وبلىس ورتالىعىنداعى قالالىق اۋرۋحاناعا تۇسكەن بەس ادامنىڭ ەكەۋى دارىگەرلەردىڭ قابىلداۋىنان كەيىن ۇيلەرىنە قايتارىلعان كورىنەدى. تابيعاتتىڭ توسىن مىنەزىنەن ەڭ قاتتى زارداپ شەككەن - 82 جاستاعى وسكەمەندىك تىل ارداگەرى شەريازدان يسانوۆ. قاريانىڭ ۇستىنە ءۇيدىڭ توبەسىندە جاتقان پروفليست قۇلاپ, سونىڭ سالدارىنان وكپەسىنە زاقىم كەلىپتى. دارىگەرلەر مەن اقساقالدىڭ تۋىستارى قازىر اۋىر حالدە اۋرۋحانادا جاتقان ارداگەرگە تۇرعىندار تاراپىنان قان تاپسىرىلىپ, جاردەم كورسەتىلسە دەيدى.
توسىننان ورىن العان جاعدايعا وراي وبلىستىق اقپاراتتىق ورتالىقتا شۇعىل بريفينگ وتكىزگەن توتەنشە جاعداي دەپارتامەنتى مەن «كازگيدرومەت» ماماندارى قازىرگى ۋاقىتتا وقيعانىڭ ءمان-جايىن, شىعىن كولەمىن انىقتاۋ ءۇشىن وبلىس اكىمدىگى جانىنان ارنايى كوميسسيا قۇرىلعانىن, قالپىنا كەلتىرۋ جۇمىستارى جۇرگىزىلىپ جاتقانىن حابارلادى. جولىنداعىسىن جايپاپ وتكەن قاتتى داۋىلدان كەيىن «112» جانە «101» جەلىلەرىنە وسكەمەن قالاسىنان 100-دەن استام ادام قوڭىراۋ شالىپ, وپىرىلىپ قۇلاعان اعاشتار, ۇشقان شاتىرلار, ۇستىنە زات قۇلاپ, ب ۇلىنگەن كولىكتەردىڭ بار ەكەنىن ايتىپتى. ۇلان, گلۋبوكوە, جارما اۋداندارى مەن وبلىس ورتالىعىنىڭ كەيبىر شاعىن اۋداندارىندا ىشقىنا سوققان جەلدىڭ كەسىرىنەن جارىق ءسونىپ قالعان بولاتىن. قازىرگى ۋاقىتتا قۇتقارۋشىلار وقيعا ورنىنا بارىپ, ءاربىر تۇسكەن حاباردى تەكسەرىپ جاتقان كورىنەدى. «كازگيدرومەت» مەكەمەسىنىڭ مالىمەتىنە سۇيەنسەك, وسكەمەن قالاسىندا جەلدىڭ جىلدامدىعى سەكۋندىنا 24, كوكپەكتى اۋدانىندا 25, زىريان اۋدانىنىڭ سەلەزەنكا اۋىلىندا 34 مەترگە جەتىپتى. توتەنشە وقيعا ورىن العاننان كەيىن كولىگى قيراپ, كوڭىل-كۇيى تۇسكەن كەيبىر تۇرعىندار تاراپىنان: «توتەنشە جاعداي قىزمەتكەرلەرى داۋىلدىڭ بولاتىنىن ەسكەرتپەدى. دابىل بەلگىسىن بىلدىرەتىن سمس حابارلاما جىبەرمەدى. ولاردى سوتقا بەرەمىز» دەگەن سوزدەر ايتىلعان ەدى. وبلىستىق توتەنشە جاعداي دەپارتامەنىنىڭ توتەنشە وقيعالاردى جويۋ ءبولىمىنىڭ باسشىسى ازامات قاپىشەۆ وسى جايتكە بايلانىستى تۇسىنىكتەمە بەردى. ء«بىز «كازگيدرومەت» مەكەمەسىنىڭ دەرەكتەرىنە سۇيەنە وتىرىپ, جەكسەنبى كۇنى تۇستەن كەيىن ءموبيلدى قوسىمشا جانە ۆەدومستۆونىڭ رەسمي سايتى ارقىلى 17 شىلدەدە سەكۋندىنا 20 مەتر جىلدامدىقپەن جەل تۇراتىنى جايىندا حابارلادىق. الايدا دابىلدى ەسكەرتەتىن حابارلاما جەلدىڭ جىلدامدىعى سەكۋندىنا 25 مەترگە جەتەتىنى بولجانعاندا عانا جىبەرىلەدى. سمس-ءتىڭ جىبەرىلمەۋىنىڭ ءمانىسى وسىندا», - دەيدى ول.
ايتپاقشى, وبلىس تۇرعىندارىنا ارقانى كەڭگە سالۋعا ءالى ەرتە سەكىلدى. «كازگيدرومەت» ماماندارى جاڭبىر ارالاس قاتتى داۋىل جاقىن كۇندەرى تاعى دا قايتالانۋى مۇمكىن ەكەندىگىن ەسكەرتەدى.
ازامات قاسىم,
«ەگەمەن قازاقستان»
شىعىس قازاقستان وبلىسى