ولاردىڭ ىشىندە وتە تانىمال ساداقشىلار بار. مىسالى, «التىن جەبە» تۋرنيرىنە قاتىسۋعا تۇركيادان كەلگەن بۋنچۋككۋ مۇرات ات ۇستىنەن ساداق اتۋدان داڭقى شىققان مەرگەن. مۇرات مەرگەن 2015 جىلى «التىن وق» حالىقارالىق تۋرنيرىندە ات ۇستىنەن ساداق اتۋ باسەكەسىندە 1-ءشى ورىن يەلەنگەن. 2015 جىلعى حالىارالىق جارىستاردا كورەي ستيلىندە, جالپى كلاسسيكالىق ستيلدە ۇلتتىق ساداق اتۋدا بىرنەشە دۇركىن جەڭىمپاز اتانعان. 2016 جىلى وتكەن حالىقارالىق جارىستىڭ بىرىندە 1-ءشى ورىن, تاعى ءبىر جارىستاردا 2-ءشى جانە 3-ءشى ورىن يەلەنگەن. 2017 جىلى ەكى ءىرى حالىقارالىق تۋرنيردە ات ۇستىنەن ساداق اتۋدان ەكى مارتە 2-ءشى ورىندى جەڭىپ العان.
تۇركيا دەمەكشى, بۇگىنگى تاڭدا ەتنيكالىق ساداق اتۋ سپورتىن دۇنيەجۇزىلىك دەڭگەيگە كوتەرىپ, دامىتىپ وتىرعان مەملەكەتتىڭ ءبىرى – تۇركيا. تۇركيادا ەڭ كوپ وتەتىن جارىستىڭ ءتۇرى وسى ۇلتتىق ساداق اتۋ جارىستارى ەكەن. كوپتەگەن ءىرى قالالارىندا تەك ساداق اتۋعا ارنالعان ستاديوندار سالىنعان. اپتا سايىن ۇلتتىق ساداق اتۋدان بىرنەشە ءىرى جارىستار ۇيىمداستىرىلىپ تۇرادى.
سونىمەن قاتار, موڭعوليانىڭ ات ۇستىندە ساداق اتۋدان تانىلعان ۇزدىك مەرگەنى دۋنچيگ وتگونبيامبا كەلىپ وتىر. دۋنچيگ – موڭعوليا چەمپيوناتىنىڭ بىرنەشە دۇركىن جۇلدەگەرى, 2017 جىلى وتكەن مونعوليا چەمپيوناتىنىڭ جەڭىمپازى. كوپتەگەن حالىقارالىق جارىستاردىڭ قاتىسۋشىسى. 2014 جىلى جاپونيادا وتكەن حالىقارالىق جارىستا قولا جۇلدەنى, 2015 جىلى ۆەنگريادا وتكەن حالىقارالىق جارىستا كۇمىس جۇلدەنى جەڭىپ العان. 2016 جىلى قازاقستاندا وتكەن ا.اسقاروۆ اتىنداعى حالىقارالىق تۋرنيردە جامبى اتۋدان قولا جۇلدەگەر اتانعان.
تۇركيا سەكىلدى موڭعوليا ەلى دە ۇلتتىق ساداق اتۋدى ۇرپاقتان ۇرپاققا جالعاپ كەلە جاتقان جۇرت. بۇل ەلدە ەڭبەكتەگەن بالادان ەڭكەيگەن كارىگە دەيىن ۇلتتىق ساداق اتادى دەسەك, وتىرىك ەمەس. موڭعول حالقى بالۋان مەن مەرگەندى قاتتى قۇرمەتتەيدى. ساداق اتۋ مەن كۇرەستەن چەمپيون اتانعان سپورتشىنىڭ ۇلتتىق باس كيىمىندە ارنايى بەلگى تاعىلادى. وسى چەمپيوندىق بەلگىسى بار باس كيىممەن سپورتشى لاۋازىمدى مەملەكەتتىك قىزمەتكەردىڭ الدىنا بارسا, لاۋازىمدى قىزمەتكەر سپورتشىنىڭ ماسەلەسىن دەرەۋ شەشىپ بەرۋگە مىندەتتى. موڭعوليا ۇلتتىق سپورتتاعى ساڭلاقتارىن وسىنداي دارەجەدە قۇرمەتتەيدى.
دۋنچيگ وتگونبيامبامەن بىرگە «التىن جەبە» تۋرنيرىندە مونعوليانىڭ مەرگەن قىزى – بااتارچۋلۋن گەرەلچۋلۋن دا باق سىناپ كورمەكشى. ءوز ەلىندە قۇرالايدى كوزگە اتقان ساڭلاقتار قاتارىندا تۇرعان 23 جاسار گەرەلچۋلۋن قىز ۇلتتىق ساداق اتۋ جارىستارىنان جەڭىپ العان جۇلدەلەرى سانىنا جانكۇيەرلەرىنىڭ ءوزى ءجيى جاڭىلىپ جاتادى ەكەن.
جامبى جارىسىنىڭ جانكۇيەرلەرى پولشانىڭ اتاقتى مەرگەنى رادوسلاۆ كوزۋچتىڭ ونەرىن تاماشالايتىن بولادى. رادوسلاۆ – 2014-2015-2016 جىلدارى پولشا قۇراما كوماندا قۇرامىندا ەۋروپا گران-پري باسەكەسىندە 1-ءشى ورىندى جەڭىپ العان. 2017 جىلى ماجارستاننىڭ پوماز قالاسىندا وتكەن ەۋروپا گران-پري باسەكەسىندە كورەي ستيلىندە اتۋدان 2-ءشى ورىن يەلەنگەن. 2017 جىلى تۇركيادا وتكەن «التىن وق» فەستيۆالىندە 5-ءشى ورىن العان. سونداي-اق, ول تۇركيا, ۆەنگريا, شۆەتسيا, فرانتسيا, گەرمانيا ەلدەرىندە ۇيىمداستىرىلعان كوپتەگەن حالىقارالىق جارىستارعا قاتىسىپ, جۇلدەگەر اتانعان.
ەلدى ەلەڭدەتكەن ەرەكشە سايىس12-13 تامىز كۇندەرى استاناداعى «قازانات» اتشابارىندا وتەدى.