قوس مەملەكەت استانالارىن بايلانىستىراتىن رەيس اپتاسىنا 3 مارتە جيىلىكپەن, ياعني دۇيسەنبى, بەيسەنبى جانە جەكسەنبى كۇندەرى ورىندالادى. جاڭا حالىقارالىق تاسىمال مەملەكەت باسشىسى نۇرسۇلتان نازارباەۆتىڭ 2020 جىلعا دەيىن ەلىمىز ارقىلى وتەتىن ترانزيتتىك جولاۋشىلار اعىنىن 4 ەسەگە دەيىن ۇلعايتۋ جونىندەگى تاپسىرماسىن ورىنداۋ اياسىندا جۇزەگە اسۋدا. سوڭعى 7 جىلدا ترانزيتتىك اۋە جولاۋشىلار اعىنى 20 ەسەگە ارتقان. بولاشاعى زور باعىتتاردىڭ ءبىرى ءۇندىستاننان قازاقستان ارقىلى تمد ەلدەرىنە باعىتتالعان ترانزيتتىك جولاۋشىلار مارشرۋتى بولىپ تابىلادى. استانالار اراسىنا قاتىنايتىن رەيس – 2004 جىلدان بەرى «ەير استانا» اۋە كومپانياسى ورىنداپ كەلگەن الماتى – دەلي – الماتى رەيسىن تولىقتىراتىن ءتيىمدى جوبا. بۇل رەيس «استانا» حالىقارالىق قارجى ورتالىعىن دامىتۋدا ىسكەرلىك بەلسەندىلىكتى ىنتالاندىرۋ ءۇشىن قىزمەت ەتەتىن بولادى. حالىقارالىق رەيستى اشۋدا قازاقستاندىق ازاماتتىق اۆياتسيا كوميتەتى مەن ءۇندىستاننىڭ اۆياتسيالىق بيلىگى بىرلەسە جۇمىس اتقاردى.
ەكسپو-2017 حالىقارالىق مامانداندىرىلعان كورمەسىنىڭ قوناقتارىنا جاعداي جاساۋ ماقساتىندا «ەير استانا» اۋە كومپانياسى ورىندايتىن استانا – دەلي – استانا باعىتى بويىنشا جاڭا حالىقارالىق رەيس اشىلادى.