يسمايل كاحرامان كەزدەسۋدى قازاقستان ەلشىسىن جاڭادان تاعايىندالعان لاۋازىمىمەن قۇتتىقتاۋى مەن بۇل قىزمەتىنىڭ ەكى باۋىرلاس ەلدىڭ بارلىق سالاداعى قارىم-قاتىناستارىنىڭ نىعايۋىنا ارقاۋ بولاتىندىعى جونىندەگى ءوز سەنىمىن جەتكىزۋمەن باستادى.
يسمايل كاحرامان 2016 جىلعى 15 شىلدە كۇنگى مەملەكەتتىك توڭكەرىس ۇيىمداستىرۋعا باعىتتالعان وقيعالارعا توقتالىپ, تۇركياعا ءوز ساپارى ارقىلى قولداۋىن ەڭ العاش بولىپ بىلدىرگەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا تۇرىك حالقىنىڭ شەكسىز العىسىن جەتكىزدى.
سونىمەن قاتار, يسمايل كاحرامان نۇرسۇلتان نازارباەۆتىڭ جۇرگىزىپ وتىرعان سىندارلى ساياساتى مەن پاراساتتىلىعىنىڭ ارقاسىندا قازاقستاننىڭ ورتا ازياداعى ەڭ قۋاتتى مەملەكەتكە اينالىپ وتىرعانىن, سونداي-اق, ايماقتىق جانە حالىقارالىق دەڭگەيدەگى كوپتەگەن ماڭىزدى ماسەلەلەردەگى بىتىمگەرشىلىك ءرولىن ەرەكشە اتاپ ءوتتى. وعان قوسا, ەلىمىزدىڭ بۇۇ قاۋىپسىزدىك كەڭەسىنە مۇشە بولىپ سايلانۋىنا دا ءوز قۋانىشىن بىلدىرگەن تۇركيا پارلامەنتىنىڭ توراعاسى دۇنيەجۇزىلىك قاۋىمداستىق تاراپىنان ارتىلعان بۇل ۇلكەن سەنىمدى قازاقستاننىڭ تولىق اقتايتىنى كۇمانسىز ەكەنىن ايتتى.
ابزال ساپاربەك ۇلى مەن يسمايل كاحرامان اراسىندا وتكەن بۇل باس قوسۋدا ەكىجاقتى ماڭىزدى ماسەلەلەردىڭ تالقىلانۋىمەن قاتار, ەلباسىمىزدىڭ «بولاشاققا باعدار: رۋحاني جاڭعىرتۋ» باعدارلامالىق ماقالاسى توڭىرەگىندە دە اۋقىمدى اڭگىمە ءوربىدى.
اتاپ ايتقاندا, تۇركيا پارلامەنتىنىڭ سپيكەرى قازاقستان بيلىگىنىڭ لاتىن الفاۆيتىنە ءوتۋ جونىندەگى شەشىمىنە ءوزىنىڭ وڭ كوزقاراسىن تانىتا وتىرىپ, ەلباسىمىزدىڭ بۇل باعدارلاماسى قازاقستاننىڭ جارقىن بولاشاعى ءۇشىن وتە ءتيىمدى بولارىنا سەنىمىن ءبىلدىردى.
تۇرىك سپيكەرى بۇل باعدارلامانى قازاقستاننىڭ 2050 جىلعا دەيىن الەمنىڭ دامىعان 30 ەلىنىڭ قاتارىنا كىرۋ باعىتىنداعى الەۋەتىن ناقتى ايقىندايتىن, ساياسي, ەكونوميكالىق جانە قۇقىقتىق تۇردە دامۋىنىڭ وزەگى دەپ سانايتىنىن ءبىلدىردى.
ءوز كەزەگىندە, دوستىق توبىنىڭ توراعاسى ح.يپەك ەلباسىنىڭ ماقالاسى تەرەڭ ويمەن جازىلعانىن جانە بۇنى تەك قازاقستان حالقى ءۇشىن عانا ەمەس, تۇركى الەمىن قوسقاندا بارشا ادامزاتقا ارنالعان, ءتۇرلى رۋحاني قۇندىلىقتاردى قامتيتىن مانيفەستو رەتىندە باعالاۋعا بولاتىنىن ايتتى.
سونداي-اق, كەزدەسۋ بارىسىندا يسمايل كاحرامان ءوزىنىڭ قازاقستاندىق ارىپتەسى نۇرلان نيگماتۋلينگە ىستىق ىقىلاسى مەن تۇركياعا ارنايى شاقىرۋىن جەتكىزۋدى سۇرادى.
كەزدەسۋ سوڭىندا يسمايل كاحرامان بارشا قازاقستاندىقتاردى قازىرگى تاڭدا الەم نازارىن وزىنە اۋدارىپ وتىرعان «ەكسپو-2017» حالىقارالىق كورمەسىنىڭ اشىلۋىمەن قۇتتىقتاپ, قازاقستان حالقىنا ءوزىنىڭ ىستىق سالەمىن جولدادى.