سەناتورلار زەلەنوۆ اۋدانى پاۆلوۆ اۋىلىنداعى سۋ قۇبىرى قۇرىلىسى مەن مەديتسينالىق پۋنكتتىڭ تولىق جوندەۋدەن وتكىزۋ بارىسىمەن تانىستى. سونداي-اق, دەپۋتاتتار ماحامبەت اۋىلىندا ورنالاسقان «التىن بولاشاق», «شۇنايبەكوۆ», «شكانوۆ» شارۋا قوجالىقتارىنىڭ ۇجىمىمەن كەزدەستى.
بۇدان بولەك, سەناتورلار تەرەكتى اۋدانىنا بارىپ, پودستەپنوە, نوۆوپاۆلوۆكا, اقسۋات اۋىلدارىندا قۇرىلىس وبەكتىلەرىن, شارۋا قوجالىقتارىن ارالادى.
جەرگىلىكتى حالىقتىڭ الدىندا ءسوز سويلەگەن ەربولات مۇقاەۆ اۋىل تۇرعىندارىن پرەزيدەنت ن.نازارباەۆتىڭ اۋىل شارۋاشىلىعىن قازاقستان ەكونوميكاسىنىڭ درايۆەرلەرىنىڭ بىرىنە اينالدىرۋ جونىندەگى تاپسىرماسىن جۇزەگە اسىرۋ ءۇشىن جۇمىلا ەڭبەكتەنۋگە شاقىردى.
كەزدەسۋگە قاتىسۋشىلار پارلامەنتشىلەرمەن اگرارلىق سالانى دامىتۋداعى ايماقتىڭ تۇيتكىلدى ماسەلەلەرىن تالقىلادى. دەپۋتاتتار تۇرعىنداردى جۇمىسپەن قامتۋدىڭ, سونداي-اق, اۋىلدىقتارعا ەڭبەگىنە لايىقتى اقى تولەۋدىڭ ماڭىزدىلىعىن اتاپ ءوتتى.
* * *
پارلامەنت ءماجىلىسىنىڭ دەپۋتاتى, «نۇر وتان» پارتياسى پارلامەنتتىك فراكتسياسى جەتەكشىسىنىڭ ورىنباسارى, ەكونوميكالىق رەفورما جانە وڭىرلىك دامۋ كوميتەتىنىڭ توراعاسى نۇرتاي سابيليانوۆ شىعىس قازاقستان وبلىسىنىڭ ەلدى مەكەندەرىندە سايلاۋشىلارمەن كەزدەسۋ وتكىزۋدە.
ەكى كۇننىڭ ىشىندە دەپۋتات اياگوز اۋدانىنىڭ تارباعاتاي, اقشى, قاراعاش, سارىارقا, بارشاتاس, قوساعاش, مادەنيەت, ايعىز اۋىلدارىندا كەزدەسۋ وتكىزدى. كەزدەسۋدە دەپۋتات سايلاۋشىلارعا قازاقستان پرەزيدەنتى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» قازاقستان حالقىنا جولداۋىنىڭ ناقتى باعىتتارى, بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جانە مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى تۋرالى ايتىپ بەردى.
سايلاۋشىلار ءوز كەزەگىندە اۋىل شارۋاشىلىعىن, كاسىپكەرلىكتى دامىتۋ, ميكرونەسيەلەۋ, اۋىز سۋمەن قامتاماسىز ەتۋ, كولىك جولدارىن جوندەۋ, ەلدى مەكەندەردىڭ ينفراقۇرىلىمىن دامىتۋ ماسەلەلەرى, مەديتسينالىق قىزمەتتەر كورسەتۋ ساپاسىن جاقسارتۋ, حالىقتى جۇمىسپەن قامتۋ, الەۋمەتتىك قامسىزداندىرۋ, ءبىلىم سالاسىن جاقسارتۋ, ينتەرنەت جەلىسى, الەۋمەتتىك نىسانداردى قۇرۋ جانە باسقا دا ماسەلەلەردى كوتەردى.
سونداي-اق, كەزدەسۋ بارىسىندا ن.سابيليانوۆ ازاماتتاردى جەكە ماسەلەلەرى بويىنشا قابىلدادى.
* * *
باتىس قازاقستان وبلىسىندا جۇمىس ساپارىمەن جۇرگەن ءماجىلىس دەپۋتاتى, تاريح عىلىمدارىنىڭ دوكتورى, گەنەرال-لەيتەنانت اباي تاسبولاتوۆ ورالدا ۇلتتىق ۇلان جاۋىنگەرلەرىمەن كەزدەستى.
