فارماتسەۆتيكا سالاسىنىڭ قۇنى شارىقتاپ تۇرعان قازىرگى زاماندا تەگىن نەمەسە جەڭىلدىكپەن بەرىلەتىن دارىلەر جۇرتشىلىققا ۇلكەن كومەك ەكەنى ءسوزسىز. مىسالى, اعزاسىن اۋىستىرعاندار وتادان كەيىن ءومىر بويى يممۋنيتەتتى تومەندەتەتىن دارىلەر قابىلداۋعا ءماجبۇر. ەگەر ونى ىشپەسە, جاڭادان سالىنعان باۋىر نەمەسە بۇيرەك يممۋنيتەتتىڭ شابۋىلىنا ۇشىراپ, جارامسىز بولىپ قالۋى مۇمكىن. ال يمۋننودەپرەسسانتتاردىڭ قۇنى وتە قىمبات, بىرەۋى شامامەن 40 000-60 000 تەڭگە ارالىعىن قۇرايدى. مۇنداي دارىلەردى ساتىپ الا بەرۋدى قاراپايىم حالىقتىڭ قالتاسى كوتەرمەسى انىق. سوندىقتان قازاقستان ءوز ازاماتتارىنا كومەك رەتىندە كەيبىر دارىلەردى تەگىن بەرىپ كەلەدى. كوپتەگەن مەملەكەتتەردە مۇنداي جەڭىلدىكتەر قاراستىرىلماعان. جەر بەتىندە اعزاسىن اۋىستىرىپ امان قالعانىمەن, وعان قاجەتتى ءدارىنى الا الماي اجال قۇشقاندار قانشاما...
ەلىمىزدىڭ دەنساۋلىق ساقتاۋ مينيسترلىگى كۇنى كەشە «تەگىن مەديتسينالىق كومەكتىڭ كەپىلدىك بەرىلگەن كولەمىنىڭ شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ جۇيەسىندە امبۋلاتوريالىق دەڭگەيدە تەگىن نەمەسە جەڭىلدىكپەن قامتاماسىز ەتۋگە ارنالعان دارىلىك زاتتارمەن جانە مەديتسينالىق ماقساتتاعى بۇيىمدارمەن, ونىڭ ىشىندە بەلگىلى ء بىر اۋرۋلارى (جاي-كۇيلەرى) بار ازاماتتاردىڭ جەكەلەگەن ساناتتارىنا ارنالعان دارىلىك زاتتاردىڭ جانە مامانداندىرىلعان ەمدىك ونىمدەردىڭ تىزبەسىن بەكىتۋ تۋرالى» بۇيرىق شىعاردى. اتالعان بۇيرىق 2018 جىلدىڭ 1 قاڭتارىنان كۇشىنە ەنەدى.
مينيسترلىكتىڭ بۇيرىعىندا بەلگىلى ءبىر اۋرۋدى ەمدەۋگە تەگىن بەرىلەتىن ءدارى-دارمەكتىڭ تىزبەسى بەكىتىلگەن. اتاپ ايتقاندا, ارتەريالدىق گيپەرتەنزيا, اسقازاننىڭ ويىق جاراسى, تىنىس دەمىكپەسى, قاتەرلى ىسىك اۋرۋلارى, تۋبەركۋلەز, گەماتولوگيالىق اۋرۋلار, گەموبلاستوزدار, اپلازيالىق انەميا, بالالاردىڭ تسەرەبرالدىق سال اۋرۋى, پسيxيكالىق سىرقاتتار, ايتۆ ينفەكتسياسى سىندى باس-اياعى 48 اۋرۋ تۇرىنە تەگىن بەرىلەتىن دارىلەر تىزبەسى بار. بۇلاردىڭ قاتارىنا جاڭادان بەحتەرەۆ اۋرۋى قوسىلدى. ومىرتقانىڭ قيمىلسىز قالۋىمەن سيپاتتالاتىن سوزىلمالى دەرتكە شالدىققاندار ەندى قاجەتتى دارىلەردى تەگىن الا الادى.
جالپى, مينيسترلىك بەكىتكەن دارىلەردىڭ جاڭا تىزبەسىندە تيىمدىلىگى دالەلدەنگەن 59 جاڭا ءدارى, 256 دارىلىك زات بار ەكەنىن اتاپ وتكەن ءلازىم. مۇنداي دارىلەرمەن ديسپانسەرلىك ەسەپتە تۇرعان 2 ميلليوننان استام ادام قامتىلادى دەپ جوسپارلانىپ وتىر. بۇل وزگەرىستەر مۇگەدەكتىك دەڭگەيىن, الەۋمەتتىك ماڭىزى بار اۋرۋلاردان بولاتىن ءولىم-ءجىتىمدى ازايتۋدى كوزدەيدى, دەيدى مينيسترلىكتىڭ ءباسپاسوز قىزمەتى.
قىمبات توقتامۇرات, «ەگەمەن قازاقستان»