇسىنىكتى, جۇرتتان الابوتەن, تۇك تاپپاي قالعانداي ەسكى كولىكپەن جۇرگەنىن قۇپتامايدى. جۇرتتان ۇيات! الگى «تويوتانى» دا وتباسىنان جاسىرىپ ساتىپ جىبەرگەن. كەيىپكەرىمىز بۇل قىلىعىن جۇرتتان ەرەكشەلەنۋ ءۇشىن ەمەس, بالا كەزدەن «جيگۋلي» كورىپ وسكەنىمەن تۇسىندىرەدى. بۇل يدەيانىڭ ناقتى قاشان, قالاي پايدا بولعانى جايلى سۇراققا «بىلمەيمىن سونى» دەپ بەيكۇنا عانا جاۋاپ بەرەدى.
كولىكتى جاساۋعا اكەسى مەن اعاسى كومەكتەسىپ تۇرادى. ال ءوزىنىڭ بۇكىل بوس ۋاقىتى وسىنىڭ ۇستىندە وتەدى. ۇلكەندەردىڭ قارسى بولاتىنىنىڭ ءبىر سەبەبى دە وسى بولسا كەرەك. ءسىرا, قۇمارلىعى بۇگىندە شىعارماشىلىق ءلاززات دەڭگەيىنە جەتكەن جايى بار. و باستا سۋرەتشى بولۋدى ارمانداعان ادام ءۇشىن بۇل دا ءبىر شىعارماشىلىق قوي راسىندا.
ماشيناسى شاعىن, ءوزى دە قالاقتاي عانا جىگىت وبلىستاعى جاس جۋرناليستەردىڭ ءبىرى. «جەتىسۋ» گازەتىندە ىستەيدى. ماۋلەن انەرباي دەگەن ءىنىمىز. «شامامەن 60 پايىزداي وزگەرتكەن شىعارمىن», دەيدى. كوپ جاعدايدا مۇنداي ەرەكشە كولىك «جاساۋشىلاردىڭ» كوپشىلىگى قىمباتتاۋ باعاعا ساتىپ جاتاتىن. ال ماۋلەندە ونداي وي جوق. ەستەلىك ءۇشىن ساقتاپ قويعىسى كەلەدى. «جاس كەزدەگى ءبىر قۇمارلىعىم» دەپ ەسكە الىپ جۇرۋگە تۇرارلىق دۇنيە, ايتارى جوق. دەگەنمەن, ءومىر بويى پايدالانامىن دەگەن ويى جوق سياقتى.
«93-جىلعى» كولىكتىڭ بۇرىنعى يەسى ورىستىڭ شالى ەكەن. جاقسى ساقتاپتى. ۇقىپتى شالدان جاقسى جاستىڭ قولىنا وتكەن باقىتتى ماشينانىڭ جاسى قاتارلاستارىنان الدەقايدا ۇزاق بولاتىنى ءسوزسىز. سەبەبى, الدەقاشان توزىپ, سۇيەگى ءشىرىپ كەتۋگە ءتيىس كولىككە ەكىنشى ءومىر سىيلاعان شەبەر ونىڭ ءومىرىن ۇزارتا ءتۇسۋ ءۇشىن ايانىپ قالمايتىن سياقتى. وزگەرتسەم دەگەن يدەيا جەتەرلىك. مىنە قالعاندار «ينوماركادا» وتىرعانداي بولاتىن» «شوحاعا» قاراپ يەسىنىڭ الداعى جوسپارلارى كەزەڭ-كەزەڭىمەن ىسكە اساتىنىنا سەنۋگە بولادى.
الماس ءنۇسىپ, «ەگەمەن قازاقستان»
الماتى وبلىسى