سۋ سپورتى قازاقستاندىق سۋدا ءجۇزۋشى, ريو وليمپياداسىنىڭ چەمپيونى دميتري بالاندين بولگاريا اشىق چەمپيوناتىندا براسس ادىسىمەن جۇزۋدەن 2 التىن, 1 قولا مەدال يەلەندى. 100 جانە 200 مەترگە جۇزۋدە دميتري الدىنا جان سالمادى. ەكى قاشىقتىقتا دا ءبىرىنشى كەلدى. ال 50 مەترگە براسس ادىسىمەن جۇزۋدە قولا مەدالدى قاناعات تۇتتى. دميتري بالاندين بولگاريا اشىق چەمپيوناتىنان كەيىن 14-30 شىلدە ارالىعىندا ۆەنگريا استاناسى بۋداپەشتتە وتەتىن الەم چەمپيوناتىنا قاتىسادى. ايتا كەتەيىك, بۇل وتانداسىمىزدىڭ ريو وليمپياداسىنان كەيىنگى العاشقى حالىقارالىق جارىسى.
الپينيادا الماتىدا استانا كۇنىنە ارنالعان ءداستۇرلى «نۇرسۇلتان شىڭى-2017» الپينياداسى ءوتتى. اتالمىش شاراعا 5 مىڭ ادام قاتىسقان. ونىڭ ىشىندە ەۋروپا مەن ازيا ەلدەرىنەن كەلگەن قوناقتار دا بار. 4 376 مەتردى باعىندىرۋعا تىلەك بىلدىرۋشىلەر اراسىندا كاسىپقوي سپورتشىلار, بالالار مەن ەرەسەكتەر دە بولدى. ناتيجەسىندە, ەرلەر اراسىنداعى باسەكەدە ماليك ابدۋ-اسەت شىڭدى 1 ساعات 55 مينۋتتا ءبىرىنشى بولىپ باعىندىرسا, ايەلدەر اراسىندا ايجان جومباتىر شىڭعا 2 ساعات 27 مينۋتتا شىقتى.
تەننيس حالىقارالىق تەننيس اسسوتسياتسياسى تەننيسشىلەردىڭ رەيتينگىن جاڭارتتى. شىلدە ايىنىڭ باسىنداعى ەرلەر اراسىنداعى رەيتينگ بويىنشا قازاقستاندىق تەننيسشى ميحايل كۋكۋشكين 118-ورنىن ساقتاپ قالسا, الەكساندر بۋبليك ءبىر ساتى تومەندەپ, 135-ورىنعا سىرعىدى. ال, قىزدار اراسىنداعى رەيتينگتە قازاقستاننىڭ ءبىرىنشى ءنومىرلى راكەتكاسى يۋليا پۋتينتسەۆا 43-ورىننان كورىندى. ياروسلاۆا شۆەدوۆا ەكى ساتى تومەندەپ, ۇزدىك 50 سپورتشىنى قورىتىندىلاپ تۇرسا, زارينا دياستىڭ رەيتينگتەگى ورنى وزگەرگەن جوق. ول – 130-ساتىعا جايعاسقان.
كاسىپقوي بوكس قازاقستاندىق كاسىپقوي بوكسشى ميراس جاقىپوۆ قىتايدا ءوزىنىڭ ەكىنشى كەزدەسۋىن وتكىزىپ, 1 راۋندتا تەحنيكالىق نوكاۋتپەن جەڭىسكە جەتتى. جارتىلاي جەڭىل سالماقتا جۇدىرىقتاساتىن وتانداسىمىز جەرگىلىكتى تيك تۋەرحۋنجيانگپەن شارشى الاڭعا شىققان بولاتىن. ەسكە سالا كەتەيىك, ميراس جاقىپوۆ كاسىپقوي بوكستاعى العاشقى كەزدەسۋىن وسى جىلدىڭ قاڭتار ايىندا وتكىزىپ, قىتايلىق بوكسشى گۋاندجي جەندى ۇپاي سانىمەن ۇتقان ەدى.
ءالي بيتورە, «ەگەمەن قازاقستان»