ونى استاناعا اتباسىن بۇرعان شەتەلدىك قوناقتار مەن كورمەنى قىزىقتاۋعا كەلگەن ءوز وتانداستارمىز تاماشالاۋ ۇستىندە. وسى ورايدا, كورمەنىڭ سوڭىنا دەيىن جالعاساتىن سپورتتىق شارانى ويداعىداي ۇيىمداستىرىپ, ابىرويمەن اتقارىپ كەلە جاتقان مادەنيەت جانە سپورت مينيسترلىگى ۇلتتىق جانە ات سپورتى تۇرلەرى ورتالىعىنىڭ ديرەكتورى مۇراتبەك قىپشاقباەۆپەن اڭگىمەلەسكەن ەدىك.
– مۇراتبەك سۇلتانبەك ۇلى, ءوزىڭىز باسقارىپ وتىرعان ورتالىقتىڭ قۇرىلعانىنا دا كوپ بولا قويعان جوق, دەسە دە, سىزدەر ەكسپو كورمەسىن وتكىزۋ شاراسىنا ءبىر كىسىدەي ات سالىسىپ جاتىرسىزدار. جۇمىستارىڭىز تولىق جۇيەلەندى مە؟
– ەلباسى نۇرسۇلتان نازارباەۆتىڭ وتكەن جىلدارداعى جولداۋىندا, «بۇقارالىق سپورت جانە دەنە شىنىقتىرۋدى دامىتۋ ماسەلەسى ۇلت ساۋلىعىن قامتاماسىز ەتەدى» دەپ مالىمدەگەنىندەي, وسىدان جارتى جىل بۇرىن ۇلتتىق سپورت تۇرلەرىن دامىتۋ جانە ونى عىلىميلاندىرۋ ماقساتىندا مادەنيەت جانە سپورت مينيسترلىگىنە قاراستى ۇلتتىق جانە ات سپورتى تۇرلەرى ورتالىعى قۇرىلعان بولاتىن.
ورتالىقتىڭ جاڭادان پايدا بولۋىمەن ەكسپو-2017 كورمەسىنىڭ وتكىزىلۋى دالمە-ءدال ساي كەلدى. مىنە, ەكى ايداي ۋاقىت بولدى قالانىڭ شەتىندە ورنالاسقان «قازانات» اتشابارىندا ۇلتتىق سپورت تۇرلەرىن – شەتەلدىك قوناقتار مەن ەلىمىز تۇرعىندارىنا ناسيحاتتاۋ ىسىمەن ۋاقىتپەن ساناسپاي اينالىسىپ جاتىرمىز. باسىندا ازداپ قوبالجۋلار بولدى. «كوش جۇرە تۇزەلەدى» دەمەكشى, قازىر جىگىتتەردىڭ تاقىمى شىڭدالدى, بويداعى الاڭنان ارىلدى, جاتتىعۋ جۇيەلەندى, كىمگە بولسىن ۇيالماي ونەر كورسەتەتىن دارەجەگە جەتتىك.
– كورەرمەنگە ۇلتتىق سپورتتىڭ قانداي تۇرلەرىننەن ۇسىنىپ وتىرسىزدار؟
– قازىرگى تاڭدا ورتالىق قۇزىرىنا ۇلتتىق سپورتتىڭ 10 ءتۇرى قامتىلىپ وتىر. اتاپ ايتقاندا, كوكپار, بايگە تۇرلەرى, تەڭگە ءىلۋ, اۋدارىسپاق, قازاق كۇرەسى, كلاسسيكالىق ات سپورتى تۇرلەرىنە جاتاتىن – كونكۋر, ءۇش سايىس سياقتى تۇرلەرى بار. وسىلاردىڭ ىشىنەن ات ءۇستى ويىندارى («جيگيتوۆكا»), تەڭگە ءىلۋ, اۋدارىسپاق, قىز قۋ, جامبى اتۋ تۇرلەرى بويىنشا ۇلتتىق قۇراما مۇشەلەرى وزدەرىنىڭ ونەرىن كورسەتۋدە. قويىلىم ءارى كەتسە ءبىر جارىم, ەكى ساعاتقا سوزىلادى. شاراعا ۇلتتىق قۇرامانىڭ جاستار جانە جاسوسپىرىمدەر توبى تارتىلعان. ەكسپو ايدىنىندا ونەر كورسەتىپ جۇرگەن دە وسى ازاماتتار. كورمەنىڭ العاشقى ايىندا ءبىر كۇندە ەكى دۇركىن كورسەتىلىم ۇيىمداستىردىق. قازىر بۇل كەستە وزگەردى. قازىر كۇنىنە ءبىر دۇركىن كەشكى ساعات 18.00-دە وتكىزىپ ءجۇرمىز. بىراق سەنبى-جەكسەندى كۇندەرى بۇرىنعىداي ەكى مەزگىل ونەر كورسەتەمىز. شاباندوزدار قاتارىندا ۇلتتىق سپورت تۇرلەرىنەن ەلىمىز چەمپيوندارى مەن جۇلدەگەرلەرى بار.
