جامبىل وبلىسىنىڭ اكىمى كارىم كوكىرەكباەۆ جەتىسۋ ولكەسىنە ارنايى ىسساپارمەن كەلدى. ات ارىتىپ, تون توزدىرا قويارداي ەمەس, قويى قورالاس, ءورىسى ارالاس جاتقان كورشى وبلىستان كەلگەن قۇرمەتتى دەلەگاتسيانى الماتى وبلىسىنىڭ اكىمى اماندىق باتالوۆ كۇتىپ الدى. مۇندايدا «بىزدەردە مىناداي بار, مىناداي بار» دەيتىن قۇر داڭعوي ماقتان ەمەس, تاجىريبە الماسۋ ماقساتىندا اتقارعان شارۋاڭ مەن تىندىرعان ءىسىڭدى قوناققا كورسەتپەك پارىز. جەتىسۋ جۇرتشىلىعىنان ۇيرەنەر دۇنيە كوپ ەكەنىن ءوزى دە ايتا كەلگەن جامبىل وبلىسى اكىمىنىڭ دە دىتتەگەنى «ىرىس جۇعىسادى» ءتامسىلى توڭىرەگىندە بولعانى انىق.
ءوڭىر باسشىسى قوناقتاردى الدىمەن كوكسۋ اۋدانىنا قاراستى «اليم – تايار» جەكە شارۋا قوجالىعىنىڭ قانت قىزىلشاسى القابىندا باستاپ باردى. ىرگەتاسى 1999 جىلى قالانعان, بۇگىندە ءوز سالاسى بويىنشا تالايعا ۇلگى كورسەتىپ, ءجون سىلتەيتىن دارەجەگە جەتكەن شارۋاشىلىق بيىل ورتاشا ەسەپپەن گەكتارىنا 600 تسەنتنەردەن ءونىم الۋدى جوسپارلاپ وتىر. بۇدان بولەك كوكونىس, مايبۇرشاق, باقشا ونىمدەرىن ەگۋمەن اينالىسىپ وتىرعان شارۋا قوجالىعىنىڭ جالپى ەگىستىك كولەمى 121 گەكتاردى قۇرايدى.
ەگىس القابىن ارالاعان سوڭ, قوناقتار «كوكسۋ قانت زاۋىتى» جشس-نە بارىپ, جەتىسۋلىقتاردىڭ بيىلعى قانتقىزىلشاسىن ءوسىرۋ مەن ونى وڭدەۋ باعىتىنداعى جەتكەن جەتىستىكتەرىمەن تانىستى.
وسىدان ءبىراز جىل بۇرىن وڭىرلەرىڭىزگە ارنايى ساپارلاي كەلگەن ەلباسى تاپسىرماسىن تياناقتى ورىنداۋ جولىندا بار كۇشتەرىڭىزدى جۇمساپ كەلە جاتقاندارىڭىزدى بىلەمىز. ونىڭ ناتيجەسىن بۇگىن ءبىز دە كورىپ, كوكەيگە ءتۇيىپ وتىرمىز. ءبىز ءۇشىن اگرارلىق ايماق دەگەن اتى بار سىزدەردىڭ وبلىسپەن تاجىريبە الماسۋدىڭ ماڭىزى زور. الداعى ۋاقىتتا بۇل باستاما ءوز جەمىسىن بەرەدى دەپ سەنەمىز, – دەدى كارىم كوكىرەكباەۆ ەگىس القابىمەن قانت زاۋىتىنان العان اسەرى جايلى.
