«ازيا جاڭعىرىعى» تسيرك فەستيۆالى بيىل ونىنشى رەت وتكىزىلىپ وتىر. جىل سايىن استانا كۇنى قارساڭىندا وتكىزىلەتىن فەستيۆالعا ازيا, تمد ەلدەرىنەن تسيرك ونەرىنىڭ مايتالماندارى جيىلادى. ءتۇرلى پىشىندە, ءتۇرلى قويىلىمدارمەن كورەرمەندەرگە رۋحاني ازىق سىيلاپ جۇرگەن دۋماندى ونەر دوداسى بيىل دا ءوز دارەجەسىندە ۇيىمداستىرىلدى. 2-6 شىلدە ارالىعىندا ءتورت كۇن بويى «استانالىق تسيركتە» قايتالانباس قويىلىمدارىن تارتۋ ەتتى. تسيرك ونەرىنىڭ دامىپ, كوركەيىپ كەلە جاتقانىنا «ديۋ سولەي» تسيركىنىڭ ونەرىن تاماشالاعان سوناۋ ءبىر جىلدارى كوزىمىز جەتكەن. ادامداردى قولعا ۇيرەتىلگەن اڭدارمەن قىزىقتىرۋدىڭ دا بىرتىندەپ قالىپ بارا جاتقانى بايقالعان ەدى. ويتكەنى, دۇنيەنىڭ ءبارى قول سوزىمداي جەردە تۇرعانداي كورىنەتىن مىناۋ جاھاندانۋ داۋىرىندە ادامداردى تاڭعالدىرۋ, سەزىمدەرىن قوزعاۋ ونشا وڭاي شارۋا ەمەس. سول ءۇشىن ءاربىر ەلدىڭ ايتۋلى ونەر يەلەرى جينالاتىن فەستيۆالدىڭ ءوزىنىڭ ءپىشىنىن وزگەرتىپ تۇرماسا, جۇرتتى جالىقتىرىپ الۋ وپ-وڭاي. بيىلعى فەستيۆالدا باسىمدىق تسيرك ارتىستەرىنىڭ شەبەرلىگىنە, ولاردىڭ بىرەگەي ونەرىنە بەرىلدى. استانا تسيركى كۇمبەزىنىڭ استىنداعى اكروباتيكالىق ۇشۋ قوندىرعىسى, تسيركتەگى مانەج-ترانسفورمەر, لازەرلى شوۋعا ارنالعان جابدىقتار تۇگەلىمەن پايدالانىلدى. بىرەگەيلىك دەمەكشى, فەستيۆالدىڭ العاشقى كۇنىندە ونەر كورسەتكەن رەسەيلىك اتاقتى ارقانمەن ءجۇرۋشى, 63 جاستاعى ۆاسيلي پەشكوۆتىڭ بەس مەترلىك بيىكتىكتەن قۇلاپ كەتۋىنىڭ ءوزى بىرەگەيلىككە بارابار بولدى. نەگە دەسەڭىز ونىڭ قۇلاپ كەتكەنىن بىلايعى كورەرمەندەر سەزبەي دە قالدى. قانداي تريۋكتەردى دە قوبالجىماي ورىنداپ, قوسىمشا ساقتىق ارقانىن پايدالانباي دار ۇستىندە جۇرەتىن پەشكوۆتىڭ ساحناعا ءار شىعۋى ونىڭ ونەرىنە قانىق كورەرمەندەر ءۇشىن مەرەكە. سونداي-اق, فەستيۆالدىڭ گران-پري جۇلدەسىن يەلەنگەن موناكولىق ەكۆيليبريست ولەگ يزوسيموۆتىڭ ونەرى بىرەگەيلىكتىڭ ۇلگىسى بولدى. كەڭىستىكتە دەنە تەپە-تەڭدىگىن ساقتاۋدا ءارتىس ۇزدىك ونەر كورسەتتى.
