ۇلتتىق سپورت تۇرلەرى قاۋىمداستىعىنىڭ ءباسپاسوز قىزمەتكەرى تولەگەن جاكىتاي ۇلى تاراتقان اقپار بويىنشا جوعارىداعى مارتەبەلى جارىسقا ەلىمىز ساداقشىلارىمەن قاتار, ات ءۇستى ءارى شابىس بارىسىندا ساداق اتۋدان الەمگە تانىمال ماجارلىق مەرگەن كاششاي لايوش پەن ونىڭ ارىپتەستەرى قۋماندىق ساداقشىلار چەمەز فاركاس جانە نامەتي كريستوفلەر جامبى اتۋ سايىسىندا باق سىنايتىن كورىنەدى.
بۇگىنگى تاڭدا ەتنيكالىق ساداق اتۋ سپورتىن دامىتىپ وتىرعان جۇرتتىڭ ءبىرى – تۇركيادان ساداقشى-باپكەر لەۆەنت تالحا مەن ونىڭ شاكىرتى مۇرات بونجۋك باستاعان مەرگەندەر سايلانىپ شىقسا, مالايزيالىق سۇرمەرگەن احما داكالان, پولياك ساداقشىسى رادوسلاۆ كوزۋچ, رۋمىنيالىق ميحاي كوزمەي (Mihai Cozmei), فينليانديالىق اننا كاتاۆينا (اnna Kataviina), قاتار ەلىنەن ۆاليد حاۆاجۋيك (Walid Khawajkyc), نەمىس سپورتشىسى دجۋليا جوزەفينا سالتس (Giulia Josefine Salts) سىندى ساداقشىلار قورامساعىن قانجىعالاپ, جەبەسىن سايلاپ ەلوردادا وتەتىن الامان سايىسقا ات باسىن تىرەيدى. بۇلاردان باسقا جاقىن كورشى ەلدەر: قىرعىزستان, وزبەكستان, موڭعوليا, رەسەي, قىتاي مەرگەندەرى دە حالىقارالىق جارىستان تىس قالمايدى.
تاريحتا تۇڭعىش رەت ۇيىمداستىرىلىپ وتىرعان مۇنداي مارتەبەلى جارىسقا قازاق مەرگەندەرى – جامبى اتۋدان « ۇلى دالا ويىندارى» فەستيۆالىنىڭ جەڭىمپازى ەلدوس باداشەۆ باستاعان جاس جامبىشىلار: ايتبەك سارىباي, ايكوز ەرالحان, ابزال تۋلىبەكوۆ, بەكقالي ۇزدەنباەۆتار ەل نامىسىن قورعايدى.
ءتۋرنيرىنىڭ جۇلدە قورى دا قوماقتى. بەسىنشى ورىنعا دەيىنگى بايگەنىڭ ءباسى بار. ياعني, ءبىرىنشى ورىنعا – 5 مىڭ, ەكىنشى ورىنعا – 3 مىڭ, ءۇشىنشى ورىنعا – 2 مىڭ, ءتورتىنشى ورىنعا – 1 مىڭ, سوڭعى جۇلدە بەسىنشى ورىن ءۇشىن – 500 دوللار كولەمىندە سىيلىق تاعايىندالعان.
بەكەن قايرات ۇلى,
«ەگەمەن قازاقستان»