ءحىح عاسىردىڭ اياعى, حح عاسىردىڭ باسىندا ءومىر سۇرگەن اتاقتى قوبىزشى ىقىلاس دۇكەن ۇلى ءوز قولىمەن جاساپ, كەرەمەت كۇيلەردى اڭىراتىپ تارتقان قوبىزى بۇگىندە جامبىل وبلىستىق تاريحي-ولكەتانۋ مۋزەيىنىڭ قۇندى جادىگەرلەرىنىڭ قاتارىندا تۇر. بۇل قوبىزدى كۇيشىنىڭ ۇرپاقتارى قاستەرلەپ, اۋلەتتىڭ كيەلى, قاستەرلى زاتى رەتىندە ساقتاپ كەلگەن. قۇندى جادىگەردى مۋزەي قورىنا 2008 جىلى قوبىزشىنىڭ شوبەرە كەلىنى جامبىل وبلىسىنىڭ سارىسۋ اۋدانىنداعى جايلاۋكول اۋىلىنىڭ تۇرعىنى التىن اقىنباەۆا وتكىزگەن. بۇل اپامىزدىڭ ايتۋىنا قاراعاندا, ىقىلاس اتامىزدىڭ مۇراسىنا اۋەلى قوبىزشىنىڭ كىشى ۇلى اقىنباي مەن كەلىنى ءرازيا يەلىك ەتكەن. اقىنباي مارقۇم ەرتەرەكتە قايتىس بولعان سوڭ, ءرازيا اجەمىز وتكەن عاسىردىڭ 80-جىلدارىنا دەيىن قوبىزدى ەشبىر جانعا ۇستاتپاي, ءوز ۇيىندە ساقتاپ كەلگەن. اجەمىز قارتايعان سوڭ قوبىزدى ۇلى داۋلەت پەن كەلىنى التىنعا اماناتتاپ كەتكەن. ءبىر قىزىعى, بۇل قوبىزدىڭ الدا-جالدا اۋىلدا, اۋلەتتە جاقسى-جامان جاعداي بولا قالسا شەگى دىڭىلداپ, دىبىس شىعارىپ, بەلگى بەرەتىن قاسيەتى بولعانى جايلى اڭگىمە بار.
گۇلنۇر ەمبەرديەۆا