يگىلىككە جاراعانىنا ايدان اسقان «نۇرلى جول» ۆوكزالىنا ءبىزدىڭ دە جولىمىز تۇسكەن. كورگەنىمىز بەن كوڭىلگە تۇيگەنىمىز كوپ. سۇيسىنتكەن دۇنيەلەردى قاعازعا سۇيكەسەك, ۆوكزال ءبىر قاراعاندا, شىعا كەلسەڭىز, اينالاڭىز الاقانداعىداي كورىنەتىن ەل ىرگەسىندەگى توبە ءتارىزدى. قوعامدىق كولىكتەن ءتۇسىپ, ىشىنە ەنگەندە, ءۇشىنشى قاباتقا – پەررونعا ءبىر-اق تاپ بولاسىز. ايتا كەتەيىك, وسىنداعى التى شويىن جول اعىلعان قىرىقتان اسا پويىزدى الىپ كەلىپ, پاۆلودار, قاراعاندى, قوستاناي جانە كوكشەتاۋ باعىتتارىنا سىلتەيدى. ەلوردادا ءوتىپ جاتقان ەكسپو كورمەسىنە بايلانىستى قوسىمشا وننان اسا پويىز تاعى بار. مامانداردان بىلگەنىمىزدەي, مۇندا نەگىزىنەن «تۇلپار-تالگو» جۇردەك پويىزدارى مەن قالا ماڭىنا قاتىنايتىن ەلەكتروپويىزدار ايالدايدى.
ەسكالاتورمەن جوعارى كوتەرىلگەندە, نەگىزگى, ءتورتىنشى قابات – كۇتۋ زالىنا كىرەدى ەكەنسىز. ءدال وسىندا تاۋلىك بويى جۇمىس ىستەيتىن بيلەت ساتۋ كاسسالارى, ەلەكتروندى بيلەت الۋ تەرمينالدارى, مۇمكىندىگى شەكتەۋلى جاندارعا قىزمەت ەتەتىن تەرەزە, انىقتاما بيۋروسى, ساۋدا نۇكتەلەرى, تەلەفون, سمارتفون قۋاتتايتىن قۇرىلعى, «استانا-تاكسي» قىزمەتى بار. بەسىنشى قابات تاماقتانۋ ورىندارىمەن جابدىقتالسا, التىنشى قاباتقا ۆوكزال اكىمشىلىگىنىڭ كەڭسەلەرى ورىن تەپكەن. ايتا كەتەيىك, ەگەر نىسانعا جەكە كولىگىڭىزبەن كەلەتىن بولساڭىز, ءبىرىنشى, ەكىنشى قاباتتار – 740 ورىندىق اۆتوتۇراق. ۆوكزال سىرتىندا 760 كولىككە ارنالعان تۇراق تاعى بار. بايقاعانىمىزداي, مۇندا جولاۋشىلار مەن شىعارىپ سالۋشىلار دەمالىپ, دۇكەندەردى ارالاپ, تاماقتانا الادى. كەلۋشىلەردىڭ جايلىلىعى ءۇشىن قوناقۇي, انا مەن بالا بولمەسى, جۇك ساقتاۋ ورنى, اسحانا, مەديتسينالىق قىزمەت قاراستىرىلعان. مۇگەدەكتەر تاكتيلدى توسەنىشتەرگە جانتايىپ, كوزى ناشار كورەتىندەر برايل الىپپەسىن قولدانا الادى. 52 ەسكالاتور مەن 26 ليفت ورناتىلعان. جەدەل جۇمىس ىستەيتىن عالامتور جەلىسى تارتىلعان. قاۋىپسىزدىككە دە كوپ كوڭىل بولىنگەن سياقتى. ويتكەنى, عيماراتتا ادامداردى تەكسەرىستەن وتكىزەتىن 16 كىرەبەرىس پەن اقىلدى جۇيەمەن باسقارىلاتىن 510 كامەرا ورناتىلعان.
اشىلعانىنا ەندى عانا ايدان اسقان ۆوكزالدا حالىقتىڭ قاراسى قالىڭ. جالپى كولەمى 120 مىڭ شارشى مەتر بولاتىن نىساندا ءجون سىلتەيتىن قىزمەتكەرلەردىڭ كوپتىگىن دە اڭعارۋ قيىن ەمەس. بىزگە جوعارىداعى دەرەكتەردى جەتكىزىپ, ءمان-جايدى اڭگىمەلەگەن – كەشەن كەزەكشىسى ماديار امانباەۆ. ول سوڭعى ۇلگىدەگى ديزاينمەن جانە تەحنولوگيامەن جابدىقتالعان مەكەمەدە 1700-گە تارتا قىزمەتكەر بار ەكەنىن ايتتى. «جاڭا تەمىر جول بەكەتى كۇن سايىن 35 مىڭعا جۋىق جولاۋشىنى كۇتىپ الىپ, شىعارىپ سالۋعا قاۋقارلى. ال قازىر تاۋلىگىنە نەبارى 7 مىڭ جولاۋشىنى قابىلدايمىز. تاعى ءبىر ەرەكشەلىگىمىز, جۇردەك پويىزدار التى قاباتتى بەكەتتىڭ ىشىنە كىرىپ, جولاۋشىلارعا قىزمەت كورسەتەدى», دەيدى م.امانباەۆ. مىناۋ مالىمەت تە ءبىزدى بەيجاي قالدىرمادى: جاڭا ۆوكزالدا جاڭا تەحنولوگيالار ىسكە قوسىلعان. نىساننىڭ شاتىرىنا جيناقتالعان جاڭبىر سۋى تەحنيكالىق قاجەتتىلىكتەرگە جانە جەر تەلىمىن سۋعارۋعا جۇمسالادى. بۇل – «جاسىل» تەحنولوگيادا قولدانىلاتىن ەڭ وزىق جوبالاردىڭ ءبىرى. اۋا باپتاۋ جۇيەسى دە تارتىمدى, ياعني عيماراتتىڭ ءبىر بولىگىنەن ەكىنشى بولىگىنە اۋا الماستىرىلادى. سۋىق بولىپ تۇرعان زالعا جىلى اۋا ايدالادى دا, ۆوكزالدى جىلىتۋعا كەتەتىن ەنەرگيا ۇنەمدەلەدى. سونداي-اق, مۇندا جەردىڭ تۇراقتى تەمپەراتۋراسى ارقىلى اۋانى جىلىتۋعا مۇمكىندىك بار. جەردىڭ تومەنگى اۋا قاباتىنا رادياتور ورناتىلعان, سول ارقىلى جازعى ماۋسىمدا اۋانى سالقىنداتىپ, قىسقى ۋاقىتتا جىلىتۋعا بولادى ەكەن. اۆتوماتتاندىرىلعان بۇل قۇرىلعى دا ەنەرگيانى ۇنەمدەيدى. مىنە, باس شاھاردىڭ تمد مەملەكەتتەرىندە جوق ۆوكزالىنىڭ جاعدايى مەن كورىنىسى وسىنداي. استاناعا قوش كەلدىڭ, اعايىن! جولىڭ بولسىن, جولاۋشى!
اسحات رايقۇل, سۋرەتتەردى تۇسىرگەن ەرلان وماروۆ, «ەگەمەن قازاقستان»