«ەتنوس كۇنى» جىل سايىن ۇيىمداستىرىلىپ وتىرادى. مادەني شارا استانا قالاسىنداعى ەتنومادەني بىرلەستىكتەردىڭ جەتىستىكتەرىن پاش ەتۋگە, سونداي-اق, وسىندا تۇرىپ جاتقان ءتۇرلى ۇلتتاردىڭ سالت-ءداستۇرىن ناسيحاتتاۋعا ارنالدى. بۇل شارا بيىل ەلوردا تورىندەگى ورتالىق ساياباقتا ءوتتى.
فەستيۆال كەزەكتى رەت كاۆكاز مادەنيەتىنە ارنالدى. العاشقىسى وسى جىلدىڭ 13-15 ءساۋىر ارالىعىندا وتكەن بولاتىن. كاۆكاز حالقىنىڭ لەزگينكا ءبيى بۇگىندە بىرقاتار ەلدەردە اسا تانىمال ەكەنى جاسىرىن ەمەس. شارا بارىسىندا ۇلتتىق ءبيى جينالعان قاۋىمدى ەرىكسىز ەلىتىپ الا جونەلدى. سالتاناتتى جيىندا كاۆكاز مادەنيەتىنەن بولەك, ەۋروپا, سلاۆيان, شىعىس حالىقتارىنىڭ مادەنيەتى, سالت-ءداستۇرى كەڭىنەن تانىستىرىلدى.
سونىمەن قاتار, گەرمانيا مادەنيەتارالىق بايلانىس ورتالىعىنىڭ ديرەكتورى كونستانتين شامبەر تۋعان ەلى تۋرالى وي ءبولىستى.
– قازاقستان – مەنىڭ تۋعان ەلىم. بالا كۇنىمدە تاريحي وتانىم گەرمانياعا كوشىپ كەتكەنىممەن قازاق جەرىنىڭ ورنى مەن ءۇشىن ءاردايىم جوعارى. مۇندا ءجيى كەلىپ تۇرامىن. ءار كەلگەنىمدە قازاق ەلىنىڭ كۇن ساناپ دامىپ بارا جاتقانىنىڭ كۋاسى بولامىن. وسى باعىتتا جالعاستىرار بولسا, ۇلى دالا ەلىنىڭ دامىعان مەملەكەتتەر قاتارىنا قوسىلارىنا سەنىمدىمىن. وسىعان دەيىن ءتۇرلى ەلدەرگە بارىپ كوردىم. بىراق ءدال قازاقستان سەكىلدى وزگە ۇلت وكىلدەرىنە مەيىرىممەن قاراعانىن بايقامادىم. بۇگىنگى كاۆكاز مادەنيەتىن ءبىر جىل ىشىندە ەكىنشى رەت وتكىزىلىپ وتىرعانى سونىڭ ءبىر دالەلى بولسا كەرەك, – دەدى كونستانتين شامبەر.
سالتاناتتى جيىندا «حازار» ازەربايجان ەتنومادەني بىرلەستىگىنىڭ, «ۆان» ارميان مادەني ورتالىعى» قوعامدىق بىرلەستىگىنىڭ, «ۆايناح» چەشەن-ينگۋش ەتنومادەني ورتالىعىنىڭ وكىلدەرى قالا تۇرعىندارى مەن قوناقتارىن دۋمانعا بولەدى.
ايان ءابدۋالي, «ەگەمەن قازاقستان»