«رۋىم توبىقتى, ونىڭ ىشىندە ىرعىزباي, وسكەنبايدىڭ مىرزاتاي دەگەن اعاسىنان تارايمىز. مىرزاتايدان جۇمان, ونىڭ 9 ۇلىنىڭ بىرەۋى ءازىمباي. جۇمان اتامىز «اباي جولى» رومان-ەپوپەياسىنا ەنگەن ادام. شاكارىم اتىلعاندا نەمەرە اعايىندارى قىدىر مەن شىڭعىس ازىمباەۆتار اقىننىڭ كوپ دۇنيەلەرىن الىپ قالادى. سونىڭ قاتارىندا شاكارىمنىڭ توسەك-جابدىعى دا بار ەدى. ۇيگە احات شاكارىم ۇلى كەلگەندە سيراقباي, شاحمان ەسىمدى اۋىل اقساقالدارى جينالاتىن. سول كەزدە ەستىگەنىم, شاكارىمدى ولتىرگەن كۇنى تۇندە نكۆد-نىڭ مايىتكە كۇزەت قويماعانىن پايدالانىپ, باقاناستا بولعان اۋىل ازاماتتارى ءمايىتتى ۇرلاپ, ەسكى قۇدىققا اپارىپ تىعادى. تاڭەرتەڭ نكۆد شۋ شىعارىپ, بارلىق اۋىل ادامدارىنان جاۋاپ الادى. الايدا, ەشكىمدى مويىنداتا المايدى. كەتەر كەزدەرىندە اۋىلداستارى قاجىنىڭ جەكە م ۇلىكتەرىن سول اۋىلدا قالعان جاقىن تۋىسى رەتىندە نەمەرە اعايىنى – مەنىڭ اتام قىدىرعا تابىستاپ كەتەدى. سول سەبەپتى ءبىزدىڭ ۇيدە شاكارىمنىڭ توسەگى, التىن بەلبەۋى, ويۋ-ورنەكتەرى, ءوز قولىمەن جونىپ جاسالعان شوقپارى مەن ساپتىاياعى, تاعى باسقا زاتتارى بولدى. توسەگى ادەمى, تەمىر بۇراندالى, بۇزىلىپ جينالاتىن ەدى. سول توسەككە اتام قايتىس بولعانشا جاتتى. ونىمەن بىرگە جاتاتىن بولعاندىقتان مەن دە سول توسەكتە ۇيىقتاپ ءوستىم. قاجىنىڭ التىن بەلبەۋىن قاراۋىلدا, اباي اتامىزدىڭ ءبىر تويىندا جيدەبايعا اپارىپ قويىپ, سودان قايتپاي قالدى. ول كەزدە شاكارىم اقتالماعان كەز, اتىن اتاۋعا ەل قورقاتىن. شوقپارى مەن ساپتىاياعىن اتام قىدىر تەمەكى ەزىپ, ناسىباي جاساۋعا پايدالاندى. مەن ونى ەشكىمگە بەرمەي, اتامنان قالعان ميراس رەتىندە ساقتاپ ءجۇردىم. الايدا ول تۋرالى بىلەتىن ادامدار كوپ بولدى», - دەپ ءبىرشاما ماعلۇمات بەرىپتى ەرنۇر ازىمباەۆ سەمەيدەگى مۋزەي قىزمەتكەرلەرىنە.
اباي اۋدانىنىڭ تۋماسى 2016 جىلى مۋزەي قورىنا اجەسى ۇلجان باجىعۇلقىزىنىڭ شاكارىم جاساعان ۇلگى بويىنشا تىككەن كيمەشەگىن دە تابىس ەتىپتى. «جيدەباي-ءبورىلى» مەملەكەتتىك قورىق-مۋزەيىنىڭ عىلىمي حاتشىسى شىنار سادىقوۆا شاكارىم قاجىنىڭ شوقپارى مەن ساپتىاياعى قازىرگى ۋاقىتتا اباي اۋدانىنىڭ ورتالىعى قاراۋىلداعى ولكەتانۋ مۋزەيىنە ۋاقىتشا قويىلعانىن, قۇندى جادىگەرلەر الداعى ۋاقىتتا مۋزەي تورىنەن ورىن الاتىنىن ايتتى.
ازامات قاسىم,
«ەگەمەن قازاقستان»
شىعىس قازاقستان وبلىسى, اباي اۋدانى.
سۋرەت ابايدىڭ مەملەكەتتىك «جيدەباي-بورىلى» قورىق-مۋزەيىنىڭ ءباسپاسوز قىزمەتىنەن الىندى