جالپى, ءوز ەلىمىزدەن ونەر كورسەتكەن, سونداي-اق, مىسىر, موناكو, قىتاي, رەسەي, بەلارۋس, تۇرىكمەنستان, وزبەكستان مەن قىرعىزستاننان كەلگەن داردىڭ ۇستىندە, اسپالى ساتىلاردا «بەلبەۋلەر» نومىرىمەن اۋادا «ۇشىپ ءجۇرىپ» نەمەسە كادىمگى جۋان-جۋان تاياقتاردى پلاستيكالىق شەبەرلىكپەن قولدانىپ ونەر كورسەتكەن تسيرك ارتىستەرىنىڭ وسالى بولعان جوق. ونەر سايىسىندا «استانالىق تسيرك» ديرەكتورى ەرىك جولجاقسىنوۆ توراعالىق ەتكەن, قۇرامىندا كريۆوي روگ مەملەكەتتىك تسيركىنىڭ ديرەكتورى سەرگەي كاباكوۆ (رەسەي), بەلارۋس مەملەكەتتىك تسيركىنىڭ ديرەكتورى ۆلاديمير شابان, تسيرك ارتىستەرى قاۋىمداستىعىنىڭ ديرەكتورى لوليتا ليپينسكا (لاتۆيا), «ەرەۆان تسيركتىڭ» كوركەمدىك جەتەكشىسى ءارى باس ديرەكتورى دجوزەف سوس پەتروسيان (ارمەنيا), وزبەك مەملەكەتتىك تسيركىنىڭ باس ديرەكتورى باحتيەر تۋرسۋنوۆ (وزبەكستان), ۆەنگريا ۇلتتىق تسيركىنىڭ كوركەمدىك جەتەكشىسى پيتەر فەكەتە (ماجارستان) سىندى تسيرك ونەرىنىڭ مايتالماندارى بار قازىلار القاسى ءتۇرلى ەلدەردەن كەلگەن ارتىستەردىڭ ونەرلەرىن ساراپقا سالدى. سونىمەن, ونەر جارىسىنىڭ گران-پري جۇلدەسى موناكولىق ەكۆيليبريست ولەگ يزوسيموۆكە, التىن جۇلدە «ورىس تاياعى» نومىرىنە (جەتەكشىسى ەرلان ءازيزوۆ, قازاقستان), «توسەم» نومىرىنە (ماكسيم ۆينوگرادوۆ جانە ۆەرونيكا رىبچەنكو, بەلارۋس), «بەلبەۋلەر» نومىرىنە (پاراحات ورازلىەۆ, تۇرىكمەنستان), «دىڭگەك» نومىرىنە (جەتەكشىسى كونستانتين گۆوزدەتسكي, رەسەي), «لەگيون» نومىرىنە (جەتەكشىسى نۇرلان الشىنباەۆ, قازاقستان) بەرىلدى. ال قىرعىزستاندىق ەركينبەك ساراليەۆتىڭ «سولو جونگلياج» قويىلىمى, ۋكراينالىق دەنيس ماگولانىڭ جەتەكشىلىگىمەن تۋرنيكتە ونەر كورسەتۋشىلەر, رەسەيلىك «باتۋت» قويىلىمى, وزبەكستاندىق رۋستام حاماتوۆتىڭ جەتەكشىلىگىمەن قويىلعان «بەلبەۋلەر» ءنومىرى كۇمىس جۇلدەمەن ماراپاتتالدى. فەستيۆالعا قاتىسقان ارتىستەردىڭ ەشقايسىسى دا جۇلدەسىز قايتقان جوق. قولا جۇلدە, استانا قالاسى اكىمىنىڭ سىيلىعى, «كورەرمەن كوزايىمى», باسقا دا ارنايى سىيلىقتار بارلىق قاتىسۋشىلارعا بۇيىردى.
ايگۇل سەيىلوۆا, «ەگەمەن قازاقستان»
سۋرەتتەردى تۇسىرگەن ەرلان وماروۆ, «ەگەمەن قازاقستان»