– بولاشاقتا ۇلتتىق سپورت تۇرلەرى بويىنشا ادىستەمەلىك وقۋلىقتار جاساۋ, وقۋ-جاتتىعۋ جيىنىن وتكىزۋ تالابى قاراستىرىلعان با؟
– ارينە, ونسىز بولمايدى. ايتا كەتۋ كەرەك, ۇلتتىق سپورت رۋحىمىزدى اسقاقتاتادى. ورتالىقتىڭ جۇمىس اتقارۋ جارعىسىندا «وقۋ-ادىستەمەلىك قۇرال جاساۋ» تۋرالى باپ جوق ەدى. جۋىقتا جارعىعا وزگەرىس ەندى. بۇدان بىلاي ورتالىق وقۋ-ادىستەمەلىك قۇرال جاسايتىن مۇمكىندىككە قول جەتكىزدى. ونىڭ سىرتىندا كەلەسى جىلدان باستاپ مەكەمەنىڭ قۇزىرى كەڭەيمەك. ۇلتتىق سپورت تۇرلەرى بويىنشا وتەتىن بارلىق رەسمي جارىستار وسى ورتالىقتىڭ قۇزىرىنا بەرىلەتىنى جايلى شەشىمدى كۇتىپ وتىرمىز. ناقتىراق ايتقاندا, ەرەسەكتەر, جاستار مەن جاسوسپىرىمدەر قۇراماسىنىڭ رەسمي جارىستارىن باقىلايتىن جانە وتكىزەتىن بولامىز. مادەنيەت جانە سپورت مينيسترلىگى ۇلتتىق شتاتتىق كوماندالار جانە سپورت رەزەرۆى ديرەكتسياسى قۇرامىنداعى ۇلتتىق سپورت تۇرلەرى بويىنشا كوماندا جەتەكشىسىنەن باستاپ, بارلىق باپكەرلەر ورتالىقتىڭ قاراماعىنا وتەدى.
ال وقۋ-جاتتىعۋ جيىنىنا كەلەر بولساق, «قازانات» اتشابارىندا كۇندەلىكتى ءوتىپ جاتقان شارالار ءبىر جاعىنان ۇلتتىق سپورتتى ناسيحاتتاۋ بولسا, ەكىنشى تاراپتان وقۋ-جاتتىعۋ جيىنى دەۋگە تولىق نەگىز بار. قازاقشا ايتقاندا, ء«بىر وقپەن ەكى قويان اتىپ» جاتىرمىز.
– الدا قانداي جوسپارلارىڭىز بار؟
– ءبازبىر ۇلتتىق سپورت تۇرلەرىنەن, مىسالى, جامبى اتۋ, اۋدارىسپاقتان جىلىنا ءبىر رەت وتەتىن رەسمي چەمپيوناتتان باسقا ەشقانداي جارىس جوق. قانداي ءبىر سپورتتى دامىتۋ ءۇشىن كەم دەگەندە جىلىنا ءۇش-ءتورت تۋرنير كۇنتىزبەلىك كەستەگە قويىلۋى ءتيىس. وسى ولقىلىقتىڭ ورنىن تولتىرۋ ماقساتىندا شىلدە ايىنىڭ 27-28 كۇندەرى ورتالىقتىڭ ۇيىمداستىرۋىمەن تەڭگە ءىلۋ, جامبى اتۋ جانە اۋدارىسپاقتان «ەكسپو كۋبوگى» وتكىزىلدى. وعان بارلىق وبلىستار جانە استانا, الماتى قالالارىنىڭ كوماندالارى قاتىستى. جارىس استانا قالاسىندا ءوتتى.
اڭگىمەلەسكەن بەكەن قايرات ۇلى,
«ەگەمەن قازاقستان»