«كاتەردىڭ سۋداعى سىيىمدىلىعى 27 توننا, مۇنىڭ ەرەكشەلىگى – وتە جۇردەكتىگىندە. جاڭا كاتەردىڭ جىلدامدىعى 50 ۋزەلعا دەيىن جەتەدى, بۇل شامامەن ساعاتىنا 100 شاقىرىم الا الادى دەگەن ءسوز. ءبىزدىڭ زاۋىتتا وسى سىنىپتى كاتەرلەردىڭ بەسىنشىسى كاسپي تەڭىزىنە اتتانعالى وتىر. الدىڭعىلارىنان ءبىر وزگەشەلىگى – كاتەردىڭ كورپۋسى جاڭارتىلعان», دەيدى ورال قالاسىنداعى «زەنيت» زاۋىتىنىڭ ديرەكتورى ۆياچەسلاۆ ۆاليەۆ.
FC-19 جوباسى بويىنشا ورالدىق العاشقى كاتەردىڭ ۇلگىسى 2009 جىلى جاسالىپ, تاپسىرىلعان ەدى. ەلىمىزدىڭ سۋداعى مەملەكەتتىك شەكاراسىن قورعاۋعا, كاسپي تەڭىزىنىڭ قازاقستاندىق بولىگىندە زاڭسىز بالىق اۋلاۋعا, كونتراباندالىق وپەراتسيالارعا ارنالعان بۇل كۇزەت كاتەرلەرى جۇردەكتىگىمەن ءارى كىلت بۇرىلىستى قيمىلعا يكەمدىلىگىمەن تانىلعان. كاتەرگە زاماناۋي بايلانىس جانە باعدار قۇرالدارى ورناتىلعان. 5 باللدىق تەڭىز داۋىلىنا شىداس بەرىپ, بازاعا امان-ەسەن ورالادى دەيدى ماماندار.
قازاقستان رەسپۋبليكاسى ۇقك شەكارا قىزمەتى باستىعىنىڭ ورىنباسارى سەرىك قالدىباەۆ بۇل كاتەرلەردىڭ شەكارالىق ايماقتا زاڭسىز بالىق اۋلايتىن براكونەرلەرگە قارسى كۇرەستە تاپتىرماس كولىك ەكەندىگىن ايتادى.
كاتەر زاۋىتتا ءبىر جىلدان اسا ۋاقىت جاسالعان. جاقىن كۇندەرى سىناق باستالماق.
قازبەك قۇتتىمۇرات ۇلى, «ەگەمەن قازاقستان»
سۋرەتتى تۇسىرگەن ايباتىر نۇراش