ولاردىڭ ىزىنە تۇسكەن وبلىستىق ۇيىمداسقان قىلمىسقا قارسى كۇرەس باسقارماسى شەكارا قىزمەتىمەن بىرلەسە وتىرىپ, كەزەكتى قۇقىق بۇزۋشىلىقتىڭ جولىن كەستى. كۇدىكتىلەر رەسەي اۋماعىنا 6 وزبەك ازاماتىن شەكارادان وتكىزۋ كەزىندە قولعا تۇسكەن. ولاردىڭ ءبارى ءوڭىر تۇرعىندارى بولىپ شىقتى.
«قىلمىستىق توپ مۇشەلەرى ورتالىق جانە ورتا ازيا ەلدەرىنەن رەسەي فەندەراتسياسىنا ميگرانتتاردى شەكارادان وتكىزىپ وتىرعان. ميگرانتتاردىڭ كورشى مەملەكەتكە ءوتۋ رۇقساتنامالارى بولماعان», – دەيدى ۇيىمداسقان قىلمىسقا قارسى كۇرەس باسقارماسىنىڭ باسشىسى ءاليحان بايقاداموۆ.
وسىلايشا, بەس تەرىسكەيلىكتىڭ قولىنا كىسەن سالىنعان. مۇنىمەن قوسا تاعى ءبىر توپ وزبەكستان ازاماتىنا جاسالماق بولعان قاراقشىلىق شابۋىلدىڭ بەتى قايتارىلدى. بەتپەردە كيگەن 4 قىلمىسكەر ولاردى قورقىتىپ, شەكارادان زاڭسىز وتكىزۋگە ارەكەت جاساعان.
بارلىق كۇدىكتىلەر ۇستالىپ, تەرگەۋ يزولياتورىنا قامالدى. قىلمىستارى دالەلدەنگەن جاعدايدا قىلمىستىق كودەكستىڭ «زاڭسىز ميگراتسيا ۇيىمداستىرۋ», «ۇيىمداسقان توپ قۇرىپ, ونى باسقارۋ» جانە «قاراقشىلىق» باپتارى بويىنشا جازاعا تارتىلاتىن بولادى.
ءومىر ەسقالي, «ەگەمەن قازاقستان» سولتۇستىك قازاقستان وبلىسى