نارىقتىڭ اتى نارىق. قوعامدىق دامۋدىڭ بۇل ءۇردىسى ىسىراپ پەن ارتىق شىعىنداردى كوتەرمەيدى. ءار تيىن ەسەپتە بولسا, نارىقتىق قارىم-قاتىناستار كەزىندەگى قارجى جۇيەسى دە سولعۇرلىم سومدانا تۇسپەك. سونداي-اق, بۇگىنگى كەز قاجەتتى-قاجەتسىزدىگىنە قاراماي, ماماندىقتاردى بىرىنەن سوڭ ءبىرىن توپىرلاتىپ ازىرلەي بەرۋدى دە كەشپەيدى. كەرىسىنشە, ۇسىنىس پەن قاجەتتىلىك ءبىر-بىرىنە تولىقتاي سايكەس كەلىپ, ءبىر-بىرىمەن ۇيلەسىم تابۋى ءتيىس. ايتايىن دەگەنىمىز, وبلىستاعى كاسىپتىك ءبىلىم بەرۋ ورىندارىندا بيۋدجەت قاراجاتى ەسەبىنەن ماماندار ازىرلەۋ كەزىندە ەڭبەك نارىعىنىڭ وسى ەرەكشەلىكتەرى ەسكەرىلمەي كەلىپتى. ەڭ باستىسى, تاپسىرىس بەرۋشىلەر ناقتى قانداي ماماندىق پەن قانشا تۇلەكتى قاجەت ەتەتىندىكتەرىنە ەشكىم باسىن اۋىرتپاعان. ايتالىق, 2014-2015 جىلدارى وڭىردەگى كوللەدجدەردى مەملەكەتتىك تاپسىرىس بويىنشا 6981 وقۋشى-ستۋدەنت اياقتاپ, كاسىپتىك ءبىلىم الىپ شىقسا, ولاردىڭ 3909-ى عانا العان ماماندىقتارىنا سايكەس قىزمەتكە ورنالاسقان. 2238-ءى كوللەدجدەردە العان بىلىمدەرىن پايداعا اسىرا الماي, ءوز ەرىكتەرىمەن باسقا ماماندىقتار بويىنشا قىزمەتكە كىرگەن. سونداي-اق, وسى ارالىقتا 834 تۇلەك مۇلدەم جۇمىسقا تۇرا الماي, ءارى «سايدا ساندارىن, قۇمدا ىزدەرىن» بىلدىرمەي, جىم-جىلاس جوعالعان. مۇنىڭ ءوزى ماقساتتى تۇردە مەملەكەت قارجىسىنا وقىتىلعان مامانداردىڭ 40-45 پايىزى جۇمىس ىزدەۋگە ءماجبۇر بولعانىن كورسەتەدى. ءتىپتى ايماقتاعى كەيبىر كوللەدج-دەردە العان ماماندىقتارى بويىنشا جۇمىسقا ورنالاسا الماعان تۇلەكتەردىڭ سانى 64 پايىزعا دەيىن جەتكەنى كوڭىلگە قونىمسىز. اتاپ ايتقاندا, وسىنداي جاعداي ەمبى قىزمەت كورسەتۋ سالاسى كوللەدجىندە ورىن العان. اقتوبە وبلىسى بويىنشا تەكسەرۋ كوميسسياسى جۇرگىزگەن مەملەكەتتىك اۋديت تەكسەرۋلەرى وبلىس ورتالىعىنداعى وندىرىستىك كاسىپورىندار مەن جاۋاپكەرشىلىگى شەكتەۋلى سەرىكتەستىكتەردەن 2014-2015 جىلدارى كوللەدج تۇلەكتەرىنە جۇزدەگەن سۇرانىستار تۇسكەنىن ايعاقتايدى. الايدا, بۇل سۇرانىستار سول ايتىلعان, جولدانعان كۇيىندە قالىپ قويىپتى. ويتكەنى, بيۋدجەت قاراجاتىنا كاسىبي ماماندىق الىپ شىققان تۇلەكتەردىڭ بىردە-ءبىرى اتالعان مەكەمەلەر مەن كاسىپورىندارعا جۇمىسقا قابىلدانباعان.
– ءبىز بۇدان اقتوبە قالاسىندا ورنالاسقان مەكەمە كاسىپورىن باسشىلارىنىڭ ۇسىنىستارى كوللەدجدە وقيتىن وقۋشىلار سانىن جاساندى تۇردە كوبەيتۋ ماقساتىندا عانا جاسالعانىنا كوز جەتكىزە الامىز. سونىڭ سالدارىنان 112,6 ميلليون تەڭگە بيۋدجەت قاراجاتى ءتيىمسىز جۇمسالعان, – دەدى وبلىستىق تەكسەرۋ كوميسسياسىنىڭ توراعاسى ساعات ەڭسەگەن ۇلى.
تالداۋلار ناتيجەلەرىنە سۇيەنسەك, سۇرانىستاعى مالىمەتتەر مەن دەرەكتەر ناقتى قاجەتتىلىكتەن الدەقايدا ارتىق بەرىلگەنى بەلگىلى بولىپ وتىر. بۇل كاسىپتىك ءبىلىم بەرۋدە وڭىردە مەملەكەتتىك تاپسىرىستى قالىپتاستىرۋ ماسەلەسى ءالى دە شەشىمىن تاپپاعانىن كورسەتەدى. بۇعان دەيىن ورىن العان تۇيتكىلدەر سىرىنىڭ ءمانىسى وسىندا دەسەك, قاتەلەسپەيمىز. وسى ورايدا, وبلىستاعى كاسىپتىك ءبىلىم بەرۋ جۇيەسىنە جاۋاپتى تۇلعالاردىڭ بيۋدجەت قاراجاتىن بەلگىلەنگەن مەجەدەن ارتىق الۋعا ۇمتىلىپ, ونى جەلگە ۇشىرعاندارى مەملەكەتشىلدىك پەن سالاعا جاناشىرلىقتىڭ بەلگىسى ەمەس ەكەنىن تۇيسىنگەندەرى ءجون دەمەكپىز.
تەمىر قۇسايىن, «ەگەمەن قازاقستان» اقتوبە