بۇدان ارعى ساپار وبلىس ورتالىعى تالدىقورعان قالاسىندا جالعاستى. قالاداعى وتكەن جىلى عانا قولدانىسقا بەرىلگەن وقۋشىلار سارايى مەن جاستارعا قىزمەت كورسەتۋ ورتالىعىمەن تانىستى. ءارتۇرلى ۇيىرمەلەرگە ارنالعان 45 كابينەت, 4 شەبەرحانا, 8 زەرتحانا, ءۇش كورمە زالى بار ساراي مەن جۇمىس ىزدەۋشى جاستارعا قول ۇشىن بەرىپ, كومەكتسەسۋ نەگىزگى ورىنعا قويىلعان جاستار ورتالىعىنىڭ جۇمىسى دا قوناقتار تاراپىنان جوعارعى باعاعا يە بولدى.
«جاستار» پاركى مەن اباتتاندىرىلعان قاراتال وزەنىنىڭ جاعالاۋى قالا قوناقتارىنىڭ ەڭ الدىمەن ات باسىن تىرەر دەمالىس ورنىنا اينالعان. كەزدەسۋدى تىم رەسميلەندىرمەي, قىدىرىستاپ, دەمالىپ جۇرگەن قالا تۇرعىندارىمەن از-كەم سۇحبات قۇرعان, ءوز تاراپىنان سۇراق قويعان جامبىل ءوڭىرىنىڭ باسشىسى تاراز قالاسىنىڭ اكىمى رۇستەم داۋلەتكە تالاس وزەنىنىڭ بويىنان دا وسىنداي ادەمى ساياباق سالۋدى تاپسىردى.
رەسمي ساپاردان العان اسەرى جايلى جۋرناليستەرگە بەرگەن سۇحباتىندا «ەۋروپا قالالارىنا ۇقساپ دامىپ كەلە جاتقان» وبلىس ورتالىعى مەن الماتىنى جالعاپ جاتقان جولدان باستاپ, قانت قىزىلشاسىن وسىرۋدەگى جەتىستىكتەر مەن جاڭالىقتار, «جاڭارعان, جاسارعان تالدىقورعان» جايلى جاقسى اسەرمەن كەتىپ بارا جاتقانىن ايتتى.
الماتى وبلىسىنىڭ اكىمى اماندىق باتالوۆ تا قوناقتارعا قاراتا:
– وزدەرىڭىز دە بىلەسىزدەر, مەن وسىدان ەكى جىل بۇرىن سىزدەردىڭ وبلىستارىڭىزعا ارنايى ىسساپارمەن بارعانمىن. تاريحي وقيعا قازاق حاندىعىنىڭ 550 جىلدىعىنا ارنالعان ۇلكەن تويدا دا بولدىق. «اعايىن تاتۋ بولسا, ات كوپ» دەمەكشى, مىنە, بۇگىن سىزدەر دە ءبىزدىڭ ەلگە كەلىپ وتىرسىزدار. مۇنداي تىعىز ارىپتەستىكتىڭ قاجەتتىلىگىن ەلباسى دا ءوز سوزىندە ۇنەمى ايتىپ وتىرادى. بۇل ەل مەن ەلدى, جەر مەن جەردى جاقىنداتىپ, وڭىرلەر ەكونوميكاسىنىڭ تىڭ سەرپىنمەن دامۋىنا مۇمكىندىك بەرەدى, – دەدى. جامبىلدىق اعايىننان ۇيرەنەر, ۇلگى الار دۇنيە كوپ ەكەنىن, الداعى ۋاقىتتا مۇنداي قارىم-قاتىناستىڭ ءجيى بولاتىنىن ايتتى.
كەزدەسۋ سوڭى ەكى تاراپتىڭ الداعى ۋاقىتتا بىرىگە اتقارىلاتىن بىرنەشە جوبا مەن عىلىمي-تەحنيكالىق, ساۋدا-ەكونوميكالىق, گۋمانيتارلىق باعىتتاعى ارىپتەستىك تۋرالى مەموراندۋمعا قول قويۋىمەن اياقتالدى.
الماس ءنۇسىپ, «ەگەمەن قازاقستان»
سۋرتتەردى تۇسىرگەن جۇماباي مۇسابەكوۆ