كورمەگە كاريب ايماعىنداعى 12 مەملەكەت كورنەكى بۇيىمدارىن اكەلگەن. بارلىعى ءبىر جەرگە توپتاستىرىلىپ, كوپشىلىك نازارىنا ۇسىنىلدى. سولتۇستىك جانە وڭتۇستىك امەريكا قۇرلىعىنىڭ اراسىندا ورنالاسقان يامايكا, باربادوس, سۋرينام, گايتي سىندى ەلدەر ءۇشىن دۇنيەجۇزىلىك ەكسپو كورمەسىنە كەلۋدىڭ ءوزى زور مارتەبە. سەبەبى, جەر اۋماعى شاعىن بۇل مەملەكەتتەردى الەم كەڭىرەك بىلە بەرمەيدى. سوندىقتان وسىنداي جاھاندىق جيىندار ارقىلى تاريحي-مادەني ەرەكشەلىكتەرى پاش ەتىلەدى.
سالتاناتتى راسىمگە قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ, گرەنادانىڭ دەنساۋلىق ساقتاۋ, قورعاۋ جانە حالىقارالىق بيزنەس ءمينيسترى نيكولاس ستيل جانە حالىقارالىق ۇيىمدار وكىلدەرى قاتىستى. وندا ە.اشىقباەۆ كاريب قوعامداستىعى ۇلتتىق كۇنىنىڭ مەرەكەلەنۋىنە قاتىسۋ زور مارتەبە ەكەندىگىن ايتىپ, قوعامداستىق دەلەگاتسياسىنا قازاقستان ۇكىمەتىنىڭ سالەمىن جەتكىزدى. ء«بىز – پوستكەڭەستىك جانە شىعىس ەلدەرى ىشىندە وسىنداي عالامدىق دەڭگەيدەگى 115 مەملەكەت پەن 22 حالىقارالىق ۇيىم قاتىسقان حالىقارالىق كورمەنى ۇيىمداستىرعان العاشقى ەلمىز. بۇل – مامانداندىرىلعان ەكسپو كورمەلەرى تاريحىنداعى قاتىسۋشىلار سانى بويىنشا ەڭ جوعارعى كورسەتكىش», دەگەن سىرتقى ىستەر ءمينيسترىنىڭ ورىنباسارى ەلىمىزدىڭ مۇناي مەن گازدىڭ مول قورىنا يە بولا تۇرا, «جاسىل» ەكونوميكانى دامىتۋعا باسا ءمان بەرەتىنىن العا تارتى. «ەكولوگيالىق تەڭەستىرىلگەن جانە ۇدايى دامۋعا باسا نازار اۋدارعان قازاقستان ءۇشىن «بولاشاق ەنەرگياسى» تاقىرىبى وتە ماڭىزدى. كومىرسۋتەكتى قورلارىنىڭ بار بولعاندىعىنا قاراماستان ەلىمىز 2050 جىلى جالپى ەلەكتر قۋاتىن ءوندىرۋدىڭ جارتىسىنا دەيىن جەتكىزۋگە مۇمكىندىك بەرەتىن جاڭعىرتىلاتىن ەنەرگيا كوزدەرىنە بەلسەندى اۋىسۋدا. اتالعان ماقسات ءبىزدىڭ 2050 جىلعا دەيىنگى ستراتەگيامىزدا جانە «جاسىل» ەكونوميكاعا كوشۋ تۇجىرىمدامامىزدا دا بەكىتىلىپ وتىر», دەدى ە.اشىقباەۆ.
كاريب قوعامداستىعىنا مۇشە گرەنادانىڭ دەنساۋلىق ساقتاۋ, قورعاۋ جانە حالىقارالىق بيزنەس ءمينيسترى نيكولاس ستيل ەكسپو-2017 حالىقارالىق كورمەسىنە قاتىسۋعا مۇمكىندىك بەرگەن قازاقستانعا العىسىن ءبىلدىردى. «قۇرامىنا 15 ەل كىرەتىن كاريب قوعامداستىعى, شامامەن 14 ميلليون حالقى بار شاعىن ءوڭىر. ەكسپو-2017 كورمەسىنە كاريكوم-نان 12 ەل قاتىسۋدا. قازاقستان ۇكىمەتىنە وسى ماڭىزدى شاراعا قاتىسۋ مۇمكىندىك بەرگەنى ءۇشىن العىسىمىز شەكسىز. بۇل ءبىزدى حالىقارالىق كورمەدە تانىستىرۋعا مۇمكىندىك بەردى», دەدى ول.
ن.ستيل قوعامداستىق كەڭىستىگىنىڭ ەرەكشەلىگىن دە اتاپ ءوتتى. «پاۆيلونىمىز – كورمەدەگى جالعىز بىرلەسكەن پاۆيلون. ول سونىسىمەن ەرەكشەلەنەدى. سوڭعى 17 جىل ىشىندە ءبىز وسىنداي شارالارعا بىرلەسىپ قاتىسىپ كەلەمىز. بۇل كاريب قوعامداستىعىنا مۇشە مەملەكەتتەردىڭ بىرلىگىن دالەلدەيدى», دەپ تۇيىندەدى ءسوزىن گرەنادانىڭ دەنساۋلىق ساقتاۋ, قورعاۋ جانە حالىقارالىق بيزنەس ءمينيسترى.
شارانىڭ رەسمي بولىگى اياقتالعان سوڭ, كاريب قوعامداستىعىنا مۇشە گرەنادادان كەلگەن ارتىستەر قازاقستاندىقتار مەن كورمە قوناقتارىنىڭ الدىندا ءان ايتىپ, ونەرلەرىن كورسەتتى.
كاريب ايماعى تەك شيكىزات تۇرلەرىن تاسىمالداۋمەن اينالىسادى, تابيعي قازبا بايلىق وندىرمەيدى. ەسەسىنە, تۋريزم سالاسى كەڭ قۇلاش جايعان. بۇل ەلدەر ەلەكتر ەنەرگياسىن قىمبات باعادا ساتىپ الاتىندىقتان, بالامالى قۋات كوزىنە كوشۋدى مەجەلى ماقسات سانايدى. ول ءۇشىن كەيبىر اۋىلدىق مەكەندەرىنە كۇن پانەلدەرىن ورناتىپ, جەل ەلەكتر ستانسالارىن ىسكە قوسقان.