دەپۋتات الدىمەن وڭىرلىك قولباسشىلىق باسقارماسى مەن 5517-اسكەري ءبولىمىنىڭ شتابىندا, جاۋىنگەرلىك داڭق مۋزەيىندە بولدى. سودان كەيىن «باتىس» وڭىرلىك قولباسشىسى, گەنەرال-مايور الىبەك سەراليەۆ ماجىلىسمەندى اسكەري ءبولىمنىڭ وقۋ ۇدەرىسىمەن, كۇندەلىكتى تىنىس-تىرشىلىگىمەن تانىستىردى.
ا.تاسبولاتوۆ اسكەري قىزمەتشىلەرگە ەلىمىزدىڭ 2050 جىلعا دەيىنگى دامۋىنىڭ ستراتەگيالىق باعدارلاماسىنىڭ نەگىزگى باعىتتارى, زاڭ شىعارۋشىلىق قىزمەت بارىسىندا اتقارىلعان جۇمىستار جونىندە اڭگىمەلەپ بەردى. سونىڭ ىشىندە قازىر ماجىلىستە قارالىپ جاتقان اسكەري قىزمەتشىلەرگە ارنالعان تۇرعىن ءۇي تۇجىرىمداماسى تۋرالى دا ايتىلدى.
– قازىرگى تاڭدا ۇلتتىق ۇلان جاۋىنگەرلەرى ناقتى مىندەتتى ورىنداۋدا. ولار كۇن سايىن, اۋا رايىنا قاراماستان, قولىنا قارۋ ۇستاپ, ەل تىنىشتىعىن, ماڭىزدى نىسانداردى كۇزەتۋدە. بۇل وقۋ-جاتتىعۋ ەمەس, سوندىقتان اسكەري قىزمەتشىلەر بارلىق بايلانىس جانە كولىك قۇرالدارىمەن تولىق قامتاماسىز ەتىلۋى ءتيىس. مەملەكەت باسشىسى تاراپىنان ۇلتتىق ۇلانعا ۇدايى كوڭىل ءبولىنىپ كەلەدى. بەيبىت كۇن كۇزەتىندە تۇرعان اسكەري قىزمەتشىلەردىڭ الەۋمەتتىك جاعىنان قورعالۋىن دا ەستەن شىعارماۋ كەرەك, – دەدى ا.تاسبولاتوۆ.
* * *
اقتوبەگە كەلىپ, ايتەكە بي, حرومتاۋ اۋداندارى مەن بىرنەشە اۋىلدى ارالاعان پارلامەنت ءماجىلىسىنىڭ دەپۋتاتتارى گلەب ششەگەلسكي, قۇرالاي قاراكەن, اسىلبەك سماعۇلوۆ اقتوبە – ور باعىتىنداعى تاس جولدىڭ قۇرىلىسىمەن تانىستى.
ەكى جىلعا جوسپارلانعان قۇرىلىس جۇمىسى 2018 جىلى اياقتالادى. قۇرىلىس جۇمىستارىنا رەسپۋبليكالىق بيۋدجەتتەن 3 ميلليارد تەڭگەدەن استام قارجى بولىنگەن.
«8 شاقىرىمدىق جول قۇرىلىسى جۇمىستارىنا 100-دەن استام ادام جۇمىلدىرىلعان. «نۇر وتان» پارتياسى فراكتسياسىنىڭ كوميسسياسى توقسان سايىن قۇرىلىس جۇمىستارىن قاراپ, قارجىنىڭ ءتيىمدى جانە ماقساتتى جۇمسالۋىن باقىلايدى», – دەدى ءماجىلىس دەپۋتاتى گلەب ششەگەلسكي.
«جول قۇرىلىسى ۋاقتىلى ءجۇرىپ جاتىر. قيىرشىق تاس, قۇم, باللاست سەكىلدى قۇرىلىس ماتەريالدارىنىڭ ءبارى جەرگىلىكتى جەردەن الىندى. جولدىڭ 6,5 شاقىرىمى بيىل پايدالانۋعا بەرىلەدى», – دەدى اقتوبە وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايازباي وسمانعاليەۆ.
ءماجىلىس دەپۋتاتتارى وڭىرگە ساپارى كەزىندە «نۇرلى جول» باعدارلاماسىمەن سالىنىپ جاتقان مەكتەپ قۇرىلىسىمەن تانىسىپ, اۋىل تۇرعىندارىمەن سويلەستى.
«ەگەمەن-اقپارات»