شارا بارىسىندا قازاقستان رەسپۋبليكاسى مەن يسپانيا كورولدىگى اراسىندا بىرقاتار ماڭىزدى قۇجاتتارعا قول قويىلدى.
«بۇگىن ءبىز دەنساۋلىق ساقتاۋ سالاسىنداعى ۇزدىك كومپانيالاردىڭ ءبىرى «EUROFINSA S.A.» كومپانياسىمەن مەموراندۋمعا قول قويدىق. ءبىزدىڭ سەرىكتەستەرىمىز قازاقستانداعى مەملەكەت-جەكەمەنشىك ارىپتەستىگىنە ات سالىسۋعا ىنتالى. دالىرەك ايتساق, زاماناۋي كلينيكالار سالۋ, تەحنولوگيا الماسۋ, مەديتسينالىق نىساندار قۇرىلىسىنان باستاپ, قۇرال-جابدىق جەتكىزۋ مەن ونىڭ ودان ءارى قولدانىلۋىنا دەيىن اينالىساتىن بولادى. قازىر ءبىز شەتەلدىك ينۆەستورلارعا ارناپ جوبالاردىڭ توپتاماسىن ازىرلەۋدەمىز. بۇل الماتى مەن استانا قالالارىندا ستۋدەنتتىك كلينيكالار سالۋ مەن اۋدانداردا ينفراقۇرىلىمدىق جوبالاردى جۇزەگە اسىرۋ», دەيدى دەنساۋلىق ساقتاۋ ۆيتسە-ءمينيسترى الەكسەي تسوي.
ء«بىز مەموراندۋمدارعا قول قويىلعاندىعىنا وتە قۋانىشتىمىز. بۇل ارقىلى قازاقستانمەن سانيتارلىق قىزمەت سالاسىندا سەرىكتەستىكتىڭ نەگىزى قالانۋدا دەپ ەسەپتەيمىن. بىزدە الەم بويىنشا 30 شاقتى جوبامىز بار. بۇگىننەن باستاپ قازاقستانمەن سەرىكتەستىكتىڭ باستالعانىنا ءدان ريزامىز. ءبىزدىڭ كومپانيانىڭ دەنساۋلىق ساقتاۋ سالاسىندا جيناعان تاجىريبەسى مول. سوندىقتان بار بىلگەنىمىزبەن قازاقستاندا بولىسكىمىز كەلەدى. سوڭعى 5 جىل ىشىندە 2 ميلليارد اقش دوللارىن ءتۇرلى ماڭىزدى جوبالارعا ينۆەستيتسيالادىق», دەيدى «EUROFINSA» كومپانياسىنىڭ وڭىرلىك ديرەكتورى يگناسيو كاسانوۆاس.
2017 جىلعى 15 شىلدەدە استانادا قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ جانە يسپانيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى پەدرو حوسە سانس سەررانو قازاقستان رەسپۋبليكاسىنىڭ ۇكىمەتى مەن يسپانيا كورولدىگىنىڭ ۇكىمەتى اراسىنداعى قۇپيا اقپاراتتى ءوزارا قورعاۋ تۋرالى كەلىسىمگە قول قويدى.
سونىمەن قاتار, شارا بارىسىندا قازاقستان رەسپۋبليكاسى دەنساۋلىق ساقتاۋ مينيسترلىگى مەن «EUROFINSA» كومپانياسى اراسىنداعى قازاقستان رەسپۋبليكاسىنىڭ دەنساۋلىق ساقتاۋ سالاسىنداعى ينفراقۇرىلىم مەن مەملەكەت-جەكەمەنشىك ارىپتەستىگىن دامىتۋ جونىندەگى ىنتىماقتاستىق تۋرالى مەموراندۋمعا قول قويىلدى.
بۇگىننەن باستاپ قازاقستان يسپانيامەن اۆياتسيا سالاسىندا دا سەرىكتەس اتاندى. «قازاقستانداعى اۆياتسيالىق يندۋستريا» جشس باس ديرەكتورىنىڭ مىندەتىن اتقارۋشى سىرىمبەك سادۋاقاسوۆ جانە «Airbus Defense and Space» كومپانياسىنىڭ اسكەري ۇشاقتاردى ساتۋ بويىنشا باسشىسى وسكار الونسو رومەرو «قازاقستاندىق اۆياتسيالىق يندۋستريا» جشس جانە «Airbus Defense and Space» كومپانياسى اراسىنداعى تەحنيكالىق قولداۋ سالاسىنداعى ىنتىماقتاستىق تۋرالى كەلىسىمگە قول قويدى.
تاعى ءبىر جاعىمدى جاڭالىق, «Astana» الەۋمەتتىك-كاسىپكەرلىك كورپوراتسياسى» ۇلتتىق كومپانياسى» اكتسيونەرلىك قوعامى باسقارماسىنىڭ توراعاسى ايداربەك قوجانازاروۆ جانە «IMASA» كومپانياسىنىڭ حالىقارالىق ديرەكتورى لۋيس گوسنەگو «Astana» الەۋمەتتىك-كاسىپكەرلىك كورپوراتسياسى» ۇلتتىق كومپانياسى» اكتسيونەرلىك قوعامى مەن «IMASA» كومپانياسى اراسىنداعى استانا قالاسىندا ءمودۋلدى قۇرىلىمداردى پايدالاناتىن زاۋىتتى قۇرۋ جونىندەگى ىنتىماقتاستىق تۋرالى مەموراندۋمعا قول قويىلدى.
ەكى ەلدىڭ وكىلدەرى بىرلەسىپ ەكسپو-2017 حالىقارالىق كورمەسى اۋماعىندا ورنالاسقان يسپانيا كورولدىگىنىڭ پاۆيلونىن تاماشالادى. شارا سوڭىندا قوناقتار ەستەلىك سۋرەتكە ءتۇسىپ, كورمە تۋرالى جىلى لەبىزدەرىمەن ءبولىستى.
ايگۇل شەرنياز, «ەگەمەن قازاقستان»